• Мәшъәл
• 25 Мамыр, 2023

Елена Рыбакина Римда йәнә бир утуққа йәтти

Йәкшәнбә күни Италияниң пайтәхти Рим шәһиридә теннистин WTA 1000 турнири аяқлашти. Аяллар арисидики мусабиқидә Қазақстанниң биринчи ракеткиси Елена Рыбакина ғалип чиқти.

Йолдаш МОЛОТОВ,
«Uiğur avazi»

Тәкитләш лазимки, Е.Рыбакина бу турнирни иккинчи айнилимдин башлиған еди. Дәсләп италиялик теннисчи Ясмине Поалинини йеңивалди. Иккинчи учришишта Анна Калинская үстидин ғалип чиқти. Новәттә Токио Олимпиадисида күмүч алған Маркета Вондроушовани йеңивалди.
Чарәк финалда дунияниң биринчи ракеткиси 21 яшлиқ Ига Свентик билән учрашти. Польшаниң вәкили Ига Свентик Роллан Гарросниң икки дүркүн чемпиони вә АҚШниң очуқ турнириниң ғалиби аталған күчлүк теннисчи. У WTA мусабиқилиридә 13 қетим утуққа йәткән. Ахирқи икки жилда болса, мошу турнирда баш мукапатни йеңивалған еди. Е.Рыбакина билән И.Свинтекниң учришиши күчлүк риқабәт шараитида өтти. Үчинчи сеттин кейин Ига Свентик җараһәт алғинини банә қилип кортқа чиқмиди. Шундақ қилип, Елена йерим финалға өтүп, Елена Остапенко билән күч синашти. Елена Рыбакина рәқивини 6:2, 6:4 һесави билән утувалди. Финалда болса, Елена украинилиқ теннисчи Ангелина Калинина билән учрашти. Бу учришиш Еленаниң ғалибийити билән башланди. Биринчи сетта 6:4 һесави билән алға чиқти. Иккинчи сетта Елена Рыбакина 1:0 һесави билән алға чиққан еди. Амма рәқиви җараһәт алдим дәп мәйданға чиқмиди. Шундақ қилип, Елена Рыбакина WTA турниридики новәттики утуғиға қол йәткүзди.
 Елена Рыбакина турнир ғалиби сүпитидә 521 754 евро көләмидә мукапат алди, 1000 пай егиләп, дуниявий рейтингта төртинчи орунға көтирилди. Бу Қазақстан теннисида илгири-кейин болмиған утуқ. Әнди мошу һәптидә Парижда Ролан Гаррос турнири башлиниду. Қазақстанлиқ теннисчилар шу мусабиқигә атланди.