• Асасий мақалилар
• 12 Қыркүйек, 2024

Президент Қостанай вилайитидә болди

Дөләт рәһбири Қасым-Жомарт Тоқаев Қостанай вилайитигә болған иш бабидики сәпири давамида бир қатар чоң санаәт орунлириниң паалийити билән тонушти. Етизлиқларни арилап, деханлар билән учрашти. Шуниң билән биллә «IQostanay smart» мәркизидә болуп, қабилийәтлик балилар билән сөһбәтләшти.
Президент дәсләп Қостанайниң индустриялик территориясидә орунлашқан «KamLitKZ» җавапкәрлиги чәкләнгән йолдашлиғиниң чоюн қуйидиған заводиға кәлди. Дөләт рәһбири бу йәрдики жүк машинилириға беғишланған қошумчә қисимлар санаити билән тонушти. ҖЧЙниң баш мудири Дмитрий Гуртовойниң ейтишичә, завод жилиға 45миң тонна чоюн қуймисини чиқириду. Баһаси 78,2 миллиард тәңгә болидиған лайиһәни әмәлгә ашуруш нәтиҗисидә 500 иш орни ечилди. Кархана рәһбири Президентқа лайиһәни әмәлгә ашурушқа Қазақстан инженерлири билән технологлири қатнишиватқанлиғини ейтти. Заводқа дуниявий дәриҗидики тәҗрибилик  инжиниринг ширкәтлириниң экспертлири билән европилиқ машина ясиғучиларму җәлип қилинған. 
Дөләт рәһбири Қасым-Жомарт Тоқаев Қостанай вилайитидики «КІА» автомобильлирини чиқиридиған заводиниң қурулуш мәйданиға кәлди. Завод қурулуши булту оғуз ейида башланған. Планға мувапиқ конвейердин дәсләпки машина синақ режимида келәр жили чиллә ейида чиқирилиду. 
«Kia Qazaqstan» ширкитиниң баш мудири Ким Дэ Ки Президентқа заводниң 2025-жили оғуз ейида ишқа қошулидиғанлиғини ейтти. Завод дәсләпки басқучта «Sorento» моделини чиқиришни планлаватиду. 2026-жили қәһритандин башлап йеңиланған «Sportage» модели қураштурулиду. Қасым-Жомарт Тоқаев мошу йәрдә әмгәк коллективи билән учрашти. Завод ишчилири Президентниң Қазақстан хәлқигә йоллиған Мәктүбидә көтүрүлгән мәсилиләрни қоллап-қувәтләйдиғанлиғини ейтти. Шундақла, ишчи мутәхәссисләрниң абройини ашурушниң муһимлиғини қәйт қилишти.
Дөләт рәһбири Қостанай наһийәсидики Майкөл йеза округидики «Надеждинка» җавапкәрлиги чәкләнгән йолдашлиқта болуп, йеза егилиги мәһсулатлирини ишләпчиқарғучилар билән учрашти. Президентқа вилайәт һакими региондики йеза егилиги тәрәққий әткүзүш чарилири тоғрилиқ әхбарат бәрди. Қумар Ақсақаловниң ейтишичә, бийил деханлар 5 миллион гектар йәргә ашлиқ тәргән. Элитилиқ тухум үлүши билән минерал оғутларниң чечиш көләмини кәңәйтиш, шундақла машина-трактор паркини йеңилаш арқилиқ ашлиқ егилигиниң мәһсулдарлиғини ашуруш планланмақта. Шундақла, Дөләт рәһбиригә регионда мал вә қуш чарвичилиғи саһалирини тәрәққий әткүзүш тоғрилиқ һесават берилди. Җүмлидин, алдимиздики үч жилда 14 товар-сүт фермисиға инвестиция җәлип қилиниду. Мал чарвичилиғиға ихтисаслаштурулған 44 комплексниң вә икки чоң қуш фабрикисиниң селиниши көздә тутулмақта. Президент «Надеждинка» ҖЧЙниң етизлиқлирини арилап, деханлар билән сөһбәтләшти. 
Дөләт рәһбири регионға сәпири давамида Қостанай шәһиридики тәнтәрбийә-сағламлаштуруш комплексини зиярәт қилди. «Юбилейный» микрорайонида орунлашқан спорт объекти йеқинда пайдилинишқа берилгән. Бу йәрдә балилар спортниң футбол, баскетбол, волейбол, вә үстәл тенниси охшаш түрлири билән шуғуллиниду. Шундақла, мәркәздә мәшиқ вә хореография заллири ишләйду. Алаһидә еһтияҗи бар инсанлар үчүн шараитлар яритилған. 
 Қасым-Жомарт Тоқаев Қостанай шәһиридики балиларға беғишланған   «IQostanay smart» мәркизиниң иши билән тонушти. Һазир бу йәрдә икки миңға йеқин оқуғучи қошумчә билим алиду. Улар үчүн 24 өмәк ишләйду. Оқуғучилар сарийида жуқури технологиялик васитилири билән җабдуқланған киберспорт, инженерия, авиамодельлаш кабинетлири, әслигә кәлтүрүлидиған энергия мәнбәлири, химия вә физика-техникилиқ лабораторияләр, шундақла мәҗлис, оқуш вә хореография заллири бар. Мәркәздики робот техникиси, инженерия вә авиамодельлаш өмәклиригә қатнишидиған балилар Президентқа өз лайиһәлирини, виртуал лабораториядә тәҗрибә ясап көрсәтти. Оқуғучилар Президентқа техникилиқ мутәхәссисликлиригә беғишланған билим грантлирини көпәйткәнлиги үчүн миннәтдарлиқ изһар қилишти.