• Әхбаратлар еқими
• 11 Желтоқсан, 2025

Шиярниң армини башқичә

Сабирәм ӘНВӘРОВА,
«Uiğur avazi»

– Мениң арминим – ата-анам, қом-қериндашлиримниң аманлиғи. Шуниң өзи мениң үчүн бәхит, – дәйду 18 яшлиқ Шияр Җарипов. 

Шияр демәтлик балилардин арман һәққидә сорисақ, бәлким, тамамән башқичә җавап аңлиған болар едуқ. Амма Шиярниң арминиму, өзиму башқа балиларға охшимайду. Һаят уни бәзи мүмкинчиликләрдин чәклисиму, у өзини өмүрни сөйүштин чәклимиди. Путиниң дәрмани йоқ болсиму, қолидин немә иш келидиғанлиғини испатлиди. Мана бу – һәқиқий қәһриманлиқ! 
Шияр Мәһәмәтҗаноғли булту Дардамту оттура мәктивини түгәтти. Тәңтушлири қатарлиқ мәктәпкә берип оқалмисиму, өйдә пухта билим елип, муәллимлирини қайил қилди. Болупму униң қолһүнәргә дегән қизиши алаһидә болди. Шуңа 8-9 йешидинла у һәрхил буюмларни ясашқа киришип кәтти. 
– Маңа қолһүнәрвәнчилигини үгәткән муәллимим – Гүлмира Нодәрова. Мән өзәмгә яққан буюмларни униңға көрситәттим. У көңлүмни қалдурмай, қандақ ясаш керәклигини еринмәй үгитәтти. Йеңидин башлиғанда қолумдин кәлмисиму, «аста-аста үгинип кетисән» дәп мени роһландуратти. Шундақ қилип, биринчи қетим қәғәздин аққуш ясидим. Кейинирәк һәрхил нәрсиләрни өтүп, бош вақтимни ушбу әмәккә беғишлидим. Қәғәздин Бәйтерек, ваза, тәхсә, севәтләрни қураштуруп, лентидин рәңму-рәң гүлләрни тоқудум. Бир қизиғи, бирнемини башлисам, ахириға чиқармиғичә уйқум кәлмәйду. Вақитниң қандақ тез өтүп кәткининиму туймай қалимән. Бош вақитлиримда достлирим билән пат-пат учришип, мәлә ичидә сәйлә қилишни яқтуримән, – дәйду Шияр.
Шиярниң қолидин қолһүнәр буюмлирини ясашла әмәс, нағра челип, нахша ейтишму келиду. Ирадилик жигит жуттики чоң-кичик чарә-тәдбирләрдә вә той-төкүнләрдә һүнирини көрситип, көпчиликниң иллиқ илтипатиға еришмәктә. 
– Башта нағра чалаттим. Бирақ, саламәтлигимгә бағлиқ, қолумға көп күч чүширишкә болмайду. Шуңа кейинирәк нахша ейтишни таллидим, – деди у. 
Жуттики чоң-кичикниң тилини тапидиған сөзгә чевәр, талантлиқ һәм тәрбийилик жигит өйниң әң кәнҗиси. Ата-аниси вә тағдәк үч акиси униң һәрбир утуғиға хошал болиду вә һәрқачан қоллап-қувәтләйду. Бизму уни келәчәктә чоң сәһниләрдин, егиз пәллиләрдин көрүшни үмүт қилимиз. 

    
    Алмута вилайити, 
    Уйғур наһийәси