• Әхбаратлар еқими
• 13 Қараша, 2025

Улар – бизниң пәхримиз

Сабирәм ӘНВӘРОВА,
«Uiğur avazi»

Йеқинда елимизниң пайтәхти Астана шәһиридә ҚҖ Маарип министрлиги Миллий илмий-тәҗрибә тәнтәрбийә мәркизиниң уюштуруши билән «Тең мүмкіндіктер» намлиқ җумһурийәтлик инклюзивлиқ спорт фестивали өтти. Икки күнгә созулған мусабиқигә елимизниң барлиқ тәвәлиридин кәлгән бәш йүзгә йеқин бала қатнашти. Униң ичидә бочча, эстафетилиқ оюнлар вә йеник атлетика бойичә өз маһаритини көрсәткән 189 спортчи мукапатлиқ орунларниң саһиби аталди.

Җүмлидин мәзкүр фестивальға Уйғур наһийәсигә вакаләтән қатнашқан Илия Молотов (Бәхтия) намидики 3-оттура мәктивиниң қизлар командиси биринчи орунға еришти. Пайтәхтимиздин хуш хәвәр йоллиған 8-синип оқуғучилири Дилинур Союзова, Камиләм вә Муқәддәс Зилавдуновалар билән уларниң мәшиқләндүргүчиси, тәнтәрбийә пәниниң муәллими Тайир Сасиқовни ана мәктивидә дағдуғилиқ күтивалди. Яш чемпионларни қарши елиш мәрасимиға мәктәп коллективи, оқуғучилар вә ата-анилардин бөләк, Аmanat партияси Уйғур наһийәлик шөбиси, наһийәлик билим бөлүми вә наһийәлик Уйғур этномәдәнийәт мәркизиниң вәкиллири қатнашти. 
Учришишта Аmanat партияси Уйғур наһийәлик шөбисиниң рәиси Нурсултан Болатулы ушбу фестивальниң Аmanat партиясиниң «Кедергісіз келешек» лайиһиси асасида уюштурулғанлиғини тәкитләп, мәктәп мудири Шерзат Бабаханов билән қизларни фестивальға тәйярлиған тәнтәрбийә пәниниң муәллими Тайир Таймироғлиға Аmanat партиясиниң Тәшәккүрнамисини тапшурди. Дилинур Союзова, Камиләм вә Муқәддәс Зилавдуновалар билән биллә фестивальниң вилайәтлик басқучида ғалибийәткә йәткән 5-синип оқуғучилири Низора Ғоҗәхмәтова, Севара Абдухелилқизи вә Анеля Союзовани наһийә һакими Бота Елеусизованиң Пәхрий ярлиғи билән мукапатлиди. 
Өз новитидә сөз алған Наһийәлик билим бөлүминиң методика кабинетиниң рәһбири Эльмира Рысмендиева билим бөлүминиң башлиғи Мөлдир Қурманалиеваниң тәбригини йәткүзүп, чемпионларниң ата-анилири Дилмурат Салиев, Равиль вә Радик Бавденовларни Тәшәккүрнамә билән тәғдирлиди. Мошундақ изгү тиләкләрни наһийәлик Уйғур этномәдәнийәт мәркизиниң рәиси Арлен Һосманов билән наһийәлик мәслиһәтниң депутати, тонулған тиҗарәтчи Алимҗан Һашимов давамлаштуруп, жут намидин Тайир Сасиқов билән униң командисиға 100 миң тәңгилик сертификат соға қилди. 
Мәрасимниң ахири мәктәп оқуғучилири тәрипидин тәйярланған концертлиқ программиға улашти. Яш чемпионларниң ғәлибиси мәктәпниң мәртивисини көтирип, наһийәниң утуғиға утуқ қошти. Бу күни билим ордиси бөләкчә җанлинип кәтти. Оқуғучилар бәк роһланди, ата-анилири билән муәллимлириниң хошаллиғида чәк болмиди. 
 «Тең мүмкіндіктер» фестивали – балиларға, шуниң ичидә алаһидә билим беришни тәләп қилидиған имканийити чәкләнгән өсмүрләрниң өз қабилийитини тонутушиға, спорт арқилиқ өз-өзигә дегән ишәнчисини ашурушиға йол ачидиған муһим лайиһә. 

Алмута вилайити, 
Уйғур наһийәси