• Әхбаратлар еқими
• 22 Қыркүйек, 2022

Һәрбий хизмәттин кәлгәнләргә йеникчилик

Һәрбий хизмитини өтәп қайтқан қазақстанлиқлар дөләт алий оқуш орунлириға умуммиллий тестни тапшурмастинла оқушқа чүшәләйду, дәп билдүрди йеқинда Қазақстан Җумһурийити мудапиә министриниң мәслиһәтчиси Айгүл Тулембаева.
Униң сөзичә, һәрбий хизмәттин қайтқан шәхсләрдә умуммиллий тест нәтиҗилирини тәкшүрмәстинла алий оқуш орунлириға оқушқа чүшүш имканийити пәйда болди. Улар һәқ төләп яки һәқсиз оқалайду.
“Мудапиә министрлигиниң мәмликитимизниң барлиқ регионлиридики йетәкчи алий оқуш орунлири билән бирликтә мәхсус лайиһиси әмәлгә ашурулмақта. Униңға бенаән қәрәллик һәрбий хизмәтни өтәшниң инавитини ашуруш үчүн мәхсус билим елиш имтиязлири берилиду. Һазирниң өзидә 30ға йеқин йетәкчи алий оқуш орунлири мәзкүр лайиһини қоллап-қувәтлиди. Мудапиә министрлигиниң намиға мувапиқ қоллаш хәтлири келип чүшти, – деди у.
Шундақла бәзи алий оқуш орунлири һәрбий хизмитини өтәп қайтқан шәхсләргә һәқсиз алий билим беришкә тәйяр. Лекин шундақ имканийәт пәқәт жуқури һәрбий тәйярлиқ һәм интизам көрсәткәнләр үчүнла берилди. Һазирқи күндә мәзкүр механизм мудапиә министрлиги вә миллий гвардия оттурисида ишлиниватиду. Барлиқ җәһәттин өзини яхши көрсәткән һәрбий хизмәтчиләр мудапиә министрлигиниң һәрбий оқуш орунлириға оқушқа чүшәләйду, шундақла елимиздики алий оқуш орунлириниң һәрбий кафедрилирида һәқсиз билим алалайду.
Буниңдин ташқири, идарә банклар билән бирликтә қәрәллик һәрбий хизмитини өтәватқанлар үчүн кредитлиқ тәтилләрни бериш механизмини ишләп чиқиватиду.