• Әхбаратлар еқими
• 13 Қараша, 2025

Қазақстан – биринчи орунда

Йолдаш МОЛОТОВ, 
«Uiğur avazi»
 
Бу күнләрдә Таиландниң Бангкок шәһиридә җиу-җитсудин дуния чемпионати өтүватиду. Униңға дунияниң 59 дөлитидин 1100 җитсер қатнашмақта. Мәзкүр чемпионатта чоңлар арисидики мусабиқиләр аяқлишип, ғалиплар ениқ болди. Қазақстанниң әрләр вә аяллар талланма командиси тәркивидә һүнәр көрсәткән спортчилар 11 алтун, 16 күмүч, 13 бронза медаль йеңивалди Шундақ қилип, чоңлар арисидики Қазақстан талланма командиси командилиқ һесапта биринчи орунни егилиди. 
Әнди 16 яшқичә болған, йәни U16 категориясидики муса­биқиләр давамлишиватиду. Мошу күнгә қәдәр бу категориядә күч синашқан спортчилар арисида «ARMGG» академиясиниң спортчиси Кемал Розахунов дуния чемпиони аталди.
– Кемал җиу-җитсу билән төрт йешидин башлап шуғуллинип келиватиду, – дәйду тонулған мәшиқләндүргүчи Арман Розахунов. – У бийил Қазақстан вә Азия чемпиони болди. Мошу дуния чемпионатида Кемал дәсләп россиялик рәқивини 8:0 һесави билән йәңди. Иккинчи йәкму-йәктә кореялик спортчини, йерим финалда болса, филиппинлиқ спортчини тиз пүктүрди. Финалда кореялик җитсерни 4:0 һесави билән йеңип, дуния чемпиони аталди. Қошумчә қилсам, Кемал мошу дуния чемпионатида барлиқ рәқипли­ригә бир пай бәрмәй йәңди.