• Асасий мақалилар
• 29 Қыркүйек, 2022

Түркстан – түрк дуниясиниң муқәддәс шәһири

Дөләт рәһбири Қасым-Жомарт Тоқаев иш бабидики сәпәр билән Түркстан виалийитигә келип, регион җамаәтчилиги билән учрашти.
Президент учришиш давамида бу сәпириниң асасий мәхсити вилайәттики әһвал билән тонушуш екәнлигини ейтип, Түркстанни елимизниң алтун қозуғи дәп атап көрсәтти.
Түркстан ­­­­– һәммимизниң пәхри, икки дуния ишиги, һәрбир түркниң бөшүги һесапланған вә пүткүл аләмгә тонулған хәсийәтлик йәр. Мошу шәһәрниң тарихимиздики орни алаһидә. Түркстандики Ғоҗа Әхмәт Йәссавий мавзолейи – мәнивий һаятимизниң ярқин испати. Шуңлашқа Түркстанға, умумән, мошу вилайәткә алаһидә әһмийәт беришимиз керәк. Бу, әң алди билән, Һөкүмитимизниң муһим вәзиписи, – деди Президент.
Дөләт рәһбири қазақ жилнамисиға алтун һәрип билән йезилған нурғунлиған намайәндилиримизниң мошу йәрдә дәпин қилинғанлиғиға тохтилип, булту шәһәргә “Түрк дуниясиниң роһий пайтәхти” дегән мәртивә берилгәнлигини тилға алди. Президентниң пикричә, бу вақиә Түркстанни Түрк дунияси алаһидә қәдир тутиду дегәнни билдүриду.
Бу хасийәтлик шәһәрни роһий вә тарихий пайтәхтимиз десәк, тоғра болидиғанлиғиға һечқандақ гуманим йоқ. Шуңлашқа Һөкүмәт пат-йеқинда Түркстан шәһиригә мошундақ мәртивә бериш мәсилисигә мунасивәтлик лайиқ қарар қобул қилиду дәп ойлаймән. Муқәддәс шәһәр әзәлдин милләтниң иссиқ угиси, қазақниң қара чаңириғи болуп кәлмәктә. Түркстан мошу муқәддәс вәзипә һөддисидин һазирму аброй билән чиқиаватиду. Шуңлашқа мән атилар йоли билән меңип, Миллий Қурултайниң новәттики мәҗлисини Түркстанда өткүзүшни тәклип қилдим. Униңда әл келәчигигә мунасивәтлик муһим мәсилиләрни муһакимә қилимиз, – деди Қасым-Жомарт Тоқаев.
Андин Дөләт рәһбири ахирқи жиллири йүз бәргән иҗабий өзгиришләрни атап өтти. Президент кәлтүргән фактларға мувапиқ, Түркстанға тартилған инвестиция көләми 8 һәссә ашқан. 77 миң адәмгә беғишланған көпқәвәтлик өйләр селинған. Шуниң билән биллә шәһәр йешил кимхапқа оринип, экологиялик әһвали яхшиланған. Хәлиқни ичидиған су билән вә тәбиий газ билән тәминләш мәсилисини һәл қилинди дәп ейтишқа болиду. 2019-жилдин бери вилайәткә 2 миллионға йеқин турист кәлгән. Кейинки 3 жилда региондики санаәт вә йеза егилиги саһасидин елинған мәһсулат 1,5 һәссә өскән. Вилайәттә 64 миңға йеқин турақлиқ иш орни ечилған.
Дөләт рәһбири елимиздә “Еңбек” программисиниң әмәлгә ашурулуватқанлиғиға тохтилип, униң хәлиқ сани нурғун җәнупниң турғунлирини иш күчи аз регионларға көчиришкә беғишланған лайиһә екәнлигини чүшәндүрди.
Бәзибир гражданлиримиз шималға көчүп, тирикчилигини қиливатиду. Бийил “Серпін” программиси бойичә яшларға 3700гә йеқин грант бөлүнди. Униң 800дин ошуғиға түркстанлиқлар егә болди. Шундақ қилип, яшларниң әмгәккә болған тәлпүнүшини қолға кәлтүрүшимиз керәк. Биз қуруватқан йеңи җәмийәттә әмгәк адими әң биринчи орунда туруши керәклигини яшлиримизға чүшәндүрүш һаҗәт. Чүнки вәтәнпәрвәрлик дегинимиз, әң алди билән, ишбиләрмәнлик, ишчанлиқ. Қуруқ сөздин һечнәрсә чиқмайду. Гражданлиримиз алди билән аилисигә, балилириға ғәмхор болуши шәрт, – деди Қазақстан Президенти. 
Шундақла Қасым-Жомарт Тоқаев Қазақстан хәлқигә йоллиған Мәктүбидә ейтилған мәсилиләргә тохталди. Дөләт рәһбириниң қәйт қилишичә, биз сәясий йеңилиниш билән биллә иҗтимаий-ихтисадий чарә-тәдбирләрниму қолға алимиз. Униң нәтиҗисини пүткүл әл көриду. 
— Йәнә бир наһайити муһим ислаһат — Президентниң бирла қәрәлгә сайлиниши. Бизниң региондики қайси мәмликәтни елип қаримайли, мундақ өзгириш һечқачан болмиған. Шуңлашқа бу ислаһатни демократия йолидики дадил қәдәм дәп ишинимән. Тавакәлчиликкә бәл бағлисақму, мошундақ қарар хәлқимизниң парлақ келәчиги үчүн керәк дәп үмүт қилимән. Мошу йәрдә “Бу ислаһат немә үчүн һаҗәт болуп қалди?” дегән соал пәйда болуши мүмкин. Мәсилә монуниңда: президентлиқ лавазимға нурғунлиған жиллар давамида пәқәт бирла адәм егә болмаслиғи керәк. Мундақ әһвал әлгиму, Дөләт рәһбиригиму аброй  елип кәлмәйду. Биз келәчәккә ениқ ишәнчә билән қарап, адил, талантлиқ сәясәтчиләргә йол ечишимиз һаҗәт. Умумән, хәлиқ бизниң сәясий системини өзгәртиш тоғрилиқ планлиримизниң мәхсәт-мәзмунини яхши чүшиниду. Қолға елинған ишни давамлаштуруш үчүн йеңи Конституциягә мувапиқ ишәнчә мандати һаҗәт. Шуңлашқа новәттин ташқири Президент сайлими бийилқи 20-ноябрьға бәлгүләнди. Биз бу мәвсүмни қанунға мувапиқ адил вә ашкарә өткүзимиз. Түркстанлиқларму сайламға актив қатнишип, өзлири таллиған намзатқа аваз бериду дәп ишинимән — деди Қасым-Жомарт Тоқаев.
Президент жиғин ахирида бирнәччә әмгәк ветеранини дөләт мукапатлири билән тәғдирлиди. Атап ейтқанда, “Водные ресурсы — Маркентинг” ҖЧЙ мудири Анарбек Орман І дәриҗилик “Барыс” ордени билән, әмгәк ветерани Жарылқасын Әзиретбергенулы ІІІ дәриҗилик “Барыс” ордени билән вә әмгәк ветерани Қойшыбай Әрипбай билән Мәдәнийәт вә спорт министрлиги “Қазқайтажаңарту” ҖДК Түркстан шөбисиниң архетектори Нурғали Имажанов “Парасат” ордени билән мукапатланди. Шундақла “Южный Казахстан” вилайәтлик гезитиниң баш муһәррири Марина Лимаренкоға “Ерең еңбегі үшін” медали, оттура мәктәп муәллими Пернебай Арыновқа “Шапағат” медали тапшурулди.
Регионға болған иш бабидики сәпәр давамида Қасым-Жомарт Тоқаев Түркстан вилайитиниң экоактивистлири билән Ботаника беғида көчәт тикиш чарә-тәдбиригә қатнашти. Мошу йәрдә яшлар билән сөһбәтләшкән президент Вәтәнни сөйүш туйғусиниң адил әмгәк билән башлиниши керәклигини ейтти. “Вәтәнни сөйүш мошундақ адил әмгәк билән, пайдилиқ иш билән башлиниду. Елимизниң һәрбир граждини әмгәкчан болуши лазим. Һәммиңларни қоллап-қувәтләймән, кәлгүси әвлат – бизниң үмүтимиз, елимизниң келәчиги. Биз ветеран болуп мәңгү һакимийәттә олтармаймиз. Мениң әң чоң мәхситим – яшларға йол ечиш”, деди Президент Түркстан яшлириға.