• Әхбаратлар еқими
• 23 Сәуір, 2025

Тазилиқ – биркүнлүк мәвсүм әмәс

Дөләт рәһбири «Таза Қазақстан» экологиялик фестивалида сөз сөзлиди. Президент өз нутқида бүгүнки ишниң әһмийитигә тохтилип, «Тазилиқ» фестивали маһийити муһим чарә-тәдбир екәнлигини қәйт қилди.
— Мошуниңдин бир жил илгири һәммимиз бир әл болуп «Таза Қазақстан» лайиһисини башлидуқ. Мән, әң алди билән, мошу умуммиллий тәшәббусқа дәсләпки күндин паал қатнишиватқан һәрбир гражданға миннәтдарлиғимни изһар қилимән. Болупму шуларниң арисида өзәңләр охшаш талантлиқ вә ялқунлуқ яшлиримиз көп. Силәр елимизниң һәрбир регионида әмгәк қилип, җәмийәтлик ишларға қатнишиватисиләр. Бу – үлгә боларлиқ иш. Мән Дөләт рәһбири сүпитидә силәрни дайим қоллаймән!—деди Қасым-Жомарт Тоқаев. 
Дөләт рәһбири тазилиқниң әһмийити вә мәзмуни тоғрилиқ пикри билән бөлүшүп, инсанниң өзиниңму, әтрап муһитниңму тазилиғини сақлаш – һәрбир адәмниң ички мәдәнийитиниң көрсәткүчи дәп баһа бәрди. Шуңлашқа тазилиқ хәлқимизниң савийәсигә сиңгән хусусийәт болуши керәк екәнлигини дайим ейтип келиватқанлиғини тәкитлиди.
— Тазилиқ һәрбир адәмдин, һәрбир өйдин, һәрбир коча билән шәһәрдин башлиниши лазим. Чүнки «Таза Қазақстан», бу – биркүнлүк мәвсүм әмәс. Бу – бизниң һаятий әнъәнимиз. «Яш кәлсә – ишқа» дәп хәлқимиз бекар ейтмиған. Һәммиңларни тәбиәтни қоғдаш идеяси бириктүрүватиду. Силәрниң һәмкарлиғиңлар арқисида бу алий тәшәббус мошундақ чоң һәрикәткә айланди. Умумий ишқа барчә күчни сәпәрвәрликкә кәлтүрүш дегинимиз – мошу, — деди Президент. 
 Қасым-Жомарт Тоқаев пидаийларниң әмгигини алаһидә тәкитлиди. Униң ейтишичә, пидаий болуш, әң алди билән, һәқиқий вәтәнпәрвәр граждан болуш, йәни вәтәнпәрвәр болуш дегән сөз. Шундақла Дөләт рәһбири экологияни яхшилашқа карханилар билән тиҗарәтчиләрниң зор үлүш қошуватқанлиғиға тохталди. Президент «Таза Қазақстан» даирисидә наһайити кәңдаирилик ишлар әмәлгә ашурулғанлиғини, миллионлиған тонна әхләт жиғилип, көчәт тикилгәнлигини қәйт қилди. Бу турғудин қариғанда «Пүткүлқазақстанлиқ көчәт тикиш күни» акциясиниң яхши әнъәнигә айланғанлиғини ейтти. 
 Андин Дөләт рәһбири яшлар тәклип қилған лайиһиләр билән тонушқанлиғини ейтип, һәрбир тәшәббуста елимизгә, тәбиәткә болған ғәмхорлуқ байқилидиғанлиғини тәкитлиди. 
— Бизниң Қазақстандин башқа вәтинимиз йоқ. Туғулған йеримизни һечким сирттин келип тазилап бәрмәйду. Вәтинимизни таза тутуш – һәрбир гражданниң пәрзи. Ахирқи жилларда елимиздә нурғунлиған муһим өзгиришләр болди. Адаләтлик мәмликәт болуш үчүн биз қанун билән тәртипкә беқинидиған җәмийәт қуруватимиз. Шундақла кәңдаирилик ислаһатлар жүргүзүлүватиду. Мошуниң һәммиси, әң алди билән, яш әвлат үчүн, йәни силәр үчүн әмәлгә ашурулуватиду. Қазақстан яшлириниң келәчиги – парлақ, йоли – очуқ. Мән силәргә ишинимән, зор үмүт артимән. Вәтәнпәрвәр, әмгәкчан болушуңларни тиләймән. Шу вақитта Қазақстанимизму Адаләтлик, Таза, Бехәтәр вә гүлләнгән илғар дөләт болалайду. Һәммиңларға утуқ тиләймән, — деди Қасым-Жомарт Тоқаев.
Фестиваль ахирида «Таза Қазақстан» акциясигә паал қатнашқан, җәмийәттә тазилиқ мәдәнийитини тәшвиқ қилишқа алаһидә күч салған бир топ яшлар мукапатланди. Шуниң билән биллә Президент «Таза Қазақстан» экофестивалиға беғишланған көргәзмини зиярәт қилди. «Таза Қазақстан» экологиялик фестиваль даирисидә Астана шәһиридики «Жастар» паркида экоактивистлар билән биллә көчәт тикти.