• Әхбаратлар еқими
• 19 Маусым, 2025

Җумһурийәтлик форум өтти

Мошу һәптиниң сешәнбә вә чаршәнбә күнлири Алмутида Қазақстан хәлқи Ассамблеясиниң 30 жиллиғиға һәм Ишчи мутәхәссисликлири жилиға беғишланған «Адал азамат – ұлт келбеті» мавзусида ҚХА ақсақаллар кеңишиниң V җумһурийәтлик форуми болуп өтти.
Форумниң биринчи күни Қазақстан хәлқи Ассамблеяси Рәисиниң орунбасари – Кативат рәһбири Марат Әзилханов рәһбәрлигидики бир топ делегация әзалири Алмутидики электромеханика колледжини вә «Metall Prom Group» ҖЧЙни зиярәт қилип, оқуш орниниң һәм ищләпчиқириш карханисиниң нәпәси билән йеқиндин тонушти.
Чаршәнбә күни җәнубий пайтәхттики «Достлуқ өйидә» форумниң пленарлиқ мәҗлиси өтти. Униңға Алмута шәһәрлик Ақсақаллар кеңишиниң рәиси Болат Оспанов риясәтчилик қилди. Күн тәртиви бойичә дәсләп ҚХА Рәисиниң орунбасари Марат Әзилханов көпчиликни Ассамлея тәркивидики кеңәшләр паллийитигә баһасини берип, кәлгүсигә реҗиләнгән ишлири билән қисқичә тонуштурди. 
Алмута шәһири һакиминиң орунбасари Азамат Қалдыбековниң тәбрик сөзидин кейин ҚҖ Маарип министрлиги И.Алтынсарин намидики Миллий билим академиясиниң вице-президенти Анара Тәңирбергенованиң, ҚХА Анилар кеңишиниң рәиси Нәзипа Шанаиниң, ҚХА җумһурийәтлик этномедиация кеңишиниң рәиси Шерзод Пулатовниң вә регионлардин кәлгән вәкилләрниң мавзуға мунасивәтлик докладлири тиңшилип, қатнашқучилар тәрипидин муһакимә қилинди.
Мәҗлис ахирида Ассамблея паалийитини җанландурушқа мунасип үлүшини қошқан бир түркүм җәмийәтлик ишларниң активистлириға ҚХАниң Тәшәккүрнамилири тапшурулди.

 Юлтузай СЕМӘТОВА