• Әхбаратлар еқими
• 09 Сәуір, 2025

«Улуқ Ғалибийәткә — мәңгүлүк тазим»

Алмута шәһиридики Мәркәзләштүрүлгән китапханиларниң 4-китапханисида «Улуқ Ғалибийәткә — мәңгүлүк тазим» намлиқ тарихий реквием уюштурулди. Китапхана залида «Әвлатқа шиар болған Улуқ Ғалибийәт” намлиқ китап көргәзмиси ечилди.
Китапхана башлиғи Әлия Инкәрбек жиғилғанларға бу чарә-тәдбирниң мәхситини изһар қилип, уларға ғалип әвлатқа һөрмәт билдүргини үчүн рәхмәт ейтти.
— Иккинчи дуния уруши – хәлқимизниң, чоң әвлатниң, батур ата-бовилиримизниң мәккәм ирадиси, мәртлиги вә қәһриманлиғини дуния әһлигә тонутқан муқәддәс җәңгаһ болса, Ғалибийәт – улуқ әҗдатлиримизниң әрлигини мәңгүлүк хатиригә айландуридиған әтиварлиқ мәйрәм. Бүгүнки мустәқиллик туғимизниң шанлиқ, қәддимизниң тик болуши, елимиздә течлиқ билән достлуқниң тәнтәнә қазинишиму — шу Улуқ Ғалибийәтниң йемиши. Бүгүнки яшлар чоң әвлат — уруш ветеранлириниң мираси болған әрлик билән қәйсәрлигигә қарап, шулардин үлгә алиду. Бу тәнтәнилик чарә-тәдбирниң муддиаси — он гүлиниң бири ечилмай, әзиз җенидин кечип, Вәтән үчүн от кәчкән, өлүмгә тик қариған батур әҗдатлиримиз роһиға баш егиш, һөрмәт көрситиштин ибарәт. Шуниң өзи яшларда әлни, Вәтәнни қоғдашқа қабил вәтәнпәрвәрлик роһни шәкилләндүриду, — деди у.
Тәнтәнигә Алмалы наһийәси Ветеранлар кеңишиниң әзалири билән әмгәк ветеранлириму иштрак қилди. Улар яшларға отлуқ жиллар жилнамисиниң қәһриманә сәһипилири, шундақла тарихта өчмәс из қалдурған 1969-жили Приморье өлкисиниң чегарисида йүз бәргән Даманск вә 1979 — 1989-жиллардики авған уруши һәққидики хатирилири билән бөлүшти.
Кәч ахирида «Отлуқ жиллар шәписи» дәп аталған тарихтин учур беридиған викторина уюштурулуп, ғалиплар баһалиқ соғилар билән тәғдирләнди.