• Әхбаратлар еқими
• 22 Қыркүйек, 2022

Деханлар етизда баш қошти

Панфилов наһийәси — аграрлиқ наһийә. Наһийәдә йеза егилиги саһаси мәхсәтчанлиқ билән тәрәққий әтмәктә. Тәкитләш керәкки, наһийәдә өткән жили 44 миң гектар мәйданға йеза егилиги зираәтлири терилгән еди. Униң 25 417 гектариға көмүқонақ пәрвиш қилинди. Бийилқи жили болса, наһийә деханлири 26 000 гектар мәйданға көмүқонақ терип, пәрвиш қилмақта. 

Гөһәрбүви ИСМАЙИЛҖАНОВА,
« Уйғур авази»

Йеқинда Яркәнт шәһиридики «Ернар» шәхсий дехан егилигиниң етизлиғида наһийә деханлириниң семинари болуп өтти. Семинарға Йәттису вә Алмута вилайәтлириниң деханлири билән тәвәдики йеза округлириниң һакимлири, шәхсий дехан егиликлириниң әзалири билән механизаторлар, агрономлар вә наһийәлик йеза егилиги бөлүминиң мутәхәссислири қатнашти. 
Семинарни Панфилов наһийәсиниң һакими Марат Сағымбек ечип, тәвә ихтисадиниң асаси болған деханчилиқ вә чарвичилиқ саһалирида дөләт программисиға мувапиқ елип бериливатқан ишларни атап көрсәтти. Болупму ашлиқ териш, суғириш вә уни жиғиштурушта мүмкинчиликләрдин толуқ пайдилинип, исрапчилиққа йол қоймаслиқ чарилирини атап көрсәтти.
Мошу йәрдә вилайәт даирисидә көмүқонақниң 33 пайизиниң Панфилов наһийәсидә өстүрүлидиғанлиғини тәкитләш оруунлуқтур. Семинар қатнашқучилири мәзкүр башқошушта терилғу мәйданлирини йәниму кәңәйтип, суғирилидиған йәрләрни үнүмлүк пайдилип, йеңи технологияләрни кәң түрдә җарий қилиш, тамчилитип суғириш усулини қоллиниш, сүпәтлик уруқ йетиштүрүш арқилиқ йеза егилиги мәһсулатлириниң көләмини техиму ашурушқа болидиғанлиғини тәкитлиди.
 Семинар давамида «Ернар» дехан егилилигиниң рәһбири Тасқин Жапарқул өз егилигидә пәрвиш қилиниватқан көмүқонақ сортлириниң әвзәлликлирини әтраплиқ ейтип бәрди. Әнди «Кортева Агрисаенс Казахстан» ҖЧЙ менеджери Татьяна Кудрина болса, көмүқонақниң «Пионер» сортини териш әшу бир 1950-жилдин бери қолға елиниғанлиғини әскә елип, уни пәрвиш қилиш, уруғини сетивелиш мәсилилири бойичә пикир-тәклиплири билән ортақлашти. Етиз күни мәйримидә «AlemAgro Holdind», «BNK Group», «Қыран Агро» вә башқиму компанияләрниң вәкиллири заманивий йеза егилиги техникилирини намайиш қилип, уларниң қувити, төзүмлүклиги, сүпити һәққидә кәң баян қилди.
Тәкитләш керәкки, бу күни минерал оғут чечиш, тамчилитип суғириш, ашлиқ оруш үчүн ишләнгән болуп, йеза егилиги техникиларниң иши әмәлдә көрситилди. 
Семинарға қатнашқан наһийә деханлири саһада йәниму чоң утуқларға қол йәткүзүшкә болидиғанлиғини алаһидә қәйт қилишти. 
 
Панфилов наһийәси.