• Әхбаратлар еқими
• 08 Тамыз, 2024

Грант егилири ениқланди

Илим-пән вә алий билим министрлиги 2024-2025-оқуш жилиға беғишланған билим грантлирини тәхсим қилиш мәсилиси бойичә тәпсилий әхбарат бәрди.
 Министрликниң мәлуматлири бойичә, умумий грант сани бийил 94 миңдин ошуқ. Униң ичидә 78 миң грант – бакалавриат студентлириға, 13 миң грант магистратуриға берилсә, 3 миң грант докторантларға берилиду. 99 пайиз грант 4 жилда дәсләпки қетим толуқ тәхсим қилинса, су кәлкүнидин зәрдап чәккән регионлар учумкарлириға 15 382 грант берилди. 
 Қазақстанда ечиливатқан чәтәллик алий оқуш орунлириниң шөбилири үчүн 1 890 грант бөлүнгән. Униңдин ташқири, 5 000 грант йеза егилиги вә ветеринария мутәхәссисликлири үчүн берилди. 
 Грантларни тайинлаш конкурсиға қатнишиш үчүн 104 миң учумкар һөҗҗәт тапшурған. Бу өткән жил билән селиштурғанда 10 миңға артуқ. Дөләт грантлири җумһурийәтлик комиссия олтиришиниң йәкүнлири бойичә тайинланди. Комиссия тәркивидә ҚҖ Парламент депутатлири, мәнпийәтдар дөләт органлириниң, маарип саһаси кәспий иттипақлириниң, ҚҖ Миллий тиҗарәтчиләр палатисиниң, ҚҖ Алий оқуш орунлири ассоциациясиниң вә җәмийәтлик тәшкилатларниң вәкиллири болди.
 Мәлум болғинидәк, бир грантлиқ орунға әң чоң конкурс «Стоматология» бойичә болди. Бу мутәхәссислик бойичә 35 учумкар 1 орунға талашти. Униңдин кейин «Хәлиқара мунасивәтләр вә дипломатия» (11 адәм), «Тәнтәрбийә муәллимлирини тәйярлаш» (10 адәм), «Тәрҗимә иши» вә «Психология» ( 9 адәм) болди.
 Грантқа үмүт қилғанлар арисида баллар тәң болуп қалған әһвалда айрим әвзәлликләргә егә болидиған 22 миңдин ошуқ учумкар, уларниң ичидә «Алтын белгі» бәлгүсиниң саһиблири, хәлиқара вә җумһурийәтлик олимпиадиларниң ғалиплири, оқуш илғарлири бар. Шундақла грантларни тәхсим қилиш пәйтидә иҗтимаий әһвали начар категориясидики балиларниң квотилириму әскә елиниду. 
 Алий оқуш орунлириға һөҗҗәтләрни тапшуруш 25-томузғичә әмәлгә ашурулиду.