• Спорт
• 16 Қараша, 2022

Йеза спортчилириниң утуғи

Рашидәм РӘҺМАНОВА,
«Уйғур авази»

Биз жил бешида Әмгәкчиқазақ наһийәси Қизил Шәриқ йезисидики мәшиқләндүргүчиләр Намир Амиров, Турсунмәһәмәт Абдуллаев, Айнур Қасимова вә Полат Данахуновниң паалийити һәм уларниң шагиртлириниң утуқлири һәққидә язған едуқ. Йезида көпчиликниң күч чиқириши вә тиҗарәтчи Аблеким Сәйдуллаевниң ярдими билән кона балилар бағчисиға тәәллуқ мәйданчиниң 15 сотка йеридә спорт зали селинип, жуқурида исимлири аталған мәшиқләндүргүчиләр йеза балилирини әркин күрәш вә аэробикиға җәлип қиливатиду. Спорт зали тәрбийиләнгүчилири һазир наһийәлик, вилайәтлик, җумһурийәтлик, һәтта хәлиқара мусабиқиләргә қатнишип, алдинқи сәптин көрүнмәктә. 
Җүмлидин йеқинда Қазақстандики Балилар жилиға беғишлинип, Алмутида өткән абсолют реал күриши бойичә Қазақстан чемпионатиға Турсунмәһәмәт билән Полатниң шагиртлири иштрак қилип, яхши нәтиҗиләргә еришти. Елимизниң 12 вилайитидин 16 — 18 яшлар арилиғидики 720 яш палван қатнашқан ушбу мусабиқигә Челәк, Байсейит, Қизил Шәриқ вә Май йезилиридин келип, спорт залида тәрбийилиниватқан 22 бала қатнашти. Уларниң арисида маһир оюн үлгилирини көрсәткән Муслим Мәһәмәтимин вә Амир Һебибуллаев өз салмақ дәриҗилиридә І орунни егиләп, чемпион аталди. Шундақла Дилшат Маһмут, Адиләм Үсәнова, Адилҗан Савут ІІ орундин көрүнсә, Темирлан Даниярулы вә Арафат Нурмәһәмәтов ІІІ орунға еришти. 
Мәзкүр турнир ғалиплири Уфа шәһиридә өтидиған Евразия чемпионатиға йолланма алди. Ишинимизки, яш палванлар бу қетимму көпчилик тәрипидин қоллап-қувәтләшкә егә болуп, йәнила чоң утуқлар билән бизни хошал қилидиған болиду. 

Әмгәкчиқазақ наһийәси.