• Әхбаратлар еқими
• 23 Қазан, 2024

Миллий мәйрәм мукапатлар билән башланди

Мәлумки, 25-оғуз күни елимиз Җумһурийәт күнини кәңдаиридә нишанлайду. Җумһурийәт күни – дөлимизниң әң асасий вә бирдин-бир миллий мәйрими болуп һесаплиниду. Тәкитләш лазимки, миллий мәйрәм дәп тарихий әһмийити жуқури, Қазақстанниң дөләтчилигигә алаһидә тәсир қилған сәнәләрни атаймиз. Бу күни, йәни 1990-жили 25-оғуз күни имзаланған Қазақ ССР Алий Кеңишиниң қарариға бенаән, Қазақстан Җумһурийитиниң мустәқиллиги тоғрилиқ декларация қобул қилинди. 2022-жил 29-мизан күни Қазақстан Җумһурийитиниң Президенти Қасым-Жомарт Тоқаев «Җумһурийәт күни» мәйримигә «миллий мәйрәм» мәртивисини бәкитти. 

Йолдаш МОЛОТОВ, 
«Uiğur avazi»

Һазир бу Миллий мәйрәм елимиздә дағдуғилиқ нишанлиниватиду. Мәйрәм һарписида, йәни сешәнбә күни Астанада мәйрәмгә беғишланған «Қастерлі Отан – Қазақстан» намлиқ концерт өтти. Униңға дөләт рәһбири Қасым-Жомарт Тоқаев иштрак қилди. «Астана опера» театрида өткән кәчтә елимиздә тонулған мәдәнийәт әрбаплири билән иҗадий топлар өз сәнъитини намайиш қилди.
 Миллий мәйрәм – Җумһурийәт күни һарписида Президент Қасым-Жомарт Тоқаевниң Пәрмани билән елимизниң иҗтимаий-ихтисадий вә мәдәний тәрәққиятиға, хәлиқләр арисидики достлуқ вә өмлүкни күчәйтишкә қошқан зор үлүши вә актив җәмийәтлик паалийити үчүн бир топ гражданлар дөләт мукапатлири билән тәғдирләнди. Уларниң ичидә билим, саламәтликни сақлаш, мәдәнийәт вә илим-пән әрбаплири, санаәт, тиҗарәт саһалириниң көрнәклик вәкиллири, депутатлар, дөләт вә һоқуқ қоғдаш органлириниң хадимлири, һәрбийләр, спортчилар вә әмгәк ветеранлири бар. 
 Мукапат егилири қатарида 450тин ошуқ әмгәкчи, 137 педагог, 80дин ошуқ алим, 100гә йеқин қутулдурғучи вә пидаий бар. Көрүп туримизки, мукапат алғанлар арисида асасән әмгәк адәмлири. Бу елимиздә әмгәк адимигә болған алаһидә һөрмәтниң йәнә бир дәлилидур. Мошу йәрдә диққәткә сазавәр фактларға көңүл бөлсәк, дәсләпки қетим әмгәкчиләр сулалилири аилә вәкиллири дөләт мукапитиға еришти. Қазақстан тарихида дәсләпки қетим бир вақитта икки педагог вә дәсләпки қетим математик-алим «Қазақстан Еңбек Ері» атиғини алди. Шундақла бийил дәсләпки қетим «Қазақстанның еңбек сіңірген дәрігері» пәхрий атиғи берилди. 
 Тәкитләш лазимки, «Қазақстан Еңбек Ері» атиғи елимиздә илим-пәнниң тәрәққиятиға зор төһпә қошқан, шундақла җәмийәтлик паалийити үчүн Президент йенидики Миллий пәнләр академиясиниң вице-президенти А.Жумадилдаевқа, елимизниң иҗтимаий-гуманитарлиқ тәрәққиятида илғар утуқлири үчүн Алмута шәһири 4-мәхсус мәктәп-интернатниң муәллими Г.Нурпейисоваға, Орал шәһири А.Тайманов намидики 34-мәктәп-гимназияниң муәллими Э.Траисоваға, санаәттики шиҗаәтлик әмгиги үчүн Қариғанда вилайити «Шахтерское» җавапкәрлиги чәкләнгән йолдашлиғиниң мудири Г.Прокопқа берилди. «Отан» ордени билән атақлиқ шаир Н.Оразалин, кардиохирургия вә трансплантология илмий-клиникилиқ мәркизиниң мудири С.Жошыбаев тәғдирләнди. Әнди «Қазақстанның халық әртісі» һөрмәтлик атиғи билән елимизниң атақлиқ мәдәнийәт әрбаплири, кино вә театр актерлири мукапатланди. Шуларниң ичидә Қ.Ғоҗамияров намидики җумһурийәтлик дөләт Уйғур академиялик музыкилиқ-комедия театриниң актрисиси Реһангүл Мәхпирова бар. Шундақла А.Розибақиев намидики 153-мәктәп-гимназияниң мудири Шавкәт Өмәров «Парасат» ордени билән мукапатланди. Пурсәттин пайдилинип, уларни бу утуғи билән сәмимий тәбрикләймиз. 
 Жуқурида ейтқинимиздәк, әмгәк сулалиләр аилиләр вәкиллирини мукапатлаш әнъәниси бийилму давамлашти. Бу қетим муәллимләр, санаәтчиләр, төмүрйолчилар әвлатлири һөрмәткә сазавәр болди.
Қошумчә қилсақ, Алмута шәһиридә Җумһурийәт күни мәйримини нишанлаш даирисидә мәйрәмлик чарә-тәдбирләр өтиду. Мәсилән, қочақ театрлириниң хәлиқара фестивали, сәһниләштүрүлгән қоюлумлар, тәсвирий сәнъәт көргәзмилири, концертлиқ программилар, цирк оюнлири вә башқиму мәдәний чариләр шулар җүмлисидин.