• Спорт
• 15 Мамыр, 2024

Қазақстан дәсләпки «бәшликтә»

Өткән һәптидә Астанада дзюдодин дуниявий Qazaqstan Barysy Grand Slam мусабиқиси аяқлашти. Пайтәхтимиздә өткән бу турнирға дунияниң 84 дөлитидин 450 спортчи қатнашти. Мәзкүр мусабиқә Парижда өтидиған язлиқ Олимпиада оюнлири һарписидики ахирқи Grand Slam басқучи болди. 
 Қазақстан талланма командиси мусабиқидә 1 алтун, 3 бронза медалини йеңивелип, умумий командилиқ һесапта дәсләпки «бәшликкә» кирди. Йәни Япония, Италия, Хитай вә Хорватия командилиридин кейин бәшинчи орунни егилиди.
 Тәкитләш лазимки, мусабиқиниң биринчи күни 48 килограмм салмақ дәриҗисидә Ғалия Тынбаева ғалип чиқти. Қошумчә қилсақ, бу утуқ Ғалияниң Grand Slam сериясидики дәсләпки медали. Қазақстан командисидин Елдос Сметов (60 кг.), Бақытжан Абдурахманов (73 кг.) вә Абылайхан Жубаназаров (81кг.) бронза медалини йеңивалди. Аяллар арисида 70 килограмм салмақ дәриҗисидә һүнәр көрситидиған Екатерина Токарева 5-орунға егә болди. 
 Хәлиқара дзюдо федерациясиниң қаидилиригә мувапиқ, мусабиқә ғалиплири вә мукапатлиқ орунларға егә болған спортчиларға дуниявий вә олимпиадилиқ рейтинг пайлири бөлүниду. Биринчи орун — 1000, иккинчи орун — 700, үчинчи орун 500 пай алиду.
 Мәлумки, Астанадики Ж.Үшкемпиров намидики йәкму-йәк спорт сарийида дзюдодин дунияда атақлиқ спортчилар Олимпиада чемпионлири Акира Соне (Япония), Рафаэля Сильва (Бразилия), Аарон Вольф (Япония) билән Хасан Халмурзаев (AIN), дуния чемпионатлириниң ғалиплири вә мукапатлиқ орунға егә болғанлар Криста Дегучи (Канада), Тсогтбаатар Цендочшир (Моңғолия), Джордж Фонсека (Португалия), Валид Кьяр (Франция), Тацуру Саито (Япония), Grand Slam чемпионлири Достон Розиев (Өзбәкстан), Элиос Манци (Италия), Барух Шмаилов (Израиль) охшаш спортчилар һүнәр көрсәтти. 
 Тәкитләш лазимки, Qazaqstan Barysy Grand Slam мусабиқисиниң йәкүнлири бойичә 19 — 24-баһар күнлири арилиғида Абу-Дабида өтидиған дуния чемпионатиға қатнишидиған Қазақстан талланма командисиниң тәркиви ениқлиниду.