• Әхбаратлар еқими
• 19 Наурыз, 2025

Тарихий ғалибийәт

16-норуз күни Сербияниң Ниш шәһиридә бокстин дуния чемпионати аяқлашти. Қазақстанниң аяллар талланма командиси 3 алтун, 2 күмүч, 1 бронза медаль йеңивалди. Мошу көрсәткүч билән умумкомандилиқ һесапта бизниң боксчи қизлар иккинчи орунни егилиди. 

Йолдаш МОЛОТОВ, 
«Uiğur avazi»

Мәзкүр дуния чемпионатидики дәсләпки алтун медальни 48 килограмм салмақта Назым Қызайбай алди. Назым финалда россиялик боксчи Юлия Чумгалакова билән күч синашти. Нәтиҗидә тәҗрибилик қазақстанлиқ спортчи 5:0 һесави билән рәқивини тиз пүктүрди. Алаһидә тәкитләш керәкки, Париж Олимпиадисида бронза медаль саһиби аталған Назым Қызайбай Қазақстан бокси тарихида дәсләпки қетим үч дүркүн дуния чемпиони аталған боксчи. 
Қазақстан Президенти Қасым-Жомарт Тоқаев Назым Қызайбайни тарихий ғалибийити билән тәбрикләп, телеграмма йоллиди. «Назым Қызайбайниң елимиз бокс тарихида дәсләпки қетим дуния чемпиони болуши билән тәбрикләймән. Бу – чоң утуқ!» дәп тәкитләнгән Дөләт рәһбириниң тәбрикнамисидә.
Иккинчи алтун медаль 50 килограмм салмақта Алуа Балқыбекова алди. У Хитай боксчиси Ху Мэйини 5:0 һесави билән йәңди. Үчинчи алтун медальни болса, финалда таиландлиқ боксчи Тананья Сомнуеккени йәңгән Аида Әбикеева (63 кг.) егилиди. Әнди Виктория Графеева (60 кг.) вә Елдана Талипова (81+) күмүч медаль елишқа муйәссәр болди. 70 килограмм салмақ дәриҗисидә рингқа чиққан Наталья Богданова бронза медалини алди.
Сешәнбә күни Алмута аэропортида Сербиядин кәлгән баксчи қизларни спорт ишқивазлири дағдуғилиқ күтивалди. Биз, пурсәттин пайдилинип, Назым Қызайбайниң шәхсий мәшиқләндүргүчиси Долқун Қәмеков билән сөһбәтләшкән едуқ.
— Назымниң бу тарихий ғалибийити Қазақстан бокси үчүн чоң утуқ, — дәйду Долқун ака Қәмәков. — Елимизниң бокси тарихида дәсләпки қетим үч дүркүн дуния чемпиони аталди. Есиңларда болса, Олимпиада чемпиони Серик Сапиев икки дүркүн дуния чемпиони болған еди. Париж Олимпиадисидин кейин Назым Қызайбай бир айдәкла дәм елип, қайтидин мәшиқләргә киришти. Чүнки униң армини – үч дүркүн дуния чемпиони болуш болди. Биз мәслиһәтлишип, униң салмиғини 48 килограмм дәриҗисигә чүширишни тоғра көрдуқ. Мошу салмақта Назым Қазақстан чемпионатида ғалип чиқти. Һәрқандақ боксчи үчүн салмақ ташлимақ қийин. Шундиму Назым бу вәзипини толуқ орунлиди. Сербиядә өткән дуния чемпионатида Назым Словакия, Венесуэла, Шималий Корея боксчилирини ишәшлик йәңди. Финалдиму россиялик боксчини чоң айримчилиқ билән тиз пүктүрүп, өзини һазир дунияда аяллар арисида әң күчлүк боксчи екәнлигини йәнә бир қетим намайиш қилди. 
Мениң йәнә бир шагиртим Алуа Балқыбекова илгәрки дуния чемпионатлирида күмүч, бронза медальлирини алған еди. Сербиядә у алтун йеңивалди. Демәк, Алуада дуния чемпионати мукапатлириниң толуқ комлекти бар дегән сөз. Еғир салмақта, йәни 81+ салмақ дәриҗисидә һүнәр көрсәткән йәнә бир шагиртим Елдана Талиповаға финалда азирақ тәләй йәтмәй қалди. Елдана мошундақ хәлиқара чоң мусабиқигә дәсләпки қетим қатнашти. Шундақ болсиму, финалғичә йәтти. У йеқинда Азия чемпиони болған. Келәчигидин үмүт күткүзидиған яш боксчи қизлиримизниң бири. Униң ғалибийәтлири алдимизда дәп ойлаймән. 
Умумән, биз мошу чемпионатта Қазақстан боксиниң сүръәтлик тәрәққий етиватқанлиғини, болупму аяллар боксида дуниядики әң күчлүк командиларниң бири екәнлигимизни йәнә бир қетим дәлиллидуқ. Әндики бизниң мәхситимиз – 2028-жили АҚШта өтидиған язлиқ Олимпиада. Биз униңға тәйярлиқларни башлавәттуқ.
Алаһидә тәкитләш лазимки, атақлиқ мәшиқләндүргүчи Долқун Қәмәковниң исми Қазақстан боксиниң тарихида дәсләпки үч дүркүн дуния чемпионини тәрбийилигән мәшиқләндүргүчи сүпитидә алтун һәрипләр билән йезилидиғини сөзсиз. Бизму, пурсәттин пайдилинип, уни тәбрикләп, утуқлар тиләймиз.