• Әхбаратлар еқими
• 13 Наурыз, 2025

Йезида йеңи амбулатория

Гөһәрбүви ИСМАЙИЛҖАНОВА,
«Uiğur avazi»

Баһар пәслиниң қәдәм ташлиши билән Алтөйниң турғунлири чоң хошаллиқниң гувачиси болди. Йезида йеңи амбулатория селинип, пайдилинишқа берилди.
– Алтөй – тәвәдики әң қедимий һәм чоң йезиларниң бири, — дәп сөзини башлиди амбуляторияниң ечилиш мәрасимида сөзгә чиққан Панфилов наһийәсиниң һакими Марат Сағымбек. — Аһалисиниң сани жилдин-жилға өсүп, күндин-күнгә тәрәққий етиватиду. Әзәлдин достлуғи ярашқан бу жутниң адәмлири – дехан билән чопанниң нәсли. Улар йеза егилиги саһасини тәрәққий әткүзүп, ата кәспигә садақити түпәйли әмгәк қиливатқанлиғи һәммигә мәлум. Өткән жилларда йезида Қазақстан хәлиқ рәссами Әбилхан Қастеев намидики мәктәп бенаси мурәккәп җөндәштин өтүп, кочилар асфальтланди. Шундақла йеңи-йеңи қурулуш иншаәтлири қәд көтәрмәктә. Тиҗарәтчиликкә бәл бағлиған жигит-қизлар кафе, дукан, дорихана вә шәхсий балилар бағчилирини селип, турғунларни иш билән тәминләватқанлиғиму тилға аларлиқ. Әнди бүгүн Қазақстан Җумһурийити Пезидентиниң Мәктүбидики көрсәтмә, вәзипиләрни әмәлгә ашуруш, йеза турғунлириниң саламәтлигини сақлаш мәхситидә йеңи амбулаторияси ечилмақта. 
Андин амбулаторияниң рәмзлик лентиси қийилип, жиғилғанлар униң ичини арилап чиқти. Тәкитләш керәкки, 317 миллион тәңгилик мәбләғ сәрип қилинған мәһкимә бенаси заманивий йеңи әсвап-үскиниләр билән җабдуқлинип, реабилитация, күндүзки бөлүм вә лабораториядә билимлик вә тәҗрибилик саламәтлик сақчилири хизмәт көрситиду. 
Һазир Панфилов наһийәсидә чегарилиқ Қорғастин башлап, та Саритөбигичә болған 11 йезида дәл мошу үлгидики саламәтликни сақлаш мәһкимилириниң беналири селиниватиду. Әнди Сарибәл вә Үчарал йезилиридики амбулаторияләрдә мурәккәп җөндәш ишлири жүргүзүлмәктә.
 
Жетису вилайити, 
Панфилов наһийәси