• Әхбаратлар еқими
• 09 Сәуір, 2025

Әвлатлар билән хәлиқләр бирлиги

Алмутидики «Достлуқ өйидә» Ғалибийәтниң 80 жиллиғиға беғишланған чарә-тәдбирләр даирисидә «Ғалибийәт хатириси: әвлатлар билән хәлиқләр бирлиги» намлиқ Қазақстан — Россия хәлиқара конференцияси өтти, дәп хәвәрлиди Мәдәнийәт вә әхбарат министрлигиниң мәтбуат хизмити.
Мәзкүр конференция Қазақстан билән Россияниң тәвәллудлуқ сәнәгә беғишланған чарә-тәдбирлириниң бисмиллиси болди. Министр Аида Балаева қазақстанлиқларниң Ғалибийәткә қошқан һәссисигә кәң тохтилип, урушқа һәрбир бәшинчи қазақстанлиқниң иштрак қилғинини тәкитлиди. Урушта 6 010 011 адәм қаза болди. 271 503 җәңчи из-тизсиз йоқап кәтти. Әлия Молдағулова, Мәншүк Мәметова, Талғат Бигелдинов, Бауыржан Момышулы, Қасим Қайсенов, Леонид Беда, Рахымжан Қошқарбаев, Сағадат Нурмағамбетов, Сергей Луганскийниң исимлири Ғалибийәт тарихиға алтун һәрипләр билән йезилди. 528 адәм Кеңәш Иттипақиниң қәһримани атиғини алди. 
«Уруш — пәқәт адәм чиқимила әмәс, шуниң билән ихтисаттики зор йоқитиш. Очуғини ейтсақ, Қазақстан мәйданға барини бәрди. Җумһурийәт мәйданға һаҗәт қоғушунниң 85 пайизини әвәтти. Һәрбир төртинчи оқ Лениногорск (һазирқи Риддер) шәһиридә ишләп чиқирилған мәһсулаттин ясалди», — дәп қәйт қилди Аида Балаева.
Униңдин сирт, Қазақстан барлиқ полиметалларниң — 79, висмутниң — 65, молибденниң — 60, мисниң 35 пайизини тәминлиди.
Ишләпчиқириш орунлирини умумйүзлүк көчириш Қазақстанниң индустриялик әлгә айлинишиға иқбал яратти. Елимизгә 220 завод эвакуация қилинип, машина һәм станок ясаш, оқ-дора, химиялик қураллар вә қара металл саһалири шәкилләнди.
«Тәкитләш керәкки, 1943-жили «Қазақфильм» киностудиясидә режиссер Ефим Аронниң «Белая роза» фильми чүширилди. Униңда яридар болған офицерниң ролини Шәкен Айманов иҗра қилди. Бүгүнки күндә «Қазақфильм» киностудияси мошу исми ривайәткә айланған актер вә режиссерниң намида атилиду. Россия билән Қазақстан кинемотографист­лириниң иҗадий һәмкарлиғи миллий киноиндустриямизниң асасини салди», — деди министр.
Шу жиллири кинемотографиядила әмәс, башқа саһалардиму көплигән илгириләшләр йүз бәрди. Уруш поэзиясиниң гәвһири болған қазақ ақини Җамбулниң мәшһур әсәри «Ленинградлиқлар, балилирим мениң» шу чағда дунияға кәлди. 
Конференция давамида Қазақстан — Россия гуманитарлиқ һәмкарлиғидики чарә-тәдбирлириниң кәштиси мақулланди.