• Әхбаратлар еқими
• 11 Шілде, 2024

Президент Түркий дөләтләр тәшкилатиниң нарәсмий саммитиға қатнашти

Президент Қасым-Жомарт Тоқаев Түркий дөләтләр тәшкилатиниң нарәсмий саммитиға қатнашти. Дөләт рәһбири дуниявий бехәтәрлик билән турақлиқни тәминләшниң елимизниң ташқи сәяситидики асасий бесимлиқниң бири екәнлигигә тохтилип, түркий хәлиқләрниң һәрқачан өмлүктә болуши керәклигини ейтти.
 Президент өз нутқида, әң авал, саммитниң «Транспорт, коммуникация вә климатлиқ өзгиришләрни назарәт қилиш арқилиқ парлақ келәчәк қуруш» дегән мавзуси барлиқ мәмликәтләрниң мәнпийитигә мувапиқ келидиғинини атап өтти. Шундақла мәзкүр баш қошуш түркий дөләтләрниң мәнпийитини көзләйдиғанлиғиға, тәрәққиятниң тиң йөнилишлирини ениқлайдиғиниға вә қериндашлиқ мунасивәтни мустәһкәмләп, тәвәдики турақлиқни тәминләшкә тәсир қилидиғанлиғиға нәзәр ағдурди. 
Қасым-Жомарт Тоқаевниң ейтишичә, Қазақстан Түркий дөләтлири тәшкилатиниң һазирқи рәиси сүпитидә униң паалийитиниң үнүмлүк болушини халайду.
 – Тәшкилатниң хәлиқара мәртивисини көтиришкә күч салимиз. Бу җәһәттә, «TURKTIME!» шиари даирисидә өзара һәмкарлиқни кәңәйтишни давамлаштуримиз. Шуңғичә 40қа йеқин чарә-тәдбир өткүздуқ. Мәмликәтләр арисидики мунасивәтниң йеңи нуқтилири пәйда болди. Бу – иҗтимаий сәясәт, һоқуқ қоғдаш, билим, технология, инновация вә санаәт кәби саһалар. Шундақла Астанада мизан ейида 5-дуниявий көчмәнләр оюнлири өтиду. Бу – түркийләр мәдәнийитини мупәссәл тәрғип қилидиған муһим чарә-тәдбир. Мошу пурсәтни пайдилинип, қериндаш мәмликәтләрниң спортчилирини ушбу тәнтәнилик мәрасимға қатнишишқа чақиримән, – деди Қазақстан Президенти.
 Дөләт рәһбири аләмшумул бехәтәрлик билән турақлиқлиқни тәминләшниң елимизниң ташқи сәяситидики асасий әвзәлликләрниң бири екәнлигигә тохтилип, түркий хәлиқләрниң дайим инақлиқта болуши керәклигини алаһидә тәкитлтди.
 – Бизниң күч-қувитимиз — бирликтә. Умумән, һәрқандақ тоқунуш билән қаршилиқни йешишниң ялғуз йоли бар. У– конструктив диалог. Мошу җәһәттә рәислигимизниң даирисидә «Медиациягә» алаһидә әһмийәт бериватимиз. Мән Әзәрбәйҗан билән Әрмәнстан мәмликәтлири арисидики течлиқни орнитишқа қаритилған иҗабий җәриянни алаһидә атап өткүм келиду. Биз иҗил-инақлиққа башлайдиған қәдәмләрни толуқ қоллаймиз. Баку билән Ереван арисида течлиқ келишимләрни жүргүзүш үчүн өз мәйданимизни тәвсийә қилишқа һәрқачан тәйярмиз, – деди Қасым-Жомарт Тоқаев.