• Әхбаратлар еқими
• 03 Қазан, 2024

Күчлүк регионлар – әл тәрәққиятиниң драйвери

Мәлумки, Қазақстан Җумһурийитиниң Президенти Қасым-Жомарт Тоқаевниң тапшурмиси билән Миллий ихтисат министрлиги вә бирқатар дөләт органлири тәрипидин «Күчлүк регионлар – әл тәрәққиятиниң драйвери» Миллий лайиһиси ишләнгән еди. У шәһәр һәм йеза турғунлири үчүн асасий дөләт хизмәтлиригә қолйетимлиқни тәминләш, турушлуқ өй-коммуналлиқ әһвални яхшилаш вә турушлуқ өй қурулушини риваҗландуруш, шундақла транспорт алақисини тәминләш арқилиқ гражданлар һаятини яхшилашқа қаритилған.

Рашидәм РӘҺМАНОВА,
«Uiğur avazi»

Миллий лайиһә «Нұрлы жер», «Нұрлы жол», «Ауыл – ел бесігі» программилирини өз ичигә алиду. Ушбу лайиһә нәтиҗиси йеза турғунлирини заманивий инфрақурулумлар билән тәминләш билән биллә уларниң турмуш шараитини яхшилашқа елип келиши керәк.
Алмута вилайитиниң Әмгәкчиқазақ наһийәсидиму мошу Миллий лайиһә асасида 2021 – 2025-жиллирида әмәлгә ашурулидиған ишлар программиси түзилип, бирқатар ишлар әмәлгә ашмақта. У «2016 – 2020-жиллардики Әмгәкчиқазақ наһийәсиниң тәрәққият программисиниң» давами болуп һесаплиниду. Җүмлидин «Жетісу Вольфрамы» җавапкәрлиги чәкләнгән йолдашлиғи тәрипидин 336 гектар йәргә вольфрам рудисини қезиш, ишләпчиқириш вә қайта ишләш комбинатиниң қурулуши аяқлишишқа йеқинлап қалди. Әскә салсақ, «Жетісу Вольфрамы» ХХҖ инвесторлириниң, Jaxin International Resources Investment Limited – Hong Kong ширкитиниң қатнишиши билән Буғути вольфрам рудиси канини санаәт асасида өзләштүрүш лайиһисини әмәлгә ашуруватиду. Униң нәтиҗисидә наһийәдә жилиға 3 300 миң тонна руда қезип, қайта ишләш, 10 миң тонна концентрат, җүмлидин 65 пайиз WO3 концентратини елиш планлиниватиду. Лайиһә толуқ ишқа қошулғанда 500гә йеқин иш орни ечилидиған болиду. 
Йеқинда Алмута вилайитиниң һакими Марат Султанғазиев селиниватқан Буғути вольфрам ишләпчиқириш комбинатида болуп, «Жетісу Вольфрамы» ҖЧЙ рәһбәрлиги билән қурулуш ишлириниң кетип беришини муһакимә қилди. Учришишқа Алмута вилайәтлик мәслиһәтниң кативи Қуат Байғожаев, Әмгәкчиқазақ вә Уйғур наһийәлириниң һакимлири Талғат Байедилов һәм Бота Елеусизова, саһалар рәһбәрлири вә аммивий әхбарат васитилириниң хадимлири қатнашти.
Учришиш давамида «Жетісу Вольфрамы» ҖЧЙ Баш мудири Ван Чжун Вэй инвестициялик лайиһиниң кетип бериши вә комбинатниң асасий йөнилишлири билән тонуштурди. Униң орунбасари Чжао Инфэн су, электр энергияси вә башқиму керәк-яраққа бағлиқ қийинчилиқларға тохталди. Инвесторларниң пикирлиридин кейин Марат Султанғазиев чоң лайиһиниң әһмийитини атап өтти, шундақла уни орунлиғучилириға иккитәрәплимә шәртнамидә көрситилгән вәзипиләрниң орунлинишини илгирилитишни тапшурди.
– Комбинатни ишқа қошуш қәрәли йеқинлишиватиду. Бирақ силәр тәрәпкә қоюлған вәзипиләр орунланмайватиду. Мән илгири бу йәрдә ишләйдиған хадимларни йәрлик турғунлардин тәйярлаш керәк екәнлиги һәққидә бирнәччә қетим ейтқан едим. Амма бу мәсилә техичила һәл болмиди. Биз шәртнамә бойичә 20 жил биллә паалийәт жүргүзүшкә келиштуқ. Вольфрам ишләпчиқириш иши пат йеқинда башланғили туриду. Қазақстанниң қанунлириға мувапиқ, биринчи новәттә, йәрлик турғунлар ишқа елиниши шәрт. Квотиниму инавәткә елиш керәк. Буниңдин икки жил бурун биз силәр билән қазақстанлиқ мутәхәссисләрни тәйярлаш вә оқутуш һәққидә иккитәрәплимә шәртнамә түзгән едуқ. Мән йәнила комбинатни ишқа қошуш вә униң толуқ ишләпчиқириш қувитигә йетиши үчүн квалификациялик ишчилар вә хадимларни тәйярлаш керәк екәнлигини атап өтимән. Бу «Satbayev University» алий оқуш дәргаһида билим еливатқан инженер-техниклардин ташқири қошумчә тәйярлинидиған хадимлар болуши керәк, – деди вилайәт һакими.
Икки әл вәкиллири қурулушни аяқлаштуруш, мәһкиминиң инфрақурулуми вә униң сиртқи инженерлик системисини монтаж қилиш, минераллиқ хам әшияни комплекслиқ ишләпчиқириш мәхситидики инвестиция көләмини кәңәйтиш вә корпоратив сәясәт мәсилилири әтрапида пикирләшти. Марат Султанғазиев ишчиларни озуқ-түлүк вә иш кийими билән тәминләштә йәрлик ширкәтләр вә шәхсий тиҗарәтчиләр билән һәмкарлиқта иш елип бериш һаҗәт екәнлигиниму алаһидә атап өтти. «Жетісу Вольфрамы» ҖЧЙ рәһбәрлиги вилайәт һакиминиң һәммә әскәртишлирини қобул қилип, йеқин арида барлиқ мәсилиләрниң һәл болидиғанлиғини вәдә қилди.
Марат Султанғазиев бизнесниң иҗтимаий әһмийитигиму тохталди.
– Чәтәллик инвесторлар чоң ишләпчиқириш орунлирини ачқанда, иҗтимаий саһалардики муһим мәсилиләрни һәл қилишқиму көңүл бөлиду. Ушбу йөнилиштә Әмгәкчиқазақ вә Уйғур наһийәлириниң рәһбәрлиги билән һәмкарлиқта болуп, маарип, саламәтликни сақлаш, спорт вә мәдәнийәт саһалирини қоллап-қувәтләш керәк. Бу йәрдә йәрлик турғунлар билән хошнидарчилиқ алақилирини қуруш вә иҗтимаий саһаларға болған инвестиция силәрниң ишәшлик шерик вә җавапкәр хошна екәнлигиңларни билдүридиғанлиғини чүшиниш лазим, – деди вилайәт рәһбири.
Делегация әзалири комбинатни толуқ арилап чиққандин кейин Марат Султанғазиев «Жетісу Вольфрамы» ҖЧЙ утуқлар тиләп, қурулуш ишлириниң тез арида тамамлинип, комбинатниң пайдилинишқа берилидиғанлиғиға ишинидиғанлиғини билдүрүп, хошлашти.

Алмута вилайити,
Әмгәкчиқазақ наһийәси