• Асасий мақалилар
  • 23 Тамыз, 2023

Дөләт рәһбири Алмутиға кәлди

Дөләт рәһбири өткән һәптидә иш бабидики сәпәр билән Алмута шәһирини зиярәт қилди. Шу күни җәнубий пайтәхтниң тәрәққият мәсилилири бойичә кеңәшмә өткүзди.
Кеңәшмини ечип, Президент өткән жили шәһәр җамаәтчилиги билән учришиши пәйтидә шәһәр тәрәққиятиниң асасий йөнилишлири ениқланғанлиғини тәкитлиди. Шуниңдин кейин Алмутиниң 2030-жилғичә болған тәрәққияти вә Һөкүмәт шәһәрниң 2040-жилғичә беғишланған баш планини бәкитти.
 Тәхминләр бойичә, йеқиндики 20 жил ичидә Алмута аһалисиниң сани 3 миллионға йетиду. Келәчәктә бәш макрозона полимәркәзләр сүпитидә тәрәққий етидиған болиду. Бу мегаполисниң мәркизидики әһвални яхшилашқа вә наһийәләргә чүшидиған еғирчилиқни тәң бөлүшкә имканийәт яритиду.
 Ахирқи 10 жилда шәһәр сүръәтлик, амма қалаймиқан тәрәққий әтти. Алмута территорияси икки һәссигә өсти, бирақ инфрастуктура шәһәр наһийәлиридә бирдәк тәрәққий әтмәйватиду.
— Шәһәр аһалисиниң сани жилиға оттура һесап билән 70 миң адәмгә өсүватиду. Алмутиға оқушқа вә ишқа әтраптики аһалилиқ пунктлардин күндә 500 миң адәм келиду. Һазир инфраструктуриниң мәсилилирини өз вақтида тепип, һәл қилиш лазим, – деди Президент. 
Кеңәшмидә шәһәрниң коммунал, йол-транспорт, иҗтимаий инфраструктуриси мәсилилири, шундақла маарип, экология, медицина саһалиридики мәсилиләрни һәл қилиш һәққидә гәп болди.
Дөләт рәһбири тәкитлигинидәк, Алмута тәрәққиятиниң асасий мәсилилирини һәл қилиш системилиқ чариләрни қобул қилиш тәләп қилиду.
Йеқинда «Ақкент» микрорайонида көпқәвәтлик өйдә йүз бәргән от кетиш вақиәсини тәкитләп, Президент, шәһәрдики өрт бехәтәрлиги мәсилиси әһвалини тәнқит қилди. Пәвқуладдә әһваллар министрлигигә аһалиға от кәткәндә һәрикәтләр тоғрилиқ мәлуматлар бериш үчүн мәшиқләрни өткүзүшни, Һакимийәткә отқа қарши хизмитиниң маддий-техникилиқ базисини яхшилаш бойичә чариләрни қобул қилишни тапшурди.
Дөләт рәһбириниң пикричә, Алмутиниң экологиялик әһвалини яхшилаш үчүн шәһәрдә транспорт һәрикитини рәтләш вә электромобильлар үчүн инфраструктурини тәрәққий әткүзүш лазим. Бу мәсилигә мунасивәтлик шәһәр һакими Алмутиниң җәмийәтлик транспортини 2025-жилниң ахириғичә толуқ экологиялик стандартларға көчириш планланғанлиғини тәкитлиди. Униңдин ташқири, һаҗәт инфраструктурини тәрәққий әткүзүш арқилиқ аһалини электромобильларни сетивелишини рәғбәтләндүрүш мәхсәт қилинмақта.
 Президент Алмутиниң инженерлиқ инфраструктурисиға алаһидә тохталди. Униң ейтишичә, һазир елимиздә ичимлик су билән тәминләш мәсилиси җиддий туриду. Әмәлият көрсәткинидәк, Алмутиму буниңдин истисна әмәс. Президентниң пикричә, кейинки пәйтләрдә мегаполиста суниң тохтап қелиш тоғрилиқ мәсилини дәрһал һәл қилишни тәләп қилиду. Тағ дәриялиридин сәл кетиш, суниң паскинилишиши җиддий мәсилә екәнлигини ейтти. Шу сәвәптин коммунал хизмәтлири шәһәрниң жуқарқи районлирида июль ейиниң ахирилирида суни чәкләшкә мәҗбур болди. Ақивәттә, Медев наһийәсидики 50 көпқәвәтлик өй, 4 миң шәхсий өй сусиз қалди. Бу әһвал аһалиниң наразилиғини пәйда қилди. Президент су саһасидики мәсилиләрни һәл қилидиған асасий йөнилишләрни көрситип бәрди. Җүмлидин Һөкүмәт вә һакимийәт октябрь ейиниң ахириғичә Қарғалы су жиғиш иншаитини ишқа қошуши, Алмутиниң су егилигини толуқ ревизия қилиши, шәһәрниң жуқарқи тәрипини су билән тәминләш үчүн йәрасти су мәнбәлирини тепиши, «Балхаш» станциясидики төрт скважина қурулушини аяқлаштуруши лазим. 
 Дөләт рәһбири аһалиниң иҗтимаий шараитини яхшилаш мәсилисигә алаһидә тохтилип, NEET категориясидики яшлар арисидики ишсизлиқ мәсилисини һәл қилишниң муһимлиғини қәйт қилди. Һөкүмәткә вә һакимийәткә яшларни иш билән тәминләш бойичә мәхсус программини тәйярлаш тапшурулди.
Дөләт рәһбири диққәт бөлгән йәнә бир муһим мәсилә – Алмутидики саламәтликни сақлаш системисидики әһвал. Президентниң ейтишичә, һазир шәһәрниң нурғунлиған медицина мәһкимилири өзлириниң имканийәтлиридин артуқ еғирчилиқ билән ишләватиду. Иҗтимаий медицинилиқ ғәмсизләндүрүш вә шәхсий-дөләт һәмкарлиғи лайиһәлири даирисидә конириған инфраструктурини йүксәлдүрүш һаҗәт. Президент Саламәтликни сақлаш министрлигигә медицина мәһкимилирини мәбләғ билән тәминләш бойичә комплекслиқ чариләрни қобул қилишни тапшурди. 
Униңдин ташқири, кеңәшмидә Алмута ихтисадини диверсификацияләш мәсилиси муһакимә қилинди. Қ.Тоқаев кичик вә оттура тиҗарәтниң тәрәққият истиқбалини жуқури баһалиди. Мәлуматлар бойичә, 2022-жил Алмута мәмликәт бюджетиға 4 триллион тәңгә чүшәргән. Уларниң көп қисмини кичик вә оттура тиҗарәт ширкәтлири тәминләйду. 
Дөләт рәһбири мегаполиста тиҗарәт шараитини яхшилаш үчүн системилиқ чариләрни қобул қилиш вәзиписини қойди. Шәхсий капитални җәлип қилиш, тиҗарәтни тәрәққий әткүзүш, транспорт-логистикилиқ мәркәзләрни қурушни қоллаш үчүн шараитларни яритиш, креатив индустрия вә туризмни тәрәққий әткүзүш Алмутиниң тәрәққиятиға йеңи сүръәт бериду, дәп тәкитлидии Президент. 

869 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы