• Әхбаратлар еқими
• 13 Наурыз, 2025

Көмүқонақниң ғозигиму пайдилиқ

Бүгүнки күнниң тәливигә яриша, әң күчлүк дөләт дәп яшлири билимлик мәмликәтләрни ейтимиз. ХХІ әсир – аләмшумул өзгиришләрниң, йеңилиқларниң вә йеңилинишларниң дәври. Демәк, күн тәливигә маслишалайдиған билимлик әвлат тәрбийиләш – бизниң бүгүнки асасий мәхситимиздур. 

Сабирәм ӘНВӘРОВА, 
«Uiğur avazi»

Билим демәкчи, бийилқи оқуш жилида Уйғур наһийәсиниң яшлири көплигән яхши нәтиҗиләрни қолға кәлтүрди. Хуш қиларлиғи, һәрхил дәриҗидики конкурсларға қатнишип, наһийәниң шәнини қоғдаватқан оқуғучиларниң қатари күндин-күнгә көпәймәктә. Шуларниң бири – Дидар Дилмуратов. 
Дидар Чонҗа йезисидики Илия Бәхтия намидики 3-оттура мәктәпниң 10-синипида оқуйду. Билим дәргаһиниң пәхригә айланған оқуғучи йеқинда Ақтөбә шәһиридә умумий билим беридиған пәнләр бойичә өткән җумһурийәтлик илмий ишлар конкурсиға химия пәни бойичә қатнишип, ІІІ орунға сазавәр болди. 
– Дидарниң илмий ишиниң асасий мәхсити – көмүқонақ ғозигидин пайдилиқ қурулуш материалини елиш болди. Бу мәхситигә йетиш үчүн у көп издәнди. Көмүқонақ ғозигини жиғип, көплигән тәтқиқатларни жүргүзди. Чоңқур издинишләр нәтиҗисидә Гост 25820 стандартиға   мувапиқ келидиған йеник бетон елинди. Униң пухтилиғи,  угулмайдиғанлиғи байқалди. Бу үлгиниң һәм бетонниң оттура зичлиғини тәкшүрәш үчүн Алмутидики «ІСІ-МК» ЖЧЙға әвәтилди. Жүргүзүлгән тәтқиқатлар йәкүни йеңи мәһсулатниң альтернатив хам әшия индустриясидә қоллинишқа болидиғанлиғини көрсәтти. Шундақла бу услубниң келәчәктә таза һәм үнүмлүк қурулуш материаллирини ишләп чиқиришқа асас болалайдиғанлиғи ениқланди.    Яш тәтқиқатчиниң әмгиги  илмий ишлар конкурсиниң вилайәтлик басқучида жуқури баһаға еришип, җумһурийәтлик басқучта ІІІ орундин көрүнди. Бу Дидарниң биринчи утуғи әмәс. Шундақла әң ахирқиси болуп қалмайдиғанлиғиғиму ишәнчим камил, – дәйду химия пәниниң муәллими Гүлмира Әйсарова.
Устаз әмгиги шагирт қәдими билән өлчиниду. Бу утуқ униң устазиғиму ортақ, әлвәттә. Җумһурийәтлик конкурста йәңгән Дидар Дилмуратовни ана мәктивидә устазлири вә оқуғучилар тәнтәнилик рәвиштә қарши алди. Уйғур наһийәлик билим бөлүминиң хадими Толқынай Исаева наһийәлик билим бөлүминиң рәһбири Мөлдир Қурманалиеваниң тәбригини йоллап, Дидар вә униң пән йетәкчисини тәшәккүрнамә билән тәғдирлиди. Өз новитидә, изгү тилигини билдүргән наһийәлик Уйғур этномәдәнийәт мәркизиниң рәиси Арлен Һосманов болса, мәркәз намидин Дидарға 100 миң тәңгиниң сертификатини соға қилди. Наһийәлик кәспий иттипақ уюшмисиниң рәиси Кәрибай Қожағулов, мәктәп мудири Шерзат Бабаханов вә устази Гүлмира Әйсарова талантлиқ һәм тәдбирчан оқуғучиниң келәчигидин чоң үмүт күтидиғанлиғини ейтти. Ушбу тәнтәнилик пәйткә гува болған Дидарниң аниси Динарәм Ивилқазиева толиму тәсирләнди. У оғлиниң хошаллиғини икки һәссилигән мәктәп мәмурийити, билим бөлүми, уни конкурсқа тәйярлиған устази билән қоллап-қувәтлигән җәмийәтлик ишлар активистлириға чоңқур миннәтдарлиғини изһар қилди.
Бизму яш тәтқиқатчиниң келәчәктә техиму чоң утуқларға йетишигә тиләкдашлиқ билдүримиз! 
    
Алмута вилайити, 
Уйғур наһийәси