• Әхбаратлар еқими
• 18 Қыркүйек, 2025

Қазақстан биринчи орунда

Йолдаш МОЛОТОВ, 
«Uiğur avazi» 

Мәлумки, 4-14-мизан күнлири арилиғида Англияниң Ливерпуль шәһиридә бокстин дуния чемпонати өтти. Мәзкүр мусабиқигә дунияниң 66 дөлитидин 540 боксчи қатнашти. Әрләр вә аяллар арисида он салмақ дәриҗисидә 80 медаль, шуниң ичидә 20 алтун медаль үчүн спортчилар күч синашти. 

Алаһидә тәкитләш лазимки, бу – дуния чемпионати йеңи тәшкил қилинған World Boxing тәшкилатиниң уюштуруши билән өткән дәсләпки мусабиқә. Он күнгә созулған мусабиқә йәкүни бойичә, командилиқ һесапта Қазақстан талланма командиси биринчи орунни егилиди. Қазақстанлиқ боксчилардин Алуа Балқыбекова (51 килограммғичә), Санжар Тәш­кен­бай (50 кило­граммғичә), Махмуд Сабырхан (55 килограммғичә), Аида Әбикеева (65 килограммғичә), Наталья Богданова (70 килограммғичә), Төрехан Сабырхан (70 килограммғичә), Айбек Оралбай (+90кг) алтун медаль йеңивалди. 48 килограмм салмақ дәриҗисидә һүнәр көрситидиған дунияниң үч дүркүн чемпиони Назым Қызайбай күмүч медальға еришти. Әнди Виктория Графеева (60 килограммғичә) билән Елдана Талипова ( 80 килограммдин жуқури) бронза елишқа муйәссәр болди. 
Спортниң мошу түридә дунияда Қазақстанниң асасий рәқиплириниң бири – Өзбәкстан командиси командилиқ һесапта иккинчи орунни егилисә, үчинчи орунға Һиндистан командиси қол йәткүзди.
Қошумчә қилсақ, илгири ишқиваз боксчилар арисида хәлиқара мусабиқиләрни, җүмлидин дуния чемпионатини ІВА тәшкилати өткүзәтти. Әнди Ливерпульда өткән дуния чемпионатини World Boxing тәшкилати уюштурди. Бу чемпионатқа Россия, Әрмәнстан, Сербия вә башқиму әлләрниң командилири қатнашмиди. Чүнки улар World Boxing тәшкилатиға һазирчә әза әмәс. Амма 2028-жили Лос-Анджелеста өтидиған язлиқ Олимпиадиға қатнишиш үчүн таллаш йеңи World Boxing тәшкилати арқилиқ әмәлгә ашурулиду. Демәк, Олимпиада оюнлириға қатнашқучи командилар мошу тәшкилатқа әза болуши шәрт. 
Дуния чемпионатида утуққа йәткән боксчиларни Дөләт рәһбири алаһидә тәбриклиди. «Ливерпульда өткән бокстин дуния чемпионатида миллий талланма командиниң ғалибийәт йолини Алуа Балқыбекова, Аида Әбикеева, Төрехан Сабырхан, Наталья Богданова, Айбек Оралбай давамлаштурди. Қазақ боксчилири дуния чемпионатида әҗайип нәтиҗигә йәтти. Әнди алдимизда АҚШта өтидиған Олимпиада оюнлири күтиватиду. Шуниңға һазирдин башлап тәйярлиниш керәк. Қазақ бокс мәктивиниң мәртивиси дайим жуқури болсун», дәп язди Президент өзиниң Instagram сәһиписидә.