• Әхбаратлар еқими
• 11 Мамыр, 2023

Халинурға ақ йол!

Көплигән хәлиқара вә җумһурийәтлик көрүкләрниң ғалиби, Шинҗаң-Уйғур Автоном Районида өткән «Үрүмчи уссул сәһниси» хәлиқара сәнъәт конкурсиниң лауреати Халинур Зулиярқизи Сабированиң рәһбәрлигидики «Илһам» уссул студиясиниң «Баһар илһами» намлиқ дәсләпки һесават концерти болуп өтти. 

Халинур кичигидинла уссулға иштияқ бағлиған ичидә оти бар, тиришчан қиз. Бу концертни уюштурушқа у интайин көп күч чиқарди. Үч яшлиқ балилардин тартип, чоңларғичә уссул үгитип сәһниләштүрди. Бу оңай иш әмәс, әлвәттә. Шундиму, Халинур яшлиғиға қаримай, чоң ишни атқуруп, кичигидин алға қойған арман-мәхситигә йәтти. Бу бүгүнки яшлар үчүн үлгә вә стимул. Үч жил бурун қурулған уссул студиясиниң қол йәткүзгән утуқлири аз әмәс, кичик юлтузчилар сәһнидә өзлирини әркин тутуп, талантини намайиш қилалиди. «Илһам» уссул студиясиниң хореографи Руслан Әхмәтҗаноғлиниң шагиртлири орунлиған уссуллар тамашибин қәлбидин орун алди. Концертниң меһмини, хәлқимизниң сөйүмлүк нахшичиси Санийәм Исмайил яш талантларни қоллап-қувәтләш нийитидә гөзәл нахшисини яңратти. Шундақла кәч меһманлири Меликәм Йәһиярова рәһбәр-лигидики «Малика» уссул студияси, Абдуманап Махмутҗан рәһбәрлигидики шоу-балет «Рухсан» иҗрасидики уссулларни тамашибинлар чоң алқишлар билән қобул қилди. Клара Шардинова рәһбәрлигидики «Ишбиләрмән аяллар» клуби, «Пәрваз» уйғур иҗрачилар бирләшмиси йәнә бир яш талантниң өсүп, өрлишигә өз төһписини қошти дәп ейтсақ, мубалиғә болмас. 
Концерт ахирида сөз алған Халинурниң момиси нәврисиниң меңишни билмәй туруп, икки қолини көтирип, уссул ойниғанлиғини ейтип, һазир уни чоң сәһниләрдин көрүп, һаяҗанлиниватқанлиғини йәткүзди.
 Халинур 5-6 яш чағлирида маһир уссулчи, Қазақстанниң хизмәт көрсәткән артисти Гүлнарә Сайитованиң иҗадий кечилигидә шу яқниң гөдәк чеғини сәһнигә елип чиққан еди. Бу тәсадипи әмәс. Демәк, Халинур қизимизниң армини мәлум дәриҗидә орунланди. Келәчәктә униң техиму йүксәк чоққилардин көрүнүшигә тиләкдашлиқ билдүримиз. 

Гүлназ СӘЙДУЛЛАЕВА.