• Әхбаратлар еқими
• 11 Желтоқсан, 2025

Йеңи әвлатқа – йеңи имканийәт

Зульфира МАИСМЕЛИЕВА,
«Uiğur avazi»

Йеқинда А.Розибақиев намидики 153-мәктәп-гимназияси хәлиқара бакалавриат IB PYP аккредитациясидин утуқлуқ өтти. Бу пәқәт билим көрсәткүчи әмәс, мәктәпниң үзлүксиз паалийитиниң, мәктәп коллективи, оқуғучилар вә ата-анилириниң һәмкарлиқта бесип өткән узун вә мәшәқәтлик әмгигиниң нәтиҗисидур. 

Бу утуқ узунжиллиқ әмгәк, мәктәп рәһбәрлигиниң дана стратегияси, муәллимләрниң кәспий маһарити вә ата-аниларниң давамлиқ қоллап-қувәтлиши билән қолға кәлтүрүлди. Мәзкүр программа – пәқәт билим бериш биләнла чәкләнмәй, яш әвлатниң келәчигини өзгәртидиған, дунияниң риваҗлинишиға өз үлүшини қошушқа иқтидари бар шәхсни тәрбийиләйдиған йеңи оқутуш усули.
– Бу күн  мәктивимизниң тарих сәһиписидин алаһидә орун алидиған муһим вақиә, – дәйду, гимназия мудири вәзиписини атқуруватқан Гөзәл Рәҗәпова. – «IB PYP» программиси бойичә аккредитация елиш бизгә бир күндила кәлмиди, бу узун жилларға созулған тиришчанлиқ, изчил издиниш вә чоң җавапкәрликниң нәтиҗиси. Буниңда, әлвәттә, гимназиямизниң сабиқ мудири Шавкәт Өмәровниң әмгиги зор. Биз PYP шәртлиригә мувапиқ оқутуш реҗилиримизни йеңилидуқ, пәнара издиниш лайиһилирини җарий қилдуқ, муәллимләр үчүн кәңкөләмлик оқутуш курслирини уюштурдуқ. Шуниң билән биллә ресурслар китапханисини вә тәтқиқат ишлирини тәсис қилдуқ, әкси алақә системисини риваҗландурдуқ. Бүгүн мәктәп очуқ, заманивий вә издинишкә толған билим дәргаһиға айланди. Әң муһими, билим сүпити бойичә дуния стандартлириға йәткәнлигимизни һис қиливатимиз. Бу мәктивимизниң келәчигигә ечилған йол болди.
Мәзкүр программиниң координатори Гүлназ Аблитипова бу җәриянда өзигә жүкләнгән вәзипиниң һөддисидин мувәппәқийәтлик чиқип, барлиқ басқучларни системилиқ қоллап-қувәтләш билән тәминлиди. Һөҗҗәтләрни тәйярлап, PYP философиясини күндилик оқутушқа киргүзди. Шундақла муәллимләр билән бирликтә тәтқиқ қилиш иқтидарини шәкилләндүрүшкә, кәспий җәһәттин тәрәққий етиш вә тәнқидий ойлаш қабилийитини риваҗландуридиған оқуш җәриянини яритишқа алаһидә диққәт бөлди.
Мудирниң оқуш ишлири бойичә орунбасари Аида Әсқәрованиң тәкитлишичә, топлуқ тапшурмилар, тәҗрибә алмишиш, бирликтә оқутуш җәриянини реҗиләш вә оқутуш усуллирини музакирә қилиш, буниң барлиғи оқуғучиларниң риваҗлинишиға беғишланған аммибап оқутуш муһитини яритиду. Шуниң нәтиҗисидә балилар пәқәт билим елипла қоймай, тәтқиқат ишлирини өзләштүрүш, тәнқидий ойлаш вә җавапкәрликни һис қилиш қабилийитини мукәммәлләштүрүш имка­ни­йитигә егә болиду. Мәктәп рәсмий түрдә IB программиси реестриға киргүзүлди. Бу болса, билим сүпитиниң хәлиқара дәриҗидә етирап қилиниши болуп һесаплиниду. Йәни 153-мәктәп гимназиядин қолиға шаһадәтнамә алған оқуғучилар дунияниң һәрқандақ алий билим  дәргаһиға оқушқа чүшәләйду. Демәк, ана тилида билим еливатқан яш әвлат үчүн йеңи имканийәт пәйда болди, дегән сөз.
Хулләс,153-мәктәп-гимназияси өз тарихида йеңи дәвирни башлиди. Коллектив хәлиқара стандартларға лайиқ ишләләйдиғанлиғини, үгинишкә, өзгиришкә вә өсүшкә тәйяр екәнлигини дәлиллиди. IB аккредитацияси гимназия коллективиниң умумий утуғидур.