• Әхбаратлар еқими
• 13 Наурыз, 2025

Биз – биллә!

Мәлумки, бүгүнки күндә елимизниң җай-җайлирида ҚХАниң 30 жиллиғиға беғишланған челленджлар, фестиваль-көргәзмиләр, концертлар вә башқиму чарә-тәдбирләр өтүп, көпэтнослуқ қазақстанлиқларниң бирлиги һәм достлуғи намайиш қилинмақта. Йеқинда Рахат йеза округи Анилар кеңишиниң рәиси Райхан Байбосынованиң уюштуруши вә округ һакиминиң қоллап-қувәтлиши билән Қәйнәзәр йезисиниң Мәдәнийәт өйидә «Биз – биллә!» мавзусида көргәзмә уюштурулди. 

Рашидәм РӘҺМАНОВА, 
«Uiğur avazi»

Көргәзмигә округ турғунлири, җәмийәтлик ишларниң активистлири вә жирақ-йеқиндин кәлгән меһманлар қатнишип, тәнтәниниң ечилиш мәрасимиға Мәдәнийәт өйиниң бәдиий рәһбири Арман Ыдырысов риясәтчилик қилди.
– Округимизға қарашлиқ Рахат, Қәйнәзәр, Азат вә Өрикти йезилирида 20дин ошуқ милләтниң вәкиллири достлуқ вә инақлиқта яшап келиватиду. Бу – бизгә керәк әң есил байлиғимиз. Вәтинимиз – Қазақстан техиму гүллинип, әвладимиз тәрәққий әткән әлдә бәхтияр яшисун десәк, елимизни риваҗландурушни өз йезимиздин, өз өйүмиздин башлап, һаятимизниң яхшилиниши үчүн биркишилик төһпимизни қошайли, – деди округ һакиминиң орунбасари Дина Оңалбаева мәйрәм иштракчилирини тәбрикләп.
Чарә-тәдбир давамида Әмгәкчиқазақ наһийәлик ханим-қизлар кеңишиниң рәиси Нурбүви Насирова, Түрген, Йеңишәр йезилири Анилар кеңишиниң рәислири Сәуле Мәмбеткаримова, Сархан Имамзарова, әмгәк ветерани Бақберген Әшимов, молдаван миллитиниң вәкили Веорика Гроза вә башқиларға сөз берилип, уларму дунияйүзидә тәңдиши йоқ, вәтәндашлиримизниң бәхитлик һаятиниң капалити болған институт – Қазақстан хәлқи Ассамблеяниң бизгә бериватқан яхшилиқлирини атап өтти. Әвладимизни қазақстанлиқ роһта тәрбийиләшкә вә бебаһа байлиғимиз – милләтләрара достлуқ вә разимәнликни көзимизниң қаричуғидәк сақлашқа чақирди.
Тәбрикләрдин кейин мәхсус комиссия әзалири Рахат, Қәйнәзәр, Азат вә Өрикти йезилири җәмийәтлик ишлири активистлири тәрипидин тәйярланған көргәзмиләрни арилап, уларни баһалиди. Биз мошу йәрдиму һәрхил милләтләр вәкиллириниң өз мәдәнийити, урп-адәтлири, әнъәнә вә сәнъитини тонуштурушта пааллиқ тонутуп, чарә-тәдбиргә һәртәрәплимә тәйярлиқ билән кәлгәнлиги байқидуқ. Улар қазақниң баурсақ вә бешбармиғини, уйғурниң тонур нени вә әткән чейини, русниң кулич вә пышкиси, түркниң пахлава вә шекерпаресини вә башқиму милләтләрниң миллий таамлирини, турмушта пайдилинидиған буюмлири билән кийим-кечигини кәң тонуштурди. Шундақла өз тиллирида нахшилар ейтип, уссулларға чүшти. 

Алмута вилайити,
Әмгәкчиқазақ наһийәси