• Әхбаратлар еқими
• 13 Наурыз, 2025

Улуқ мутәпәккүрләргә беғишланди

Өткән чаршәнбә күни Алмутидики җумһурийәтлик «Достлуқ өйидә» Алмута шәһәрлик Өзбәк миллий мәдәнийәт мәркизиниң уюштуруши билән Қазақстан хәлқи Ассамблеясиниң 30 жиллиғи даирисидә улуқ Абайниң, шәриқниң улуқ мутәпәккүрлири Әлишер Наваийниң вә Заһиридин Муһәмәт Бабурниң туғулғиниға мунасивәтлик сәнәлиригә  беғишланған «Әсирләр билән аһаңдаш мәнивий мирас» мавзусида «дүгләк үстәл» өтти. Униңға Алмута шәһәрлик этномәдәнийәт мәркәзлириниң, Өзбәкстан Җумһурийитиниң Алмута шәһиридики баш консулханисииң вәкиллири вә студентлар қатнашти. 

Йолдаш МОЛОТОВ, 
«Uiğur avazi»
 
 Мәзкүр «дүгләк үстәлни» Алмута шәһәрлик Өзбәк миллий мәдәнийәт мәркизиниң рәиси Абдулла Исматуллаев ачти.
— Бийил улуқ Абайниң — 180, шәриқниң улуқ мутәпәккүрлири Әлишер Наваийниң — 584 вә Заһиридин Муһәмәт Бабурниң 542 жиллиғи һәм Ассамблеяниң 30 жиллиғи нишанлиниватиду, — деди у. — Бу —һәммимиз үчүн чоң сәнәләр. Исимлири аталған бүйүк намайәндиләрниң бебаһа әмгәклири һазирқи күндиму өз актуаллиғини йоқатмай келиватиду. Шуңлашқа уларни биз әсирләр давамида сақлап, әвлатларға тапшуруп келиватимиз. Елимиз үчүн йәнә бир муһим сәнә – Қазақстан хәлқи Ассамблеясиниң 30 жиллиғи. Һәммимизгә мәлумки, Ассамблея елимидә течлиқ, достлуқ, милләтләрара разимәнликни тәминләп, елимиз тәрәққиятиға чоң төһпә қошуватиду. Қазақстанда яшаватқан барлиқ милләтләр үчүн, җүмлидин өзбәкләр үчүн барлиқ шараитлар яритилған. Биз мошуни яхши чүшинип, яхши билим елип, елимиз тәрәққиятиға биркишилик үлүшимизни қошушимиз шәрт. 
 Андин сөз Өзбәкстан Җумһурийитиниң Алмутидики баш консули Раушанбек Матчановқа берилди.
— Қазақстан билән Өзбәкстанни пәқәт хошнидарчилиқла әмәс, шундақла қериндашлиқ риштилириму бағлап туриду. Икки әлниң жиллар давамида қелиплашқан сәмимий һәм иллиқ мунасивәтлири моҗут. Бүгүнки таңда бу алақиләр йеңи дәриҗигә көтирилди. Икки дөләт арисида һәл қилинмиған мәсилә йоқ. Бизниң сода-ихтисадий, мәдәний-гуманитарлиқ вә башқиму саһалардики һәмкарлиғимиз жилдин-жилға қоюқлашмақта. Өзбәкстандики қазақлар үчүн һәм Қазақстандики өзбәкләр үчүн өз тилини, мәдәнийитини, урп-адәтлирини сақлап, тәрәққий әткүзүш үчүн имканийәтләр йетәрлик. Мошу мунасивәтләрни тәрәққий әткүзүштә, әлвәттә, Қазақстан хәлқи Ассмблеясиниң роли алаһидә. 
Шуниңдин кейин студентлар Абайниң, Әлишер Наваийниң, Заһиридин Муһәмәт Бабурниң әмгәклири, умумән, иҗадий паалийити һәққидә тәпсилий мәлуматлар берип, шеирлирини оқуп бәрди. Шундақла тонулған сәнъәткар Бәхтияр Мәтназаров, «дүгләк үстәл» меһманлири – һиндстанлиқ студентлар Абайниң нахшилирини, уссулчи қизлар өзбәк хәлқиниң миллий уссуллирини орунлап, жиғилғанларға мәйрәмлик кәйпият һәдийә қилди.