• Сәнъәт
• 14 Желтоқсан, 2022

Уссул шәйдалири

Йолдаш МОЛОТОВ, 
«Уйғур авази»

Кейинки жилларда яшлиримизниң сәнъәткә болған иштияқи ашмақта. Җай-җайларда тәшкил қилиниватқан сәнъәт өмәклиридә тәрбийилиниватқан яшлар сәнъәт йолида яхши утуқларға йетиватиду. Әйнә шундақ сәнъәткарларни тәрбийиләватқан ижадий коллективларниң бири — әҗайип талант егиси Мунира Сапарбаева асасини салған «Аманнисихан» уссул ансамблидур. 
«Аманнисихан» 2012-жили Алмута шәһиридики “Достлуқ” микрорайонида тәшкил қилинған еди. Қисқа вақит ичидә бу ансамбль сәнъәтхумарлар арисида чоң аммибаплиққа егә болушқа башлиди. 2019-жили болса, ансамбльниң бәдиий рәһбири Малика Мамутованиң рәһбәрлигидә Узунағаш йезисида униң шөбиси ечилди. Көп өтмәйла мошу йәрдә тәрбийиләнгән яш уссулчилар һәрхил җумһурийәтлик конкурсларда өз һүнәрлирини көрситишкә башлиди. Мәсилән, улар «Little stars», «Wow bu», «Champ Summer bu best», «Your bu best» охшаш җумһурийәтлик уссул конкурслирида мукапатлиқ орунлардин көрүнди. Малика Мамутова болса, «Әң яхши хореограф» атиғини елишқа муйәссәр болди.  
Бийил язда «Аманнисахан» ансамбли Узунағаш йезисида дәсләпки һесават концертини өткүзүп, тамашибинларниң алқишлириға еришти. 
Мана йеқинда, йәни 10-декабрь күни «Аманнисахан» уссул ансамбли җумһурийәтлик «Самғау» фестивалиға қатнашти. Униңда ансамбльниң кичик вә чоң топлирики уссулчилар һүнәрлирини намайиш қилди. Фестиваль йәкүни бойичә һәр икки топ биринчи орунни егиләп, утуққа йәтти. Ансамбль рәһбири Малика Мамутова сәнъәт тәрәққиятиға қошқан үлүши үчүн мәхсус мукапат билән тәғдирләнди.