• Әхбаратлар еқими
• 13 Қараша, 2025

Мәңгүлүк достлуқ

Президент Қасым-Жомарт Тоқаев Россия Президенти Владимир Путинниң тәкливи билән Москваға дөләт сәпири билән барди. Внуково-2 аэропортида алий меһманни тәнтәнилик рәвиштә Россия Федерацияси һөкүмити рәисиниң биринчи орунбасари Денис Мантуров билән башқиму рәсмий шәхсләр қарши алди. Икки мәмликәтниң дөләт гимнлири орунланди.

Президент мошу сәпири даирисидә Москва дөләт хәлиқара мунасивәтләр институтиниң студентлири билән сөһбәтләшти. Студентлар Дөләт рәһбири билән қазақ тилида сөзләшти. Улар Президент Қасым-Жомарт Тоқаевниң китаплирида тәсвирләнгән дипломатия билән ашкари­лиқ қаидилири Москва дөләт хәлиқара мунасивәтләр институтида үлгә сүпитидә оқулидиғанлиғини ейтти. Шуниң билән биллә яшлар Абай Қунанбайулыниң иҗадийитигә қизиқиди­ғанлиғини тәкитләшти. 
– Шаирниң «Инсанниң һәммисини сөй, қериндишим дәп» дегән достлуқ тоғрилиқ ой-пикирлири алаһидә. Рос­сия билән Қазақстан – мәң­гүлүк достлуқниң қош қани­ти дәп һесаплаймиз. Икки әлни, икки хәлиқни һәқиқий достлуқ алақиләр бағлашу­туриду, – деди яшлар.
Дөләт рәһбири студент­ларниң қазақ тилини үгинишкә болған интасини жуқури баһалап, уларға утуқ тилиди.
– Москва дөләт хәлиқара мунасивәтләр институти – наһайити абройлуқ алий оқуш орни. Пүткүл дунияға тонулған. Қазақстан һазир мустәқил мәмликәт. Мениң оюмчә, Москва дөләт хәли­қара мунасивәтләр инсти­тутида алған билимиңлар келәчәктә чоң пайдисини елип келиду. Чүнки һәрхил мәмликәтләр тоғрилиқ, шуниң ичидә Россиядин илгиридин келиватқан иттипақдиши Қазақстан һәққидә көп мәлумат билиш силәргә кейин ишқа орун­лишишқа, шундақла дунияда вә регионлуқ дәриҗидә риқабәткә қабил мутәхәссис болушқа ярдәмлишиду, – деди Президент.
Андин Қазақстан вә Россия президентлири нарәсмий учришиш өткүзди. Дөләт рәһбири Россия президентиға алаһидә һөрмәт көрсәткәнлиги үчүн миннәтдарлиқ изһар қилди. 
– Һөрмәтлик Владимир Владимирович, әң алди билән, Москваға, мошу хасийәтлик йәргә қәдәм ташлиған пәйттин башлап көрситилгән алаһидә һөрмәт үчүн сизгә тәшәккүр ейтимән. Бая биз протокол аспектлири бойичә пикир алмаштурдуқ. Икки­тәрәплимә һәмкарлиқ стратегиялик шериклик, иттипақдаш мунасивәтләр характериға егә. Барлиқ йөнилишләрдә бирлишип ишләватимиз. Мәмликәт­лиримиз арисида һечқандақ һәл қилинмиған мәсилә йоқ. Мәсилә пәйда болғанниң өзидә президентлар вә һөкүмәтләр рәһбәрлириниң әмгиги түпәйли, иҗабий һәл қилиниватиду. Сизниң тәкливиңизни хошаллиқ илкидә қобул қилдим. Һәқиқәтәнму, бүгүн нарәсмий шариатта пикир алмаштуримиз. Мениң сиз билән муһакимә қилидиған бираз мәсилиләр бар, – деди Қасым-Жомарт Тоқаев.
Владимир Путин Қазақстан Президент билән учрашқиниға бәк хошал екәнлигини ейтти.
– Һөрмәтлик Қасым-Жомарт Кемелулы, әң алди билән сизгә вақит тепип, келишкинимиздәк, дөләт сәпири билән кәлгиниңиз үчүн миннәтдарлиқ изһар қилимән. Әлвәттә, биз дайим алақидә. Амма дөләт­ләрара мунасивәтләрдә мошундақ протоколлуқ әһвалларму муһим. Бүгүн нарәсмий әһвалда учришип, барлиқ муһим мәсилиләр бойичә сөһбәтлишимиз. Әтә кәсипдашлар билән биллә иккитәрәплимә алақиниң күн тәртивини қараш­туримиз вә истиқбали бар йөнилишләргә диққәт бөлимиз. Умумән, биз мошу жилни наһайити яхши нәтиҗиләр билән аяқ­лаштуримиз. Шундақла келәчәккә беғишланған планни орунлаймиз дәп ойлаймән, – деди Россия Президенти.