• Әхбаратлар еқими
• 07 Желтоқсан, 2022

Болғариялик нахшичи ғалип чиқти

Астанада Қазақстан вә СССР хәлиқ артисти, Халық Қаһарманы, нахшичи Роза Бағланова намидики хәлиқара вокалистлар конкурси аяқлашти.
Баш мукапат үчүн Қазақстан, Түркия, Өзбәкстан, Татарстан, Польша, Болғария, Қирғизстан вә Беларусь Җумһурийитидин 18 – 35 яш арилиғидики иҗрачилар күч синашти.
12-октябрьдин 20-ноябрьғичә онлайн шәкилдә өткән таллавелиш басқучида 48 тәләпнамә қобул қилинди. Униң йәкүни бойичә конкурсниң финал қисмиға 21 иҗрачи өтти. 
– Бийил биз надир намайәндә вә көрнәклик нахшичи Роза Бағланованиң 100 жиллиғини атап өтүватимиз. Хәлиқ сөйгән нахшичиниң юбилейи ЮНЕСКОниң хатирилик сәнәләр календариға киргүзүлди, әйнә шуниңға мунасивәтлик нурғунлиған, шу җүмлидин Париж вә Москвада чарә-тәдбирләр уюштурулди. Бу тизимда вокалистлар конкурси алаһидә орун егиләйду. Униң өткүзүлүши – һазирқи иҗрачиларниң Роза Тәҗибайқизиниң талантини етирап қилишиниң ярқин көрүнүши, – деди Мәдәнийәт вә спорт министрлиги Мәдәнийәт комитети рәисиниң орунбасари Данияр Алиев конкурсантларни мукапатлаш мәрасимида.
Шундақ қилип, Болғариядин кәлгән нахшичи Славея Иванова конкурс ғалиби аталди. Униңға баш мукапат – икки миллион тәңгә мукапат пули тапшурулди. Конкурсниң башқа ғалиплири һәққидә ейтаримиз мундақ: I орун – Алмагүл Батталиева (Қазақстан) – 750 000 тәңгә; I орун – Бек Исраилов (Қирғизстан) – 750 000 тәңгә; II орун – Михал Качмарек (Польша) – 500 000 тәңгә; II орун – Қымбат Жамбылбек (Қазақстан) – 500 000 тәңгә; III орун – Ерназар Жубан (Қазақстан) – 250 000 тәңгә; III орун – Бақберген Азамат (Қазақстан) 250 000 тәңгә.
Униңдин ташқири Роза Бағланованиң оғли Тәжен Бағлановниң вә Қазақстан Җумһурийити Мудапиә министрлиги эстрада-симфониялик оркестриниң бәдиий рәһбири Дархан Рақымғалиевниң намидин мәхсус мукапатлар тапшурулди.