• Әхбаратлар еқими
• 13 Наурыз, 2025

«Ел арна» вә «Хабар» телеканаллири бириктүрүлди

Өткән сешәнбә күни ҚҖ Мәдәнийәт вә әхбарат министри Аида Балаева икки телеканалниң бириктүрүлүши тоғрилиқ әхбарат бәрди. Униң ейтишичә, «Ел арна» вә «Хабар» телеканаллирини бириктүрүш тоғрилиқ стратегиялик қарарни Қазақстан Җумһурийитиниң Мәдәнийәт вә әхбарат министрлиги, вәтәнлик медиакәңликтики сүръәтлик өзгиришләрни нәзәрдә тутқан һалда,  дөләт ресурслирини оптимизацияләш мәхситидә қобул қилған. Бу қәдәм, әң алди билән, вәтәнлик телекомпанияләрниң ишиниң нәтиҗидарлиғини ашурушқа вә қазақстанлиқ контент аудиториясини кәңәйтишкә беғишланған.
 «Ел арна» вә «Хабар» телеканаллирини бириктүрүш 2025-жилниң 1-баһариғичә аяқлишиду. «Ел арнаниң» барлиқ әһмийәтлик контенти «Хабар» телеканилиниң қаримиғиға өтиду. Бу илғар лайиһиләрниң сақлинишиға, уларниң кәң аудиториягә қолйетимлиқ қилишқа һәм уларни келәчәктә тәрәққий әткүзүшкә имканийәт бериду. «Ел арна» телеканили вәтәнлик бәдиий вә һөҗҗәтлик фильмлар, сериаллар, шундақла мәдәний-ақартиш программилири көрситилидиған платформа сүпитидә муһим миссия атқурди. Биз бу телеканалниң миллий кинематография билән телевизияниң тәрәққиятиға қошқан үлүшини жуқури баһалаймиз», — деди Аида Балаева.
Мәдәнийәт вә әхбарат министрлиги «Ел арна» телеканилиниң коллективиға көпжиллиқ әмгәклири, кәспий вә вәтәнлик медиакәңликни тәрәққий әткүзүшкә қошқан үлүши үчүн миннәтдарлиқ изһар қилди. Қайта уюштуруш җәриянида барлиқ хадимлар «Хабар» агентлиғиға ишқа орунлаштурулиду. Мааш дәриҗисиму сақлинип, уларниң тәҗрибиси билән билими йеңи лайиһиләрдә еһтияҗға егә болиду.
 «Ел арна» телеканилиниң программилирини қайта ишләшкә вә тарқитишқа бөлүнгән мәбләғ «24KZ» вә «Хабар» охшаш стратегиялик әһмийити бар телеканалларниң контентини күчәйтишкә вә техникилиқ базисини өз вақтида йеңилашқа қайта бөлүниду. «Ел арна» телеканилиниң паалийитигә қатнашқан барлиқ шәхсләргә миннәтдарлиғимни изһар қилимән вә келәчәктә йеңи утуқлар, иҗадий илһам вә тапавәт тиләймән», — деди министр.
 «Ел арна» телеканили 2000-жили 22-норузда дәсләпки қетим миллий дөләт тилидики канал сүпитидә «Хабар-2» нами билән тәшкил қилинған. 2002-жили норузда нами «Ел арна» болуп өзгәртилип, икки тилда хәвәр тарқитишқа көчти. 2014-жили норуз ейида канал ишини тохтитип, униң частотасида «24KZ» йеңилиқлар канили паалийитини башлиди. 2017-жили 27-норузда «Ел арна» йеңи шәкилдики вәтәнлик киноканилиға айланди. 2024-жилдин башлап у яшларға беғишланған оюн-күлкә канили сүпитидә қайта тәшкилләнди.