• Әхбаратлар еқими
• 25 Қыркүйек, 2025

Устаз һәм мәшиқләндүргүчи

Гөһәрбүви ИСМАЙИЛҖАНОВА,
«Uiğur avazi» 

Яркәнт тәвәсидә яш әвлатниң спортниң һәрхил түрлиридин мәшиқлинишигә тегишлик шараит яритилған. Буниң өзи елимиз Президенти мәктүплиридики сағлам һаят тәризигә аит вәзипилириниң әмәлгә ешиватқининиң ярқин ипадисидур.  

Бу қетим биз Чулуқай йезисида чуқиришип, алдирап келиватқан бир топ балини учраттуқ. Улардин нәгә маңғанлиғини сориғинимизда, бир еғиздин: «Шаһмурат муәллимниң мәктивигә», дәп җавап беришти. Биз уларға қошулуп, спорт мәктивигә қәдәм тәшрип қилдуқ. 
Өзини «Шаһмурат Абдунәби» дәп тонуштурған жигит байиқи балиларниң мәшиқләндүргүчиси екән. Бой-турқи бирдәк балиларниң салмақ дәриҗисиму охшашкән. Улар мәктәптин кейин һәптиниң бәш күни мошу залға келип мәшиқлинидекән. Балилар дәрру гимнастикилиқ элементларни орунлашқа киришти. Шаһмуратниң иштин қоли бираз бошиғанда, униңдин спортқа қандақларчә келип қалғанлиғи һәққидә соридуқ. 
– Спортқа болған һәвәсимни байқиған дадам грек-рим күриши бойичә мәшиқләндүргүчи Ленур Барманбековқа шагиртлиққа елип кәлди. 8-синиптин кейин у мени Талдиқорған шәһиридики спорт мәктивигә елип барди. Андин Илияс Жансүгүров намидики педагогика университетиниң тәнтәрбийә пәни муәллими факультетиға оқушқа чүшүп, уни муваппәқийәтлик тамамлидим, – деди у. 
Шаһмурат Абдунәби он үч жилдин бу ян мәктәптә тәнтәрбийә пәнидин дәрис бериватиду. Шундақла Чулуқайдики шәхсий спорт мәктивидә өсмүрләрни грек-рим күриши бойичә мәшиқләндүрүватқиниғиму төрт жил болди. Кичигидинла спортниң бу түри билән мәшиқләнгән у вилайәтлик, җумһурийәтлик һәрхил турнир, чемпионатлардин қуруқ қол қайтмиди. Алтә қетим Қазақстан чемпиони аталған жигит спорт маһирлиғиға намзат дәриҗисигә көтирилди. Йеқинда у Талдиқорған шәһиридә өткән хәлиқара «Аңыздар айқасы» мусабиқисидә йәнә биринчи орунни йеңивелип, алтун медаль вә мәхсус бәлбаққа егә болди. Әнди униң шагиртлириму тинмай мәшиқлинип, устазини йәргә қаратмай, дайимла алдинқи сәптин көрүнмәктә. Шаһмуратниң шагирти Мирас Амиров йеқинда Қариғанда шәһиридики Қазақстан чемпионатида бронза медаль билән қайтти. Мәшиқләндүргүчи вә шагиртлириму дайимла мусабиқиләрдин қуруқ қол қайтмайду. Ейтмақчи, униң он спорт ишқивази йеқинда спорт маһирлиғиға намзат аталди. Үч шагирти – Алмутидики, йәнә үчи Талдиқорған шәһиридики спорт мәктәплиридә тәһсил көрүватиду. 

Жетису вилайити, 
Панфилов наһийәси