• Сәнъәт
• 20 Қазан, 2022

«Или бойи гүлзарлиқ»

Сабирәм ӘНВӘРОВА, 
«Уйғур авази» 

Йеқинда Уйғур наһийәлик Мәдәнийәт өйидә «Арзу» ансамблиниң артисти, көпкә тонулған сәнъәткар Адилҗан Һемитовниң (Адил Қари) «Или бойи гүлзарлиқ» намлиқ йәккә концерти өтти. 

Концертниң пәрдиси «Арзу» ансамбли уссулчилири тәрипидин тәйярланған «Тәнтәнә» уссули билән ечилди. Андин хәлиқ нахшилири билән хәлиқниң муһәббитигә еришип, «Адил Қари» тәхәллуси билән көпкә тонулған сәнъәткар «Или бойи гүлзарлиқ», «Пәрвайим пәләк», «Қәләм – қаш», «Мениң ярим», «Һарвукәш», «Дехан нахшиси», шундақла Қумул, Хотән, Қәшқәр нахшилирини иҗра қилип, тамашибинларға хелиғичә унтулмас тәсират һәдийә қилди.  Шундақла иҗрачиниң дәсләпки қетим орунланған «Мән сени яхши көримән» намлиқ йеңи нахшиму бирдин көпчиликниң көңлидин чиқип, тиңшиғучиларниң жуқури баһасиға еришти.
Кәч давамида уйғур сәнъитиниң  пешивалири аталған Қазақстанниң хизмәт көрсәткән әрбаплири – Нуралим Варисов, Марат Норузов вә «Арзу» ансамблиниң сәнъәткарлири Қасимҗан Мухтәров, Шархат Қурбанов вә башқилар өз һүнирини намайиш қилди. Атап өтмәсликкә болмас, ансамбль сәнъәткарлири Һәмраҗан Тохтасунов, Рина Теләпова, Нуршат Һашимахуновлар  сәһниләштүргән «Немә буйрийсиз?» намлиқ миниатюра һәммини күлкигә ғәриқ қилди. Мана шундақ тамашибинларға чоңқур роһий озуқ, жуқури кәйпият беғишлиған концертниң ахирида Адилҗан Һемитов концертни уюштурушқа йеқиндин ярдәм көрсәткән «Арзу»  ансамблиниң бәдиий рәһбири Гүлмира Мәхпирова вә ансамбль әзаси, Уйғур наһийәсиниң Пәхрий граждини Қасимҗан Мухтәровқа алаһидә миннәтдарлиғини йәткүзди. 
Андин Уйғур наһийәсиниң һакими Шөһрәт Нурахунов, Чонҗа йезисиниң һакими Ромэн Суджәков, җумһурийәтлик «Уйғур авази» гезитиниң баш муһәррири Ершат Әсмәтов, ҖУЭМ рәисиниң мәслиһәтчиси  Султанмурат Срапилов, миллий мәдәнийитимизниң җанкөйәри Мәхсәтҗан Қаһаров, Уйғур наһийәлик Уйғур этномәдәнийәт мәркизи рәисиниң орунбасари Сәйдалим Амутов вә А.Һемитовниң устази Гүлсүмхан  Муртузаева концерттин алған тәсиратини бөлүшүш мәхситидә сәһнә төригә көтирилип, тәбрик-тилигини изһар қилди вә хатирә соғилирини тапшурди.