• Спорт
• 18 Желтоқсан, 2024

Чемпионға һөрмәт көрсәтти

Азнат ТАЛИПОВ,
«Uiğur avazi»

Йеқинда 2007-2008-жиллири туғулған қизлар арисида бокстин Қазақстан Җумһурийитиниң чемпионати болуп өтти. Униңда Абдулла Розибақиев намидики 153-мәктәп-гимназияниң 11-синип оқуғучиси Рахмина Абдумеҗитова 52 кг. салмақ дәриҗиси бойичә 1-орунни егилиди. Рахминаниң дадиси Рамиль Һезизов Уйғур наһийәсиниң Ақтам йезисида туғулуп, һазир Алмутида истиқамәт қиливатқан тиҗарәтчи. У шундақла ана жутиға һәқиқий җанкөйәрлик қилип, қолидин келидиған ярдимини айимайдиған сахавәтлик инсан. Рахминаниң чемпион болғанлиғидин хәвәр тапқан ақтамлиқлар Рахминани мәшиқләндүргүчилири Алик Җәлилов билән Азамат Дүйсеновни Ақтамға тәклип қилип, һөрмәт көрсәтти. Йеза округиниң һакими Айдар Көжекбаев яш спортчини йеза турғунлири намидин тәбрикләп, Пәхрий ярлиқ вә соғиларни тапшурди. Бу чарә-тәдбир тәшәббускарлириниң бири Сәйдалим Амутов тиришчан қизниң кәлгүсидә дуния, олимпиада чемпиони болуп, Қазақстан Җумһурийитиниң туғини хәлиқара мусабиқиләрдә егиз көтирип чиқидиғанлиғиға ишәнчә билдүрди. Андин у наһийәлик Уйғур этномәдәнийәт мәркизи йенидики Жигитбашлири кеңишиниң рәиси Нурмәһәмәт Арипов билән чемпион қизға соғиларни тапшуруп, уни бүгүнки пәллигә йәткүзгән мәшиқләндүргүчилириниң үстигә чапан япти. 
Чемпионға һөрмәт көрситиш билән биллә йетиливатқан әвлатни сағлам һаят тәризигә үндәшни нийәт қилған йеза һакими Айдар Көжекбаев, жигитбеши Сабирҗан Қәмәев, жут җанкөйәри Турдихетип Әйсаровниң күч чиқириши вә йеза турғунлириниң қоллап-қувәтлиши билән өткән мәрасим спорт оюнлири билән давамлашти.