• Әхбаратлар еқими
• 31 Тамыз, 2023

Һөрмәт билән ишәнчигә асасланған һәмкарлиқ

Дөләт рәһбири Қасым-Жомарт Тоқаевниң тәкливи билән 25-26-август күнлири Таҗикстан Президенти Эмомали Рахмон иш бабидики сәпәр билән Астанада болди. Таҗикстан Президентиниң елимизгә сәпири кичик тәркиптики музакириләрдин башланди.
 Президент Қ.Тоқаев иккитәрәплимә һәмкарлиқни күчәйтиш үчүн бу сәпәрниң әһмийити зор екәнлигини тәкитлиди.
— Сизниң сәпириңиз бизниң қериндаш әллиримиз арисидики достлуқ мунасивәтләрни буниңдин кейинму тәрәққий әткүзүш турғусидин зор әһмийәткә егә. Дөләтлиримиз арисидики стратегиялик һәмкарлиқ дейишкә асас бар. Астанадики таҗик мәдәнийити күнлири ечилишиға келишиңизниң өзи көп нәрсини намайиш қилиду, — деди Президент.
 Өз новитидә, Эмомали Рахмон көрситилгән һөрмәт үчүн миннәтдарлиғини изһар қилди.
— Һөрмәтлик Қасым-Жомарт Кемелулы, тәкливиңизгә, меһмандостлуғиңизға көп рәхмәт. Биринчи новәттә, Сиз билән икки әл арисидики мунасивәтләрниң әһвали һәм келәчиги, шундақла хәлиқара вә регионлуқ мәсилиләрни муһакимә қилғум келиду, — деди Таҗикстан Президенти.
Шуниңдин кейин музакириләр икки әлниң делегация әзалири қатнишиши билән өтти. 
Қ.Тоқаев Таҗикстан билән достлуқ мунасивәтләрни елимиз жуқури баһалайдиғанлиғини ейтти. Дөләт рәһбири барлиқ саһалардики иккитәрәплимә мунасивәтниң, шуниң ичидә, су вә энергетика косплексидики өзара һәрикәтләрниң сүръәтлик тәрәққий етиватқанлиғини қәйт қилди. Шундақла Президент, Таҗикстан Президенти Эмомали Рахмонниң май ейида Қазақстанға болған сәпири пәйтидә имзаланған Қазақстан билән Таҗикстан арисидики иттипақдашлиқ өзара һәрикити тоғрилиқ декларацияниң утуқлуқ әмәлгә ашурулуватқанлиғини тәкитлиди. Президентниң ейтишичә, бийил 6 айда товар айнилими 500 миллион доллардин ашқан. Әнди өзара сода-сетиқ көләмини 2 миллиард долларға йәткүзүш планлиниватиду. 
Таҗикстан Президенттиму иккитәрәплимә һәмкарлиқниң һазирқи әһвалиға жуқури баһа бәрди. 
Сөһбәт давамида сода-сетиқ, транспорт-логистика, йеза егилиги, энергетика, малийә вә мәдәний-гуманитарлиқ саһалардики өзара һәрикәтләрни буниңдин кейинму тәрәққий әткүзүш истиқбаллири муһакимә қилинди.
 Музакириләрдин кейин Дөләт рәһбәрлири Таҗикстанниң Қазақстандики мәдәнийәт күнлириниң ечилиш тәнтәнисигә қатнашти. Мәзкүр чарә-тәдбир икки дөләт арисидики дипломатиялик мунасивәтләрниң 30 жиллиғиға беғишлинип уюштурулған. 
 Мәрасим давамида икки дөләт «Астана Опера» театрида уюштурулған Таҗикстан хәлиқ иҗадийитиниң көргәзмисини арилап чиқти. Шуниңдин кейин президентлар Таҗикстан сәнъәткарлириниң концертини тамашә қилди. Таҗикстаннниң Қазақстандики мәдәнийәт күнлири 23 — 26-август арилиғида өтти. Чарә-тәдбир даирисидә таҗик кинематографистлириниң гөһири һесапланған «Рустам билән Сухроб» бәдиий фильми көрситилди. Шундақла Қасым-Жомарт Тоқаев билән Эмомали Рахмон Астанада 2022-жили қәд көтәргән баш мечитқа барди. 
 Көргәзмә-йәрмәңкидин кейин Қ.Тоқаев билән Э.Рахмон Рәқәмлик һөкүмәт идарисигә кәлди. 
 Икки дөләт рәһбәрлиригә ІТ-қарарлар тонуштурулди. Рәқәмлик тәрәққият, инновацияләр вә аэрокосмос санаити министри Бағдат Мусин президентларға дөләт органлириниң гражданлар билән нәтиҗидар алақә орнитишиға шараит яритидиған ІТ-платформилар һәққидә мәлуматлар берилди. Шуларниң ичидә бала дунияға кәлгәнлигини тиркәш үчүн һөҗҗәт беришқа, шундақла қозғалмайдиған мүлүк вә транспортни рәсмийләштүрүшкә проактив илтимас беришниң үлгилири намайиш қилинди. 
Президентларға гражданларниң әризә беришигә беғишланған е-Otinish платформиси вә йәрни пайдиланғучи субъектларниң хизмитидики ашкарилиқни тәминләшкә, шундақла пайдилинилмиған йеза егилиги йәрлирини ениқлашқа мүмкинчилик беридиған космостин мониторинг жүргүзүш системиси тонуштурулди. 
Шуниң билән биллә Қазақстан вә Таҗикстан президентлириға «Аилиниң рәқәмлик хәритиси» лайиһисини әмәлгә ашуруш җәрияни намайиш қилинди. Бу лайиһә – тәркивигә иҗтимаий паравәнликниң 100 көрсәткүчи вә мәркизий дөләт органлириниң 20 әхбаратлар фонди киридиған бирпүтүн мәнбә. Мәнбә барлиқ аилини паравәнликниң бәш дәриҗиси бойичә бөлүшкә вә уларға проактив шәкилдә ярдәм көрситишкә имканийәт бериду.
 Учришиш нәтиҗиси бойичә Өзара чүшәнчә тоғрилиқ Меморандум имзаланди. Бу һөҗҗәт даирисидә Қазақстанниң Рәқәмлик тәрәққият, инновация вә аэрокосмос санаити министрлиги Таҗикстанниң Санаәт вә йеңи технологияләр министрлиги билән электронлуқ һөкүмәт платформисини әмәлгә ашуруш тәҗрибиси билән бөлүшиду.
 Шундақла һәмкарлиқ даирисидә таҗик мутәхәссислири Қазақстанниң илғар ІТ-мәктәплири билән илмий-тәтқиқат институтлирида оқутуш имканийити қараштурулиду. Эмомали Рахмон Таҗикстанда рәқәмлик технологияләрни тәрәққий әткүзүш ишини қоллап-қувәтлигини үчүн Қасым-Жомарт Тоқаевқа миннәтдарлиқ изһар қилди.