• Президент Мәктүби: парлақ келәчәк капалити
• 22 Қыркүйек, 2022

Өзимиздин башлайли

Қазақстан Җумһурийитиниң Президенти Қасим-Жомарт Тоқаевниң «Адаләтлик дөләт. Бирпүтүн милләт. Хатирҗәм җәмийәт» намлиқ қазақстанлиқларға йоллиған Мәктүби елимиздә тәрәққиятниң йеңи басқучиға қәдәм ташлиғанлиғини көрситиду. 
Президентимиз тәкитлигәндәк, «Биз «граждан – бизнес – дөләт» үчлүгидики мунасивәтләрни чоңқур өзгәртишимиз керәк. Дөләт, биринчи новәттә, имканийәтләр вә адаләтликниң һәммиси үчүн тәң болушини тәминләйду». Әлвәттә, дөләт буниңдин илгириму кичик вә оттура тиҗарәтни қоллап кәлгән. Шуниң асасида билим бериш саһасидики дөләт-хусусий шериклик механизми асасида йеңи-йеңи балилар бағчилири вуҗутқа кәлди. Буни елимиздә жүргүзүлгән иҗтимаий-ихтисадий ислаһатларниң нәтиҗиси, дәп билимән.
Мәктүптә дөләт-хусусий шериклик механизмиға (буниңдин кейин — ДХШМ) чоңқур көңүл бөлүшни, шундақла ихтисадий әркинликни толуқ қоллап-қувәтләйду. Бирақ шуниң билән бир вақитта гражданларни базарниң һәддидин ташқири силкиниш-өзгиришлиридин һимайә қилиду. Кичик вә оттура тиҗарәт җошқун тәрәққий етиши керәк. Шуниң үчүн дөләт-хусусий шерикликниң йеңи үлгисигә көчүш лазим. Һазир тиҗарәтниң нурғунлиған лайиһилири наинсап тиҗарәтчиләр вә әмәлдарлар үчүн «җан беқиш мәнбәсигә» айланди. Бу саһадики шәртнамиләр очуқ болуши вә конкурслуқ асаста түзүлүши шәрт. Мәзкүр механизмниң нәтиҗидарлиғини ашуруш үчүн тегишлик қанун қобул қилиш лазим, дәп қәтъий ейтти Дөләт рәһбири. Мошуниңға бағлиқ бу жили балилар бағчилириму вакантлиқ орунға электронлуқ әмгәк биржиси сайти арқилиқ иш елип баридиған болиду. Шу йәргә тиркәлгән үмүткарлар конкурс асасида ишқа қобул қилиниду. Бу механизм ашкарә түрдә көпчиликкә ениқ болуп туриду. Бу болсиму, коррупцияниң орун елишиға мүмкинчилик бәрмәйду вә адаләтлик ишқа қобул қилишниң муһим алаһидилиги болуп һесаплиниду. Мәктүптә қаралған йәнә бир алаһидилик – һөкүмәт тәрәптин орунсиз тәкшүрүшләрниң елинип ташлиниши. Июнь-август айлирида ҖЧЙ балилар бағчилирини лицензияләндүрүш тоғрисида пикирләр овҗ елип, һөкүмәт вә «КАНО» тәшкилати арисида бирнәччә қетим учришишлар вә келишимләр жүргүзүлди. Нәтиҗидә лицензияләндүрүш елип ташланди. Чүнки йеңи балилар бағчилири СЭС тәләплиригә асаслинип, униң һәртәрәплимә тәкшүрүши асасида «Е-Лицензия» сайти арқилиқ ечилишқа рухсәтнамә алғандин кейинла паалийитини башлаш һоқуқиға егә болди. 
Новәттики муһим мәсилә – милләт иқтидарини ашурушта һәл қилғучи роль ойнайдиған билим бериш системисиниң әһвали. Бу мәсилидә мәктәпкичә тәрбийә саһаси муһим орунда туруши керәк. Қазақстанда 2 яштин 6 яшқичә болған балиларниң йеримидин сәл ошуғи мәктәпкичә билимгә тартилған. Бирақ һөкүмәт пәқәт 3 яштин башлап балиларға билим беришни мәбләғ билән тәминләватиду. Әнди 2 яштин башлап мәбләғ билән тәминләш мәсилиси қолға елиниватқини хошал қилиду. Чүнки һазирқи балилар бағчилириға 1,5 яштин ашқан балиларму көпләп келиватиду. Шуниң үчүн биз өз мәблиғимиз һесавиға гөдәкләр топини ечип, киримимизниң мәлум қисмини шуниңға сәрип қиливатимиз. Әгәр биз шу кичик топни ачмисақ, уларниң ата-анилири ишләш мүмкинчилигидин айрилиду. Шуңлашқа уларға имканийитимизниң яр беришичә, ярдәм қилишқа тиришиватимиз. Мошу мәсилә һәл қилинип қалса, нур үстигә нур болар еди. Бу барлиқ балилар бағчилирида орун еливатқан мәсилә екәнлигигә ишәнчим камил. Шуниң билән биллә тәрбийичиләрниң мәртивисини вә айлиқ маашини ашуруш үчүн әмәлий чариләр көрүлүши лазим. 
Өз ишиға садиқ педагоглар билим бериштики илгириләшниң һәрикәткә кәлтүргүчи күчи болуп һесаплиниду. Мәктүптә шундақла балилар бағчисидики тәрбийилигүчиләрни аттестациядин өткүзүш тоғрилиқму сөз болди. Шуңлашқа балилар бағчисидики тәрбийичиләрниң дипломлирини прокуратура арқилиқ тәкшүрүшләрдин өткүзүп чиқтуқ. Педагогларниң билимини мукәммәлләштүрүшни өз һөддимизгә алдуқ. 
Хуласиләп ейтқанда, адаләтлик дөләт болимиз дәйдекәнмиз, бирпүтүн милләт сүпитидә һәммимиз бирдәк хатирҗәм җәмийәт қуруп, паравән һаят кәчүрүшимиз лазим. Униң үчүн һәрбир қазақстанлиқ йеңи қәдәмни өзидин башлиши керәк. 

Арзигүл АБДРИМОВА,
Маливай йезисидики «Періште 2019» 
балилар бағчисиниң мудири.
         Әмгәкчиқазақ наһийәси.