• Әхбаратлар еқими
• 02 Сәуір, 2025

Ихтисадий алақиләрни күчәйтидиған муһим қәдәм

Президент Қасым-Жомарт Тоқаев елимизгә рәсмий сәпәр билән кәлгән Словения президенти Наташа Пирц-Мусар Қазақстан-Словения бизнес-форумиға қатнашти.
Дөләт рәһбири ахирқи 30 жилда Қазақстан билән Словения өзара һөрмәткә асасланған мустәһкәм сәясий-дипломатиялик алақә орнатқанлиғини тәкитләп өтти. Президентниң ейтишичә, дүшәнбә күни өткән музакириләр давамида тәрәпләр икки мәмликәтниң келәчиги үчүн ихтисадий һәмкарлиқни күчәйтишкә мәнпәәтдар екәнлигини қәйт қилди.
— Қазақстан – региондики ихтисади сүръәтлик өсүватқан чоң әлләрниң категориясидә. Булту елимизниң ихтисадий өсүми 4,8 пайиз дәриҗисидә болди. Бу тәхмин қилинған дуниявий өсүмдин 1,5 һәссә жуқури. Ички умумий мәһсулат көләми 288 миллиард долларға йәтти. Биз кәңдаирилик сәясий вә ихтисадий ислаһатларни әмәлгә ашуруп, мошу тәрәққият көрсәткүчини сақлап қелишқа тиришимиз, — деди Қасым-Жомарт Тоқаев. 
Президент Қазақстанниң Евразиядики йетәкчи сода һәм логистика хабиға айлинишқа интилидиғанлиғини, униң өзиниң стратегиялик орунлишиши имканийәт бериватқанлиғини қәйт қилди. 
— Қазақстан Евразиялик ихтисадий иттипақ әллиридә, Мәркизий Азия территориясидә вә Хитайда туридиған 1,5 миллиардтин ошуқ истималчиға беваситә чиқишқа имканийәт тәвсийә қилалайду. Елимизниң территорияси арқилиқ өтидиған жүк тошушниң көләми булту рекордлуқ көрсәткүчкә, йәни 514 тонна-чақиримға йәтти. Һазир Қазақстан Европа билән Хитай арисидики алақиләрниң 90 пайизини тәминләватиду. Биз Оттура дәлиз вә Шимал-Җәнуп охшаш хәлиқара йолларни паал тәрәққий әткүзүшни қолға алдуқ. Ақтав вә Қурық портлири Каспий деңизидики жүк тошушта муһим роль атқуриду. Мәзкүр деңиз портлиридин әвәтилгән жүк көләми булту 4,5 миллион тонниға йәтти (2023-жилидики 2,5 миллион тонна билән селиштурғанда 62 пайиз өсүм). Бу – рекордлуқ нәтиҗә. Бу йәрдә транспорт алақисини күчәйтип, сода-сетиқ риваҗландуруш үчүн Словенияниң әң чоң Копер порти билән тәҗрибә алмаштурушни вә һәмкарлиқни күчәйтишни мәхсәт қилиду, — деди Президент. 
Дөләт рәһбири санаәт вә энергетика саһалиридики һәмкарлиқни иккитәрәплимә мунасивәтниң келәчиги зор йөнилиши екәнлигини ейтти. Президентниң пикричә, Қазақстанниң нефтиниң 70 пайизиға йеқини Европа иттипақи әллиригә экспорт қилиниду. Разведка қилинған тәбиий газ фонди 3 триллион квадрат метрға йетиду. Көмүр кани 34 миллиард тоннини тәшкил қилиду. 
Президент елимиз йеза егилигигә алаһидә диққәт бөлүнидиғанлиғини, бу саһа дуниявий озуқ-түлүк бехәтәрлигини һәл қилишта һәл қилғучи роль ойнайдиғанлиғини тәкитлиди. Һазир вәтәнлик йеза егилиги мәһсулатлири дунияниң 70тин ошуқ мәмликитигә экспорт қилиниду. 
 Қасым-Жомарт Тоқаев Қазақстанниң агросанаәт комплексини жуқури технологиялик сектор сүпитидә қайта қуруш плани тоғрилиқ ейтип, словен шериклирини бирләшкән инвестициялик лайиһиләрни әмәлгә ашурушқа чақирди. 
 Президентниң пикричә, словениялик «Krka», «Lek» охшаш алдинқи қатарлиқ компанияләр билән фармацевтика саһасидики һәмкарлиқ елимизниң ички санаитини көпәйтип, технологиялик иқтидарини кәңәйтишкә тәсир қилиду.
Униңдин ташқири, Дөләт рәһбири Словенияниң сүръәтлик тәрәққий етиватқан инновациялик ІТ саһасини илмий тәтқиқатлар, стартаплар вә технологиялик билим бериш йөнилишидә һәмкарлиқ орнитишқа чақирди.
Қазақстан Президенти малийә вә инвестиция саһасидики алақиләргиму аалаһидә әһмийәт бәрди. У Словенияниң тиҗарәтчилириниң Астана хәлиқара малийә мәркизиниң иқтидарини тәһлил қилип, мәзкүр экосистемиға қошулушини тәклип қилди.
 Қасым-Жомарт Тоқаев сөзини хуласиләп, Словения тиҗарәтчилирини билән болған учришишни ихтисадий мунасивәтни күчәйтидиған муһим қәдәм сүпитидә баһалап, тиҗарәтчиләрни бийил баһарда өтидиған Астана хәлиқара форумиға қатнишишқа чақирди.