• Әхбаратлар еқими
• 30 Қазан, 2024

Һәмкарлиқниң йеңи упуқлири

Моңғолиягә дөләт сәпири билән барған Қазақстан Президенти Қасым-Жомарт Тоқаевни Улан-Батор аэропортида Моңғолия президенти Ухнаагийн Хурэлсух сәмимий рәвиштә күтүвалди. Тәнтәнә һөкүмәт өйи алдидики Сухэ-Батор мәйданида өтти.
 Учришишта сөзлигән Президент Қасым-Жомарт Тоқаев Ухнаагийн Хурэлсухқа меһмандостлуғи үчүн миннәтдарлиқ изһар қилди. Униң ейтишичә, Моңғолия – Қазақстанниң муһим шериклириниң бири. 
— Һөрмәтлик президент, бүгүн сизниң тәкливиңиз билән Моңғолиягә дөләт сәпири билән кәлдим. Маңа вә Қазақстан делегациясигә бу – чоң һөрмәт. Бүгүн биз иккитәрәплимә муһим һөҗҗәтләргә, җүмлидин Қазақстан билән Моңғолия арисидики стратегиялик һәмкарлиқ орнитиш тоғрилиқ декларацияни имзалаймиз. Бу қәдәм мәмликәтлиримизниң барлиқ дәриҗидики һәмкарлиғини риваҗландурушқа тәсир қилиду. Шундақла икки хәлиқниң мәнпийити үчүн йеңи имканийәтләргә йол ачиду дәп ишинимән, —деди Қ.Тоқаев.
 Өз новитидә, Ухнаагийн Хурэлсух Қазақстан Президентиниң Моңғолиягә дөләт сәпири иккитәрәплимә һәмкарлиқни тамамән йеңи дәриҗигә көтиридиғанлиғини қәйт қилди. 
 Учришиш давамида дөләт рәһбәрлири сәясий, ихтисадий вә инвестициялик алақиларни тәрәққий әткүзүш истиқбаллириға алаһидә әһмийәт бәрди. Шундақла йеза егилиги, тағ-кан, металлургия комплекси, энергетика, транспорт-логистика, малийә саһалиридики мунасивәтләр мәсилилири муһакимә қилинди. 
 Дөләт рәһбири Қ.Тоқаев бирләшкән лайиһиләр билән имзаланған һөҗҗәтләрни сүпәтлик әмәлгә ашурушниң әһмийити зор екәнлигини қәйт қилди. Президентлар хәлиқара вә регионлуқ күн тәртивидики мәсилиләр бойичә пикир алмаштурди.
Андин Қасым-Жомарт Тоқаев билән Ухнаагийн Хурэлсух икки мәмликәт делегация әзалириниң қатнишиши билән кәңәйтилгән тәркиптә музакириләр жүргүзди. 
 Дөләт рәһбири икки дөләт арисидики зич парламентара вә һөкүмәтара мунасивәтләрниң қелиплашқанлиғини ейтип, һәмкарлиқни күчәйтишкә имканийәтләр бар екәнлигини тәкитлиди.
Өз новитидә, Ухнаагийн Хурэлсух Моңғолияниң Қазақстан билән иккитәрәплимә алақиләрниң барлиқ йөнилишлирини күчәйтишкә мәнпийәтдар екәнлигини қәйт қилди. Бүгүн имзаланған шәртнамиләрниң икки дөләт арисидики мунасивәтләрниң йеңи сәһиписини ачидиғанлиғиға ишәнчә билдүрди. 
 Қазақстан Президенти Қасым-Жомарт Тоқаев Моңғолиягә дөләт сәпири даирисидә Моңғолияниң Улуқ Дөләт Хуралиниң рәиси Дашзэгвийн Амарбаясгалан билән учришиш өткүзди. Дөләт рәһбири спикерни вә пүткүл моңғол хәлқини бийил сәпәр ейида парламент сайлиминиң утуқлуқ өтүши билән тәбриклиди. Президент Хуралниң йеңи тәркиви әлдики демократиялик җәриянларниң тәрәққиятиға үлүш қошуп, Моңғолияниң хәлиқара сәһнидики абройини ашурушқа иҗабий тәсир қилидиғанлиғиға ишәнчә билдүрди. 
 Президент Қасым-Жомарт Тоқаев Моңғолия Премьер-министри Лувсаннамсрайн Оюун-Эрдэнэ билән учрашти. Учришишта Дөләт рәһбири алий дәриҗидә келишилгән шәртнамиләрни сүпәтлик әмәлгә ашуруш үчүн икки мәмликәт һөкүмәтлири бирлишип, күч-ғәйритини сәпәрвәр қилиши керәклигини тәкитлиди. Өз новитидә, мәмликәтниң Премьер-министри дөләтләр рәһбәрлири дәриҗисидики қобул қилинған қарарларни Моңғолия һөкүмити орунлашқа тәйяр екәнлигини ейтти.
 Қазақстан Президенти Моңғолиягә дөләт сәпири даирисидә Улан-Батор шәһиридики Чиңғизхан миллий мирасгаһини зиярәт қилди. 2019-жили ечилған мирасгаһ фондида 10 миңдин ошуқ абидә бар. Экспозицияниң асасий қисми улуқ қолбашчи Чиңғизхан шәхсигә беғишланған. Униңдин ташқири, һун дәвридин башлап ХХ әсиргичә Моңғол дөлитиниң қелиплишиш басқучлирини толуқ өз ичигә алидиған артефактлар қоюлған. Дөләт рәһбири мирасгаһни арилап, пәхрий меһманлар китавиға өзиниң иллиқ тилигини қалдурди.