• Әхбаратлар еқими
• 19 Маусым, 2025

Музакириләр жүргүзди

Дүшәнбә күни Президент Қасым-Жомарт Тоқаев Ақорда резиденциясидә ХХҖ рәиси Си Цзиньпинни қарши алди. Дөләт рәһбириниң ейтишичә, ХХҖ рәиси қазақ йеридә дайим һөрмәтлик меһман болуп һесапланған, униң бу қетимқи сәпири – мустәһкәм достлуқниң ениқ көрүнүши.
– Хитай Хәлиқ Җумһурийити – Қазақстанниң инақ хошниси, йеқин дости вә ишәшлик шериги. Қазақ-хитай һәмкарлиғи сизниң шәхсий қоллап-қувәтлишиңиз билән мәңгү вә һәртәрәплимә стратегиялик һәмкарлиқ роһида вә илгири-кейин болмиған сүръәт билән тәрәққий етиватиду. Буни алаһидә тәкитлигүм келиду, – деди Президент. 
 Қасым-Жомарт Тоқаев икки мәмликәтниң БМТ, ШҺТ, АӨҺШК охшаш хәлиқара вә регионлуқ тәшкилатлар даирисидә, шундақла БРИКС+ һәм «Мәркизий Азия – Хитай» форматида жуқури дәриҗидә һәмкарлиқ орнатқанлиғини қәйт қилди һәм ХХҖниң Қазақстанниң әң чоң сода-ихтисадий шериги екәнлигини тәкитлиди. 
 Қасым-Жомарт Тоқаев атом энергетикиси саһасиға алаһидә тохталди.
– Биз Қазақстанда бирнәччә, әң болмиғанда икки-үч АЭС селиш тоғрилиқ қарар қобул қилдуқ. Мошу муһим лайиһигә чоң компанияләрни җәлип қилишқа мунасивәтлик ишлар жүргүзүлмәктә. Қазақстан Җумһурийитиниң Атом энергияси бойичә агентлиғи қурулди. АЭС қурулуши бойичә Хитайниң CNNC компаниясини ишәшлик шерик сүпитидә қараштуруватқанлиғимизни алаһидә тәкитлигүм келиду. Дунияға тонулған компания бизниң базарда өз орнини тапидиғини ениқ. Шуниң билән биллә Қазақстан Хитайға тәбиий уран билән ядролуқ отун йәткүзүватқан ишәшлик мәмликәт, – деди Президент. 
Си Цзиньпин қазақ йеридә көрситилгән һөрмәт үчүн Президентқа миннәтдарлиғини изһар қилди. У Қасым-Жомарт Тоқаевниң рәһбәрлигидә Қазақстан миллий йеңилиниш йолиға чүшкәнлигини, мәмликәт тәрәққиятида йеңи утуқларға йетиватқанлиғини қәйт қилди.
Президент Қасым-Жомарт Тоқаев билән ХХҖ рәиси Си Цзиньпин жүргүзгән музакириләр йәкүнлири бойичә 24 һөкүмәтара вә мәһкимиләрара һөҗҗәткә қол қоюлди.
 Икки дөләт делегациясиниң әзалири энергетика, аэрокосмос, рәқәмләштүрүш, бажхана, йеза егилиги, электронлуқ сода, туризм, медицина, медиа, илим-пән, регионара алақә саһалирдики һәмкарлиқни өз ичигә алидиған һөҗҗәтләрни имзалиди. Уларниң ичидә инвестицияләрни қоллаш вә өзара һимайә қилиш, техника-ихтисадий һәмкарлиқ тоғрилиқ һөкүмәтара шәртнамиләр бар.