• Сәнъәт
• 12 Қаңтар, 2023

Сәнъәт вә билим фестивали

Өткән һәптидә Алмутидики «Almaty Tovers» бизнес-мәркизидә «Бейбітшілік әлемі» хәлиқара Қазақ иҗадий бирләшмисиниң вә «Таланттар академиясы. KZ.» мәркизиниң уюштуруши билән Алмута вә Алмута вилайити мәктәплиридә билим еливатқан оқуғучилар арисида иҗадий конкурс өтти. Униңға Алмута шәһирдики 42- вә 131-мәктәплириниң, Талғир шәһиридин 24-мәктәпниң вә Әмгәкчиқазақ наһийәси Қаратуруқ йезисидики А.Саттаров намидики мәктәпниң оқуғучилири қатнашти.
— Бу фестивальни өткүзүштики асасий мәхситимиз – талантлиқ яшларниң иҗадий издинишини рәғбәтләндүрүш, — дәйду «Таланттар академиясы. KZ.» мәркизиниң президенти Аят Мылтықбаев. — Фестивальниң шиари – «Жаса, жайна Қазақстан». Оқуғучилар тәсвирий сәнъәттә, музыка әсваплирини челишта, хореографияда, роботехникида, эссе йезиш конкурсида, шеирларни қазақ, рус, инглиз тиллирида ипадилик оқуш бойичә өз һүнәрлирини намайиш қилди. Уларниң әмгәклирини баһалаш үчүн биз жюриға ҚҖ хизмәт көрсәткән әрбаби Өскен Ташеновни, «Bogema.asia» бирләшмисиниң вице-президенти Алма Нутушевани тәклип қилдуқ. Фестивальға қатнашқан барлиқ оқуғучилар наһайити талантлиқ екән. Уларниң келәчигидин үмүтимиз зор. Әлвәттә, уларни мошу фестивальға тәйярлиған муәллимләрниң әмгигини алаһидә қәйт қилиш керәк.
          Тәкитләш лазимки, фестивальға, умумән, 45 оқуғучи иштрак қилди. Уларниң нурғуни өз номинациялиридә мукапатлиқ орунларни егилиди. Мәсилән, хореография бойичә 42-мәктәпниң оқуғучилири һәдә-сиңил Камила вә Дилдара Ниязовалар «Чинә тәхсә» уссулини ойнап, Баш мукапат – Гран-приға егә болди. Мошу мәктәпниң йәнә бир оқуғучиси Данелия Пәрһатҗанова болса, рәссамлар конкурсида ғалип чиқти. 
       Келәчәктә бу фестивальни йәнә давамлаштуруш мәхсәт қилинмақта.

Пәйзиләм ВАҺИТОВА, 
муәллим, Қазақстан Педагогика пәнлири академиясиниң әзаси.