• Асасий мақалилар
• 13 Маусым, 2024

Мунасивәтләр жуқури дәриҗидә тәрәққий етиватиду

Қазақстанға дөләт сәпири билән кәлгән Корея Җумһурийитиниң Президенти Юн Сок Ёлни «Ақорда» резиденциясидә тәнтәнилик рәвиштә қарши елиш рәсмийити өтти.
 Дәсләп Қасым-Жомарт Тоқаев билән Юн Сок Ёл бир-биригә рәсмий делегация әзалирини тонуштурди. Андин Пәхрий қаравулниң башлиғи дөләт рәһбәрлиригә рапорт берип, икки дөләтниң гимнлири орунланди. 
Тәнтәнилик қарши елиш рәсмийитидин кейин президентлар кичик тәркиптә музакириләр жүргүзүш үчүн Шәриқ залиға кәлди.
 Қасым-Жомарт Тоқаев өзиниң тәкливини қобул қилип, елимизгә кәлгини үчүн кореялик кәсипдишиға миннәтдарлиқ изһар қилди. Шундақла буни икки әл арисидики һәмкарлиқни күчәйтишкә дегән сәмимий нийәтниң ениқ көрүнүши дәп баһалайдиғанлиғини қәйт қилди.
— Бүгүнки сәпәрниң икки тәрәп үчүн әһмийити зор. Корея Җумһурийити – биз үчүн ишәшлик һәм стратегиялик шерик. Икки мәмликәтниң достлуқ әнъәнигә асасланған мунасивәтләрниң йилтизи чоңқур. Биз барлиқ дәриҗиләрдә зич мунасивәтләр орнаттуқ. Күн тәртивидики мәсилиләр конструктив һәл қилиниватиду. Һазир икки мәмликәт арисидики товар айнилиминиң көләми 6 миллиард долларға йәтти. Бу — умумий күч-ирадимизниң йемиши. Кәңдаирилик ихтисадий лайиһиләрни әмәлгә ашурдуқ. Инвестициялик һәмкарлиқ жилдин-жилға күчийиватиду. Һазир Қазақстанда Җәнубий Кореяниң капитали бар 700дин ошуқ бирләшкән кархана ишләватиду. Қазақстандики корей диаспориси бу җәриянда муһим роль ойнайду. Униң икки хәлиқни бағлаштуруватқан алтун көрүк дейишкә болиду. Биз мошу утуқлиримизни ашуруп, қазақ-корей һәмкарлиғини йеңи дәриҗигә көтиришкә мәнпийәтдар. Бу сәпәр икки әлниң һәмкарлиғиға йеңи сүръәт беридиғанлиғиға ишәнчим камил, — деди Қасым-Жомарт Тоқаев. 
 Өз новитидә Юн Сок Ёл икки дөләт арисидики стратегиялик һәмкарлиқниң 15 жиллиғи һарписида Қазақстанға сәпәр билән кәлгинигә хошал екәнлигини тәкитлиди.

— Һазир мәмликәтлиримиз арисидики мунасивәтләр жуқури дәриҗидә тәрәққий етиватиду. Нурғунлиған кореялик ширкәтләр Қазақстан ихтисадиға инвестиция селип, иш орунлириниң ечилишиға вә санаәтниң тәрәққий етишигә тәсир қилмақта. Униңдин ташқири, кореялик инвесторлар Чоң Алмута айланма автомобиль йоли, һо-газ электр станциясиниң қурулуши охшаш чоң лайиһиләргә қатнишип, Қазақстанниң инфрақурулумини тәрәққий әткүзүшкә үлүшлирини қошуп кәлмәктә. Биз әһмийәтлик хам әшияларни қайта ишләш, атом энергетикиси, йеңилинидиған энергия мәнбәлири охшаш истиқбали бар йөнилишләр бойичә һәмкарлиқни күчәйтишкә мәнпийәтдар. Умумән, икки дөләтниң һәмкарлиғиниң упуқлирини кәңәйтидиған вақит кәлди. Мошу сәпәр алдида Һөкүмәт Кореяниң Мәркизий Азия әллири билән һәмкарлиғи тоғрилиқ K-Silk Road тәшәббусини елан қилди. Бу – Кореяниң Мәркизий Азиягә мунасивәтлик дәсләпки дипломатиялик стратегияси, — деди Корея Җумһурийитиниң президенти. 
 Музакириләр давамида Қасым-Жомарт Тоқаев билән Юн Сок Ёл икки әл арисидики мунасивәтләрни кәңәйтилгән стратегиялик һәмкарлиқ дәриҗисигә көтиришкә мәнпийәтлар екәнлигини қәйт қилишти. Шундақла мошу алақиләрни сәясий, сода-ихтисадий вә мәдәний-гуманитарлиқ һәмкарлиқниң ениқ йөнилишлири бойичә буниңдин кейинму күчәйтишкә өзара нийәт билдүрди. 
 Униңдин ташқири, президентлар регионлуқ вә дуниявий күн тәртивидики мәсилиләр бойичә һәртәрәплимә пикир алмаштурди. Қасым-Жомарт Тоқаев Қазақстан билән Кореяниң хәлиқара дәриҗидики нурғунлиған мәсилиләргә мунасивәтлик мәвқәси охшаш екәнлигини қәйт қилип, дуниядики геосәясий зиддийәтләрниң һәл қилинишиға икки әл оттура державилар сүпитидә өз үлүшлирини қошалайдиғанлиғини ейтишти.