• Әхбаратлар еқими
• 09 Сәуір, 2025

Ишсизлар азийип, ишчилар көпәйди

Йеқинда Жетису вилайитидики аммивий әхбарат васитилириниң хадимлири икки күн мабайнида Панфилов наһийәсидә болуп, иҗтимаий инвестициялик объектларни арилап, дөләт программилири даирисидә әмәлгә ашурулуватқан лайиһиләрни өз көзи билән көрүп, йеқиндин тонушуш пурситигә егә болди.

Гөһәрбүви ИСМАЙИЛҖАНОВА,
«Uiğur avazu» 

Мәтбуат-тур «Қолайлиқ мәктәп» миллий лайиһиси даирисидә селиниватқан йеңи билим дәргаһи билән тонушуштин башланди. Мәзкүр мәктәп 1200 орунлуқ әң илғар техникилар билән җабдуқлинипту. Шундақла 258 орунлуқ мәҗлисләр залиға, икки оқуш зали билән китапханиға, 230 орунлуқ ашханиға, хореография залиға, балиларниң спорт мәйданчилириға қарап зоқландуқ. Һәқиқәтәнму, барлиқ җәһәттин қолайлиқ мәктәптә оқуш балилар үчүн чоң имканийәт һәм шараит екәнлигини тәкитләш орунлуқ. 
Иккинчи мәнзилимиз – Н.Головацкий намидики йеза. Икки мәртә Социалистик Әмгәк Қәһримани Николай Головацкийниң тәшәббуси билән қәд қөтәргән бу йезиға илгири «Яшлар шәһәрчиси» дәп нам берилгән. Мәрһум рәис һөрмитигә һазир униң намида атилиду. Шундақ екән, өткән әсирниң 90-жиллири селинған беналарниң конирап кетиши түпәйли, турғунлар илтимасиға бенаән, мурәккәп җөндәш ишлири жүргүзүлди. Җүмлидин, йезидики мәктәп вә Мәдәнийәт өйи Жетису вилайити һакими Бейбит Исабаевниң қоллап-қувәтлишидә толуғи билән йеңиланди. Биз Мәдәнийәт өйи хадимлириниң иш-паалийити билән йеқиндин тонуштуқ. Китапхана вә «Алтын қазына» әжелер ансамблиниң әзалири қизғин мәшғулат  үстидә екән. Ансамбль әзалири наһийәдә әнъәнивий давамлишиватқан фестивальға тәйярлиқ қиливетипту. Андин Мәдәнийәт сарийидин анчә жирақ әмәс җайда тиҗарәтчи Турсун Көнчибаев салған 210 орунлуқ «Жаскент» балилар бағчисиниму арилап чиқтуқ. Бағчида 20 адәм иш билән тәминлинипту. Кәң-азадә бөлмиләрдә балилар һәр күнини көңүллүк өткүзиду. 
Новәттә Талди йезисиға қарап йол туттуқ. Бизни   «Таусамал» истраһәт беғида қарши алған һаким йеза нәпәси билән қисқичә тонуштурди. 
— Талди – тәвәдики 5 миңдин ошуқ турғуни бар үлгилик йезиларниң биридур. Йезида мәктәп, икки балилар бағчиси, амбулатория вә Мәдәнийәт өйи бар. Аз күндә өйләргә газ тартиш ишлири башлиниду. Тиҗарәтчиләр һесавиға тәминати начар аилиләр үчүн 16 өй селинди. Йеңи оқуш жилида балиларға соға ретидә йеңи 300 орунлуқ мәктәп өз ишигини ачиду, — дәйду йеза округиниң һакими Қуандық Әширжанов.
Биз, журналистлар, Яркәнт шәһиридә қәд көтириватқан турушлуқ өй комплекслириниму арилап көрүш хаһишимизни билдүрдуқ. Шундақ қилип, у күни 160 пәтирлик өйниң қурулуш ишлири билән тонушуш имканийитигә егә болдуқ.     
Алтөй йезисида йеқинда пайдилинишқа берилгән амбулаторияму мәтбуат хадимлириниң диққәт нәзәридә болди. 18 штат бөлүнгән йеза амбулаториясиму йеңи медицинилиқ әсвап-үскүниләр билән җабдуқлинипту. Буниң өзи алтөйлүкләргә лабораториялик анализларни тапшуруш, реабилитация хизмитидин пайдилиниш, күндүзи йетип давалиниш охшаш имканийәтләрни яритиду. Бирингчи күнимиз Чоң Чиғандики 2023-жили селинған спорткомплекста аяқлашти. 90 орунлуқ бу бенадики тоққуз секциядә мәшиқлиниватқан балиларға қарап һадуғимиз чиққандәк қилди... 
Иккинчи күнимиз «Қорғас – Шәриқ дәрвазиси» қурғақ портидики инвестициялик лайиһиләр билән тонушуштин башланди. У йәрдә биз, төрт объектниң иш-паалийитини қоюн дәптиримизгә чүшәрдуқ. 
Дәсләп чай, кофе услуқлирини ишләп чиқиридиған Сингапур бренди болған «MacCoffeeни» зиярәт қилдуқ.  Йетиштүрүлгән мәһсулат Қазақстан, Өзбәкстан, Әзәрбәйҗан, Кирғистан. Түркмәнстан. Грузия, Әрмәнстан, Таҗикстанға әвәтилидекән. 
 «Maйaмu Solar» ҖЧЙ Америка технологиялири асасида күн батареялирини ишләпчиқиришни қолға апту. Рәһбәрликниң ейтишичә, жилиға 550 вольтлуқ 363 635 күн батареялири Өзбәкстан вә АҚШқа экспорт қилинидекән. 
Қурғақ порттики йәнә чоң компанияларниң бири — «SSA Feed Mills» ҖЧЙ комбикорм заводи. Ейиға 250 тонна буғдай, көмүқонақ вә арпа, сулудин 20 түрлүк мал озуғи йетиштүридиған заводниң жиллиқ ишләп чиқиридиған мәһсулати  60 миң тоннадин ашидекән.  
Ишқа қошулуш алдида турған металлочерепица ишләп чиқиридиған завод тәвлүгигә 10 тонна төмүр мәһсулатини йетиштүридиған болиду. 
Жуқурида аталған мәһсулатниң тәңдин толиси жирақ вә йеқин чәтәлләргә төмүр йол арқилиқ йәткүзүлиду. Шуңлашқа наһийә рәһбәрлигиниң илтимасиға бенаән, биз, журналистлар иш бабидики сәпиримизниң чекитини «Алтынкөл» төмүрйол станциясидә қойдуқ. Қазақстан – Хитай чегарисидики бу төмүрйол магистрали – хәлиқара дәриҗидики иккинчи лайиһә. Икки дөләт оттурисидики төмүрйол арқилиқ контейнерлар Хитай вә Европа мәмликәтлиригә, Парс қолтуғиға вә Оттура Азия әллиригә әвитилиду.    
Чегарилиқ наһийәниң турмуш нәпәси мана шундақ. Үч жилниң ичидә тәвәдә ишсизлар сани азийип, ихтисади хелә көтирилипту. Болупму тәвә яшлириниң төмүрйол, логистика охшаш заман тәливигә лайиқ башқиму саһаларға мунасивәтлик кәсипләрни таллавелип, Қурғақ портта ишләватқанлиғи һәммимизни қайил қилди. Йеңидин қәд көтириватқан объектларға қарап, Президент Қасым-Жомарт Тоқаев елан қилған «Ишчи-мутәхәссислар жилида» вилайәттә ишчи-мутәхәссиләрниң көпийидиғанлиғиға ишинимиз.
 
Жетису вилайити,
Панфилов наһийәси