• Әхбаратлар еқими
• 16 Қазан, 2024

Алақиләрниң йеңи басқучи

Ақорда резиденциясидә Қазақстанға рәсмий сәпәр билән кәлгән Әрмәнстан президентини тәнтәнилик қарши елиш рәсмийити өтти. Қасым-Жомарт Тоқаев билән Ваагн Хачатурян бир-биригә рәсмий делегация әзалирини тонуштурди. Пәхрий қаравул башлиғи президентларға рапорт берип, икки мәмликәтниң дөләт гимнлири орунланди. Андин Қасым-Жомарт Тоқаев билән Ваагн Хачатурян музакириләр жүргүзди.
 Дөләт рәһбири Әрмәнстан президентиға һөрмәт көрситип, елимизниң қазақ-әрмән һәмкарлиғини тамамән йеңи дәриҗигә көтиришкә мәнпийәтдар екәнлигини қәйт қилди.
— Бүгүнки шәртнамиләрниң өзара алақиниң күчийишигә тәсир қилидиғанлиғиға ишинимән. Биз қазақ-әрмән һәмкарлиғиниң асаси һесаплинидиған жуқури дәриҗидики учришишлиримизға алаһидә әһмийәт беримиз. Қазақстан Әрмәнстан достлуқ мунасивәтлирини жуқури баһалайду. Қазақ елиниң әрмән хәлқигә болған һөрмити алаһидә. Әрмәнстан – елимизниң ишәшлик һәм вақит синиғидин өткән йеқин шериги. Бизниң хәлиқлиримизни достлуқ, умумий тарих вә охшаш мәдәний-гуманитарлиқ қәдрийәтләр бағлаштуриду. Иккитәрәплимә мунасивәтләрниң барлиқ саһаларда сүръәтлик тәрәққий етиватқанлиғини алаһидә тәкитлигүм келиду, — деди Қ.Тоқаев. 
Дөләт рәһбири бийил Қазақстан билән Әрмәнстан арисидики достлуқ вә һәмкарлиқ тоғрилиқ шәртнаминиң имзаланғанлиғиға 25 жил толғанлиғи нишанлинидиғанлиғини, мошу вақит ичидә кәңдаирилик институционаллиқ база қелиплашқанлиғини ейтти.
— Сода-ихтисадий һәмкарлиқтин ташқири, икки хәлиқ арисидики мәдәний-гуманитарлиқ алақиләр сүръәтлик тәрәққий етиватиду. Булту Ереванда Әрмәнстандики Қазақ театриниң күнлири өтти. Келәр жили силәрниң әлдә Қазақстан мәдәнийитиниң онкүнлүгини уюштуруш планланмақта. Бүгүн сиз билән биллә Әрмәнстанниң Қазақстандики мәдәнийәт күнлириниң тәнтәнилик ечилиш рәсмийитигә қатнишимиз, — деди Президент.
 Өз новитидә, Ваагн Хачатурян Қасым-Жомарт Тоқаевқа меһмандостлуғи үчүн миннәтдарлиқ изһар қилип, Қазақстан билән өзара нәтиҗидар һәмкарлиқни тәрәққий әткүзүшкә мәнпийәтдар екәнлигини ейтти.
— Хасийәтлик қазақ йеригә кәлгинимгә хурсәнмән. Қазақстанниң тәрәққияти билән риваҗлиниш сүръитигә хошал болдум. Икки дөләт арисидики достлуқ мунасивәтләр узақ жиллар давамлишидиғанлиғиға ишәнчим камил. Чүнки униң тарихи чоңқур. Қазақстан – бизниң ишәшлик шеригимиз. Униңдин ташқири, икки дөләт арисидики ихтисадий алақиниң утуқлуқ тәрәққий етиватқанлиғини қәйт қилғум келиду, — деди Әрмәнстан президенти.
Музакириләр давамида тәрәпләр сода-ихтисадий, транспорт-логистика, йеза егилиги, малийә, мәдәний-гуманитарлиқ вә рәқәмләштүрүш саһалиридики һәмкарлиқни күчәйтиш истиқбаллири муһакимә қилинди. Тәрәпләр шундақла региондики вә хәлиқара күн тәртивидики муһим мәсилиләр бойичә пикир алмаштурди. 
 Қасым-Жомарт Тоқаев Қазақстан Әзәрбәйҗан билән Әрмәнстанниң течлиқ келишимгә келиши үчүн Алмута мәйданини келәчәктә тәвсийә қилишқа тәйяр екәнлигини қәйт қилди. 
 Музакириләрдин кейин Қасым-Жомарт Тоқаев билән Ваагн Хачатурян Әрмәнстанниң Қазақстандики мәдәнийәт күнлириниң ечилиш тәнтәнисигә қатнашти вә атақлиқ әрмән режиссери вә рәссами Сергей Параджановниң 100 жиллиқ тәвәллудиға беғишланған фотокөргәзмини зиярәт қилди.