• Әхбаратлар еқими
• 22 Қыркүйек, 2022

Йәнә йол мәсилиси

Дүшәнбә күни Алмута шәһәрлик мәслиһитиниң ХХV сессиясиниң мәҗлиси давамида Алмутини тәрәққий әткүзүш программиси тәстиқләнди. Магистраллиқ йолларни қайта қуруш еһтияҗи һөҗҗәтниң асасий пунктлириниң бири болди.
Алмутида йәттә шәһәргә кириш йоли бар: уларниң бәши (Талғир, Ғулҗа тракти, Алмута – Қонаев, Алмута – Бишкек, жуқарқи хәшкиләң трассиси) – җумһурийәтлик, иккиси вилайәтлик (Боралдай трассиси – Чамалған станцияси, Или тракти) әһмийәткә егә. Уларниң ичидә асасий кириш йоллири – бу Бишкек, Қонаев трассилири вә Ғулҗа тракти. Мәзкүр йолларниң һәрқайсисида күнигә 40 миң автотранспорт, умумән 120 миң автотранспорт маңиду. Әмәлиятта бу йоллар арқилиқ 230 миңға йеқин машина өтиду. Ечинарлиғи, уларниң һечқайси бүгүнки әһвалға молҗаланмиған.
Мәзкүр проблемини йешиш үчүн магистраллиқ йолларни Чоң Алмутини айлинип өтүш автомобиль йолиға қошуш иши кетип бариду.
Һазирниң өзидә шәһәргә кириш һәм чиқиш йоллирида бирнәччилигән километрға созулған машинилар тиқилиши байқалмақта. Бу, өз новитидә, шәһәр ичидики йолларғиму өз тәсирини йәткүзмәктә. Нәтиҗидә җәмийәтлик транспортларниң қатнаш графиги бузулуп, шәһәрниң һава бассейниға чоң зиян йәткүзүлүватиду.