• Әхбаратлар еқими
• 22 Қыркүйек, 2022

Салмақлиқ пикирләр мәйдани

Өткән җүмә күни пайтәхттә икки күнгә созулған VII Дуниявий вә әнъәнивий динлар лидерлириниң қурултийи рәсмий аяқлашти. Әһмийити зор қурултайниң йепилиш тәнтәнисигә Президент Қасым-Жомарт Тоқаев қатнашти. Қурултайниң Хуласә декларацияси елан қилинди.
Қасым-Жомарт Тоқаев қурултайниң икки күнлүк ишини йәкүнләп, Қазақстан мошу күнләрдә һәрхил мәдәнийәтләрниң пикир алмаштуруш мәркизигә айланғанлиғини ейтти.
— Силәр барлиқ инсанийәтниң күч-ғәйритини умумий мәнпийәткә топлаш үчүн дунияниң һәрхил җайлиридин кәлдиңлар. Мошуниң өзи динларара разимәнлик билән һәмкарлиқниң әһмийитини намайиш қилиду. Һәқиқәтәнму, һәммимизниң мәхсити бир. Бу — цивилизацияләр уйғунлуғини орнитиш, течлиқ вә турақлиқни күчәйтиш. Қурултайда нурғун салмақлиқ пикирләр ейтилди. Униң һәммиси бизниң уйғунлуқ илкидики дуния қуруш йолидики паалийитимизгә иҗабий тәсир қилиду дәп ойлаймән, — дәп тәкитлиди Президент.
—  Қурултай дунияда җиддий вақиәләр йүз бериватқан пәйттә өтүватиду. Бу тарихий пәйт. Пандемиядин кейинки дәвирдә дуниядики геосәясий турболентлиқ күчәйгән пәйткә дуч кәлгәндә, цивилизацияләрара диалог вә дуния дәриҗисидә ишәнчини күчәйтишниң йеңи услублирини тәйярлашниң муһимлиғи ашти. Мошу қурултай мошундақ муһим мәсилини һәл қилишқа зор төһпә қошиду дәп ойлаймән, — дегән пикирни билдүрди Дөләт рәһбири. 
 Президент Қазақстан хәлқи вә өз намидин Рим Паписи Францискқа елимизгә келип, қурултай ишиға қатнашқанлиғи үчүн миннәтдарлиқ изһар қилди.
 Дөләт рәһбири қурултайниң хуласә һөҗҗитигә алаһидә диққәт бөлди. У қурултай хуласиси бойичә бүгүн мәзмунлуқ һәртәрәплимә тәһлил қилинған Декларация қобул қилинидиғанлиғини ейтти. Униң пикричә, бу муһим концептуал һөҗҗәт чоң мәсилиләрни өз ичигә алиду вә һөкүмәтләргә, сәясий рәһбәрләргә, хәлиқара тәшкилатларға йөнилиш беридиған болиду. 
 Қурултайниң йепилиш тәнтәнисидә Рим Паписи Франциск сөз сөзләп, мошундақ җиддий шараитта салмақлиқ диалог мәйданида чоң форумни өткүзгәнлиги үчүн Қазақстан хәлқигә вә мәмликәт рәһбәрлиригә миннәтдарлиқ изһар қилип, қазақ тилида «көп рахмет» деди.
Шундақла әл-Азһар университети-ниң Алий имами Ахмад ат-Тайебму қурултай давамида сөз сөзләп, өз пикри билән бөлүшти. Униң ейтишичә, форумниң қарари билән тәклиплиригә ошуқ бир нәрсә қошуш қийин.
Қурултайниң йепилиш тәнтәнисигә модераторлуқ қилған Сенат рәиси Мәулен Әшимбаев қурултайниң мәзмунлуқ өткәнлигигә тохталди.
 Қурултай ишиниң йәкүни бойичә VII Дуниявий вә әнъәнивий динлар лидерлириниң қурултийиниң Декларацияси қобул қилинди. Һөҗҗәтниң мәтинини Англикан чиркосиниң мәхсус вәкили, Доркинг епископи Джо Бэйли Уэлс тонуштурди. 35 баптин туридиған һөҗҗәттә һазирқи күндики дуниявий мәсилиләрниң һәммиси өз ипадисини тапқан.