• Спорт
• 16 Қараша, 2022

«Күрәшниң» күрәшчан балилири

Яркәнт шәһиридики «Күрәш» спорт клуби әзалири спортниң мутлақ һәқиқий җәң түри билән мәшиқлиниду. Йеқинда, йәни 4 — 6-ноябрь күнлири Алмутида өткән Қазақстан чемпионатиға қатнашқан Рамил Рәхмидинов, Абудукерим Нураев, Күрәш Адилҗанов, Һүсәнҗан Һасанов вә Манзура Закирова алтун медаль саһиби аталди. Дамир Ибрагимов, Амир Ғалипов, Карина Ғоҗәмбәрдиева – күмүч, Амир Низамов билән Ислам Ибрагимов бронза медаль билән мукапатланди. 

Гөһәрбүви ИСМАЙИЛҖАНОВА,
«Уйғур авази»

Тәкитләш керәкки, «Күрәш» спорт клубида 70тин ошуқ қиз-жигит мәшиқлиниду. Мәшиқләндүргүчи Мурат Ибрагимовниң тәкитлишичә, клубқа 6 — 16 яшқичә болған спорт ишқивазлири һәптисигә төрт қетим дәристин сирт вақтида турақлиқ шуғуллиниду. Қизиқишиниң үстүнлүги һәм устазиниң тәләпчанлиғи нәтиҗисидә балилар наһийә вә вилайәт даирисидила әмәс, бәлки җумһурийәт, һәтта хәлиқара дәриҗидики күч синашларға иштрак қилип, яхши нәтиҗиләрни қолға кәлтүрүватиду. Қазақстан чемпионатида ғалип чиққан балилар әнди декабрь ейида Россия Федерациясиниң Уфа шәһиридә өтидиған дуния чемпионатиға йолланма алди. 
— Алтә яшқа киргән балилирини йетәкләп бизниң клубқа келиватқан ата-аниларға миннәтдармиз. Чүнки улар, биринчи новәттә, балилирини сағлам һаят тәризигә дәвәт қиливатса, иккинчидин, пәрзәнтлириниң турнирларға қатнишиши үчүн һамийлиқ қиливатиду. Йошурушниң һаҗити йоқки, һәрбир мусабиқә, турнирға берип-келишниң өзи мәбләққә берип тирилиду әмәсму. Мундақ чағларда ата-анилар дайимла қоллап-қувәтләшкә тәйяр. Клубта һазирчә пәқәт икки қизла мәшиқлиниватиду. Манзура Закирова Яркәнт алий гуманитарлиқ техникилиқ колледжиниң тәнтәрбийә пәни муәллими бөлүмини тамамлаш алдида турса, йәнә бир қизимиз – Карина Ғоҗәмбәрдиева – шәһәрдики Җамбул намидики мәктәпниң йәттинчи синип оқуғучиси. Қалғанлири оғул балилар. Клубтики өсмүрләрниң қол йәткүзүватқан утуқлири аз әмәс. Спорт клубиниң намини «Күрәш» дәп оғлум Күрәшниң намида атидуқ. У бизни йәргә қаратмиди: Азия чемпионатида, шундақла өткән жили Санкт-Петербургта өткән дуния чемпионатида ғалип чиқти, — дәйду Мурат. 

Панфилов наһийәси.
Турсунмәһәмәт МӘШҮРОВ чүшәргән сүрәт.