• Спорт
• 10 Қараша, 2022

Қанат учқанда қатиду

Спорт маһири Имәрҗан Идиллаевниң қолида мәшиқлиниватқан спортчи уйғур жигитлириниң ичидин нурғунлиған чемпионлар йетилип чиқмақта. Йеқинда Қирғизстанниң Ош шәһиридә спортниң кикбоксинг вә ушу-саньда түри бойичә болуп өткән хәлиқара турнирда униң шагиртлириниң ичидин алтә нәпәр уйғур жигити — Равқәт Зерипов, Шахрияр Қәмирдинов, Алияр Қәмирдинов, Сәйдиәкрәм Раимов, Расул Турғанҗанов, Алфидин Идакаев турнир ғалиби аталди. Хәлиқара дәриҗисидики спорт мусабиқилиригә қатнишип, мукапатлиқ орунларға еришиватқан уйғур яшлириниң қатари көпәйгәнсири, қәлбимиздики мәғрурлиниш, пәхирлиниш һиссиятлириму бесим болидекән.

Шәмшидин АЮПОВ,
«Уйғур авази»

Бүгүн биз әйнә шу топтин озған спортчи жигитлиримизниң ичидин Равқәт Зерипов билән Шахрияр Қәмирдиновниң бүгүнки күнгә қәдәр қол йәткүзгән утуқлириға қисқичә тохтилип өтүшни мувапиқ көрдуқ. Улар техи яш болсиму, чоң утуқларни қолға кәлтүрүватиду. 
Ушу-саньда бойичә спорт маһирлиғиға намзат Равқәт Зерипов сәккиз йешидин башлап спортниң мошу түри бойичә шуғуллиниватиду. Өткән вақит ичидә Равқәт мәшиқләндүргүчиси, Имәрҗан Идиллаевниң қолида тинмай мәшиқлиниши нәтиҗисидә бирнәччә қетим балилар вә өсмүрләр арисида өткүзүлгән җумһурийәтлик мусабиқиләрдә мукапатлиқ орунларни егиләшкә муваппәқ болған. Тәғдирләнгән пәхрий ярлиқ вә дипломлири билән медальлири хелә нурғун. 
Яш спортчи өткән жили Алмута шәһиридә өткән мусабиқидә 11 вилайәттин кәлгән 14-16 яшлиқ спортчи өсмүрләр арисидин 66 килограмм салмақ дәриҗиси бойичә биринчи орунни, Қизилорда шәһиридә аммибап күрәш бойичә өткүзүлгән мусабиқидә 11 вилайәттин кәлгән 16-17 яшлиқ спортчилар арисидин 65 килограмм салмақ дәриҗиси бойичә биринчи орунни егилиди. Түркиядә болуп өткән дуния чемпионатидиму йәнә биринчи орунға сазавәр болди. Йеқинда Равқәтниң һаятида йәнә бир хошаллиқ йүз бәрди. У Қирғизстанниң Ош шәһиридә кикбоксинг вә ушу-саньда бойичә өткән хәлиқара турнирда 16 — 20 яшлиқ спортчилар арисидин 75 килограмм салмақ дәриҗиси бойичә йәнә биринчи орунни егилиди.
Алмута шәһиридики М.Яқупов намидики 101-мәктәп-гимназияниң 8-синипида оқуйдиған Шахрияр Қәмирдиновму әйнә шундақ келәчигидин үмүтләндүридиған яш спортчиларниң бири. Шахрияр оқушиға дәхил йәткүзмәстин, алтә йешидин башлап «Нийәт» спорт клубида мәшиқлиниватиду. Өткән вақит ичидә Шахрияр бирнәччә қетим балилар вә өсмүрләр арисида өткүзүлгән шәһәрлик вә җумһурийәтлик мусабиқиләрдә мукапатлиқ орунларни егиләшкә муваппәқ болған. Тәғдирләнгән пәхрий ярлиқ вә дипломлири билән медальлири хелә нурғун. Әнди у йеқинда Қирғизстанниң Ош шәһиридә өткүзүлгән хәлиқара турнирда, жуқурида қәйт қилғинимиздәк, ушу-саньда бойичә биринчи орунға, кикбоксинг бойичә иккинчи орунға егә болди. Бу утуқ уни илһамландуруп, униң үмүтини техиму ашурди. 
Хәйрият, бүгүнки қәһриманлиримизниң келәчигидин мәшиқләндүргүчилири чоң үмүт күтмәктә. Өз новитидә, бизму яш спортчи жигитлиримизниң алда техиму егиз чоққиларни беқиндуруп, миллитимизниң, елимизниң абройини ашуридиған дуния чемпиониға айлинишиға тиләкдашлиқ билдүримиз!

СҮРӘТТӘ: турнир ғалиплири — Шахрияр Қәмирдинов (солдин-оңға), Равқәт Зерипов, Алияр Қәмирдинов, Сәйдиәкрәм Раимов, Расул Турғанҗанов вә Алфидин Идакаев.