• Әхбаратлар еқими
• 02 Қазан, 2025

Ортақ борчимиз

Дөләт рәһбири Қасым-Жомарт Кемелоғли Тоқаевниң Қазақстан хәлқигә йоллиған «Сүнъий әқил дәвридики Қазақстан: актуал вәзипиләр вә уларни рәқәмлик трансформация арқилиқ һәл қилиш» намлиқ Мәктүби елимиз тәрәққиятиниң йеңи дәврини ениқлап бәрди. Президентимиз көрсәткән әвзәлликләр – тез рәқәмләштүрүш, сүнъий әқилни барлиқ саһаға киргүзүш, ихтисатни күчәйтиш вә хәлиқниң әһвалини яхшилаш – вақит тәләп қилған ениқ қәдәмләр болуп тепилиду һәм пухраларниң дөләт институтлириға болған ишәнчисини ашуриду. Мәктүптә йеңилиниш вә турақлиқ тәрәққий етиш йөнилишлириму көрситилгән. Күчлүк һәм гүлләнгән Қазақстанниң келәчиги үчүн дөләт, җәмийәт вә һәр бир гражданниң күчҗигәрини бириктүрүш бурунқидинму әһмийәтлик. Сүнъий әқилни барлиқ саһаға киргүзүш пәқәт дөләт хизмитидила әмәс, бәлки тиҗарәтчилик саһасидиму йеңи мүмкинчиликләрни елип келиду. Әнди Әмгәкчиқазақ охшаш аграрлиқ наһийәләрдә агрохабларниң ечилиши деханлар үчүн бебаһа ярдәм болмақ. Рәқәмлик технология ишләпчиқириш мәһсулдарлиғини көтирип, йәр вә суни үнүмлүк пайдилинишқа елип келиду, дәп ойлаймән. Дөләт рәһбири бир палатилиқ Парламентқиму тохталди һәм ушбу ислаһатқа бағлиқ референдум өткүзүшни тәклип қилди. Бу йәрдә биз Президентимизниң хәлиқ авазиға чоң әһмийәт бериватқанлиғини, шуниң билән биллә униң ушбу мәсилигә жуқури пәм-парасәт билән яндашқанлиғини көрүватимиз. Дөләт хадими сүпитидә мән Мәктүптә көрситилгән мәсилиләрни толуқ қоллаймән вә уларни әмәлгә ашуруш үчүн бир кишилик төһпәмни қошушқа тәйярмән. Мәктүпни орунлаш – елимизниң турақлиқ тәрәққияти, адәм капиталиниң өсүши вә инновациялиқ экосистеминиң қелиплишиши үчүн қувәтлик сүръәт беридиғанлиғиға ишинимән. Қазақстанни заманивий, сүръәтлик һәм риқабәткә қабил дөләт ретидә риваҗландуруш – барлиғимизниң ортақ борчимиз.

Мөмүнҗан ИСЛАМОВ,

Ават йеза округиниң һакими

Алмута вилайити, Әмгәкчиқазақ наһийәси