• Әхбаратлар еқими
• 02 Қазан, 2025

Әл ишәнчисини ақлаш һәммидин әла

Гөһәрбүви
ИСМАЙИЛҖАНОВА,
«Uiğur avazi»

Мәлумки, елимиздә шәһәр вә йеза һакимлириниң сайлими өтүп, униңға аһали паал қатнишиватиду. Дөләт рәһбириниң сәясий ислаһатлириға мунасивәтлик йеза, шәһәр һакимлирини сайлаш механизмини әмәлгә ашуруш наһийәдә қандақ кетип барғанлиғи билиш мәхситидә Панфилов наһийәлик участкилиқ сайлам комиссиясиниң рәиси Күлбан Нуралиноваға мураҗиәт қилдуқ.
 
– 2021-жили дәсләпки қетим сайлиғучилар йеза вә шәһәр һакимлириниң сайлимиға қатнашқан еди. Мана аридин төрт жил өтүп, елимиздә иккинчи қетим сайлам болди. Ениғарақ ейтқанда, чиллә ейида Панфилов наһийәсидики Бирлик, Чулуқай, Чоң Чиған, Үчарал йеза округлириниң турғунлири өз һакимлирини сайлаш кәби муһим кампаниягә қатнашти. Төрт йеза округида өткән бу сәясий мәвсүмни барлиқ тәләпләргә мувапиқ, жуқури дәриҗидә өтти дейишкә толуқ асас бар. Ундақ болғини, бирдинла шуни тәкитләш керәкки, йеза адәмлири округ һакимини сайлашқа чоң ишәнчә вә җавапкәрлик билдүрүп, паал қатнишиватиду. Мәлуматларға асаслансақ, төрт йеза округида чоң-кичик болуп, җәми 14 йеза бар. Уларда камаләткә толған 18 151 адәмдин 14 033 адәм аваз бәрди. Сайламға аталған йезилардин 77,3 пайиз сайлиғучи қатнашти. 
Қазақстан Җумһурийити Сайлам һәм дөләт хизмити Қанунлириға мувапиқ, 25 яштин ашқан гражданлар сайлинишқа һоқуқлуқ. Бу қетимқи сайламда 4 йеза округлиридин 12 граждан һаким болушқа өз намзитини көрсәтти. Уларниң арисида бир намзат «Amanat» партияси тәрипидин бәйгигә чүшсә, қалған он бир намзат өзини өзи тәвсийә қилиш арқилиқ қатнашти. Сайлам тоғрилиқ қанунға мувапиқ, намзатлар алдин-ала, йәни бир ай давамида аһали билән учришишларни өткүзди. Уларда округ турғунлири һакимлиққа үмүткарларниң келәчәк иш реҗилири билән тонушти. Сайлам нәтиҗиси бойичә, Бирлик йеза округиға Дидар Мухамеджан, Чулуқай йеза округиға Айдос Арсаламов, Чоң Чиған йеза округиға Едил Тумақбаев, Үчарал йеза округиға болса Қуаныш Қоспағаров һаким болуп сайланди.
Шуниму қошумчә қилиш керәкки, сайлиғучилар арисида яшанғанлар билән накалар болғанлиқтин, биз, комиссия әзалири, бюллетеньларни өйлиригә йәткүзүп беримиз. Айримлирини мәхсус машинилар билән сайлам участкисиға елип келимиз. Шуниси муһимки, йеза округлирида өткән сайлам күни жуқурида нами аталған йезилардики накаларму өз жутиниң тәғдиригә бепәрва әмәслигини дәлилләп, сайламға толуқ қатнашти. Өз новитидә көрүш һәм сөзләш қабилийитидә проблемиси бар сайлиғучилар сурдотәрҗиманлар хизмитидин пайдиланди. Муһим сәясий бу кампаниядин һеч ким сирт қалмайватқанлиғи биз үчүн әһмийәтлик, – дәйду Күлбан Нуртайқизи биз билән болған сөһбәттә. 
Шуниму тәкитләш керәкки, һазир Панфилов наһийәлик Сайлам комиссиясиниң әзалири җай-җайларда өткүзүлүватқан учришишларда Конституция, гражданлар һоқуқлири, сайлам вә сайлиғучи һәққидә һәрхил чарә-тәдбирләрни уюштуруп, тәшвиқат-чүшәндүрүш ишлирини елип бериватиду. Шундақ учришишларниң бири Панфилов наһийәлик «Аmanat» партияси шөбисиниң бенасида болуп өтти. Сайлам комиссияси рәисиниң орунбасари Сағила Теткусизова яш сайлиғучилар клуби әзалири билән дүгләк үстәл әтрапида баш қошти. Униңда һакимлар сайлими һәққидә кәң чүшәнчә берилип, иккинчи қетим өткән йеза округлири һакимлири сайлимидин слайдлар, видеороликлар көрситилди. Шундақла Атамекен йеза округидики Қорғас вә А.Розибақиев намидики, Көбиков намидики, Кичик Чиған, Керим-Ағаш, Билал Назим намидики мәктәпләр вә Яркәнт алий педагогика колледжида болса, дөләт хизмәтчиси болуш һәққидә интеллектуаллиқ оюнлар вә Конституцияниң 30 жиллиғиға мунасивәтлик байқашлар, «Яшлар вә сайлаш һоқуқлири», «Ата заң – асыл мұраттар бастауы» мавзулирида өткән чарә-тәдбирләр – сөзимизниң испати. 
– 2026-жили наһийәниң Сарибәл, Айдарли, Көктал, Атамекен, Үлкен­ағаш йезилири билән Яркәнт шәһири һаким­лириниң сай­лими өти­ду. Шуниң үчүн­­му биз сай­лиғучиларниң, келәчәк егилири болған әвлатниң елимизниң мунасип гражданлиридин болуп шәкиллинишини, сайлам җәрияниға қатнишишқа қизиқишини ашуруш мәхситидә, көпирәк яшлар билән учришиватимиз. Чүнки уларниң креатив пикир-мулаһизилири җәмийитимиз үчүн әһмийәтлик. Бу җәһәттин йеза яшлириниң, болупму мәктәп тамамлаватқан қиз-оғулларниң қизиқиши, интилиши жуқури.  Уларниң дебат оюнлиридики, интеллектуаллиқ кәчләрдики, сөһбәтләр вә дүгләк үстәлләрдики паалийәтчанлиғи билән әқил-парасити һәрқандақ адәмни қайил қилиду, – дәп рәһбириниң сөзигә қошумчә қилди комиссия әзаси Сағила Манапқизи.
Панфилов наһийәлик сайлам комиссиясида 7 әза турақлиқ иш елип бариду. Һәрхил дәриҗидики 503 сайлам участкисида 615 хадим мәвсүмлүк, йәни сайлам өтидиған мәзгилдә ишқа киришиду.
Биз сайлам комиссияси рәисидин йеза турғунлириниң пикирлири тоғрилиқму соридуқ.
– Адәттә йеза хәлқи наһайити диққәтчан вә тәләпчан. Чүнки қайсила жутқа бармаң, сайлиғучилар шу йәрдә туғулуп өскән намзатларни тәвсийә қилиду. Чоң Чиған йеза округида әң яш һакимларниң бири – Едил Тумақбаев мошуниң билән иккинчи қетим сайланди. Аваз бәргүчиләр униң таза су, йол, электр энергияси вә газ тартиш мәсилилирини һәл қилишқа көп күч чиқарғанлиғини етирап қилишти. Чулуқайдиму шундақла әһвал. Айдос Арсаламов йеза һакими болуп сайланди. Әнди турғунлар газ тартиш, су системисини йеңилаш вә йол ясаш мәсилилириниң йешилишини күтиватиду. Бирлик йеза округи аһалисиму «Amanat» партияси тәвсийә қилған Дидар Мухамеджанниң нурғун ишларни әмәлгә ашурғанлиғини тәкитләп, кәлгүси реҗилирини назарәт қилмақта. Үчаралллиқ сайлиғучилар бу қетим өз жутиниң пәрзәнди Қуаныш Қоспағаровқа үмү­тини билдүрди. Әл ишәнчиси – һәммидин әла, – деди Күлбан Нуртайқизи сай­­лан­ған һакимлар һәқ­қидә тох­тилип.
Елимиздә жүргүзүлүватқан сәясий исла­һатлар тәләп­лиригә мувапиқ, өз елиниң тәрәқ­қиятиға тегишлик төһписини қошидиған һакимларни жутдашлар өзлири сайлайду. Хәлиқ ғеми билән яшайдиған яшларниң сайлинишини халайдиған диққәтчан аваз бәргүчиләр новәттики сайламға қизғин тәйярлиқ кетип барғанлиғидин хәвәрдар. 

Жетису вилайити,
Панфилов наһийәси