• Әхбаратлар еқими
• 11 Желтоқсан, 2025

Мукапатлар тапшурулди

Йолдаш МОЛОТОВ,
«Uiğur avazi»

Өткән һәптидә «Парыз» мукапитиниң вә «Алтын сапа» конкурсиниң йәкүнлири чиқирилип, лауреатлар ениқланди. Шуниңға мунасивәтлик Астанада ғалипларни мукапатлаш тәнтәниси өтти. Униңға Президент, Премьер-министр, Парламент депутатлири, мәркизий дөләт органлириниң вә карханиларниң рәһбәрлири қатнашти. 

Тәнтәнидә Дөләт рәһбири Қасым-Жомарт Тоқаев сөз сөзлиди.
– Бүгүн елимизниң тиҗарәт вәкиллири үчүн әһмийәтлик күн дейишкә болиду. Биз, қелиплашқан әньәнә бойичә, «Алтын сапа» вә «Парыз», «Қазақстанның үздік тауары» конкурслириниң ғалиплирини мукапатлаватимиз. Һәммиңларни чин қәлбимдин тәбрикләймән. 
Мошу йәрдики һәрбир тиҗарәтчиниң утуғи – мәмликәт утуғиниң көрүнүши. Силәр сүпәтлик мәһсулат чиқирип, ихтисатни тәрәққий әткүзүшкә вә хәлиқниң паравәнлигини ашурушқа зор төһпә қошуватисиләр. Иҗтимаий җавапкәрликни чоңқур һис қилип, хәйрихаһлиқ ишларға паал қатнишиватисиләр. Бу – өз ишиға адил, тәдбирчан вә вәтәнпәрвәр гражданларға хас хусусийәт дәп һесаплаймән. Дөләт силәрни дайим қоллашқа тәйяр, – деди Президент.
 Қасым-Жомарт Тоқаев өз нутқида төвәндики бәш мәсилигә алаһидә диққәт бөлди. Биринчидин, Һөкүмәт әмәлгә ашуруватқан ихтисадий сәясәт даирисидә инфляцияни турақлаштуруш вә төвәнлитиш, ихтисатниң турақлиқ өсүмини тәминләш, шундақла гражданларниң ениқ тапавәт тепишиға имканийәт яритиш. Иккинчиси, мәмликәт билән тиҗарәтниң мунасивитини өзгәртиш. Бу йәрдә аммивий рәқәмләштүрүш вә сүнъий әқил технологиялирини нәтиҗидар пайдилиниш. Үчинчидин, ихтисатни сүпәтлик тәрәққий әткүзүш үчүн ислаһатларни давамлаштуруш. Әң алди билән ихтисатниң иқтидари билән нәтиҗидарлиғини ашуруш – асасий мәхсәт. Төртинчидин, тиҗарәтниң мәнпәәти билән һоқуқлирини һимайә қилиш – мәмликәт алдида турған наһайити муһим мәсилә. Униң үчүн елимиздә һоқуқ вә сот системисини риваҗландуруш үчүн кәңдаирилик ишлар жүргүзүлүватиду. Бәшинчи, тиҗарәтни дөләт тәрипидин қоллаш чарилириниң нәтиҗидарлиғини ашуруш муһим. 
– Бийил «Парыз» конкурсиға қатнашқучилар һәрхил хәйрихаһлиқ ишларға 37 миллиард тәңгә мәбләғ бөлгән. Бу вәтәнлик тиҗарәтниң җәмийәт мәнпәәти үчүн тинмай адил хизмәт қилишқа тәйяр екәнлигини көрситиду. Мошу йәрдә олтарған һәрбир гражданниң туғулған йеригә дегән меһир-муһәббити яш тиҗарәтчиләргә үлгә-нәмунә болидиғини сөзсиз. Силәргә миннәтдарлиғимни изһар қилимән. Тиҗаритиңлар алға басивәрсун, – деди Президент сөзини хуласиләп. 
Тәкитләш лазимки, бийил «Парыз» конкурсиға қатнишиш үчүн 354 илтимас, җүмлидин чоң мәһкимиләрдин 87 кичик вә оттура тиҗарәттин 267 илтимас чүшкән. Уларниң ичидә «Әң илғар иҗтимаий җавапкәрлиги жуқури мәһкимә» номинациясигә 198 илтимас; «Әмгәкни қоғдаш саһасидики әң илғар мәһкимә» номинациясигә 53 илтимас; «Әң яхши коллективлиқ шәртнамә» номинациясигә 52 илтимас; «Экологиягә қошқан үлүши үчүн» номинациясигә 33 илтимас, «Әң яхши иҗтимаий жил лайиһиси» мәхсус мукапитиға 18 илтимас келип чүшкән. «Парызниң» Гран-при, йәни Баш  мукапитини чоң тиҗарәт субъектлири арисидин Улытав вилайитидики «Корпорация Казахмыс» ҖЧЙ, кичик вә оттура тиҗарәт субъектлиридин Қизилорда вилайитидин «Ак-Ниет-Агро и К» ҖЧЙ алди. «Әң илғар иҗтимаий җавапкәрлиги жуқури мәһкимә» номинациясидә Жетису вилайитидин «Қайнар АКБ» ҖЧЙ, Чимкәнт шәһиридин «Dala Construction.KZ» АҖ, Абай вилайитидин «Восток бройлер» ҖЧЙ, Шәрқий Қазақстан вилайитидин «Камышинское» дехан егилиги, Түркстан вилайитидин «Сарыағаш-қус» ҖЧЙ, Ақмола вилайитидин «Гормолзавод» ҖЧЙ лауреат аталди. «Әмгәкни қоғдаш саһасидики әң илғар мәһкимә» номинациясидә Атырав вилайитидин «Даларо/Оверсиз/Лимитед» ҖЧЙ, Павлодар вилайитидин «Алюминий Казахстана» АҖ, Астанадин «MODEX ASTANA» ҖЧЙ, Астанадин «ДСК GLB» ҖЧЙ, Шәрқий Қазақстан вилайитидин «Vosca» ҖЧЙ, Ақмола вилайитидин «АЙБАТ» ҖЧЙ ғалип чиқти. «Әң яхши коллективлиқ шәртнамә» номинациясидә Қариғанда вилайитидин «Qarmet» АҖ, Алмутидин «АЗМК» ҖЧЙ, Ақмола вилайитидин «RG Processing» ҖЧЙ, Қостанай вилайитидин «МехЛитКом» ҖЧЙ, Шималий Қазақстан вилайитидин «Қос ағаш» ҖЧЙ, Улытав вилайитидин «Жүрек» ҖЧЙ мукапатқа егә болди. «Экологиягә қошқан үлүши үчүн» номинациясидә Қизилорда вилайитидин «СКЗ-U» ҖЧЙ, Чимкәнт шәһиридин «Еврокристалл» ҖЧЙ, Шәрқий Қазақстан вилайитидин «Усть-Каменогорская ТЭЦ» ҖЧЙ, Ақтөбә вилайитидин «Lucrum star» ҖЧЙ, Ғәрбий Қазақстан вилайитидин «Саи-Центр» җәмийәтлик фонди, Қариғанда вилайитидин «Рапид» ширкити ғалип чиқти. «Әң яхши иҗтимаий жил лайиһиси» мәхсус мукапитини Алмутидин «СП Кока-Кола Алматы Боттлерс» ҖЧЙ, Павлодар вилайитидин «789 KZ» шәхсий тиҗарәт карханиси алди. 
 Әнди «Алтын сапа» мукапитиниң «Әң яхши индустриялик лайиһә» номинациясидә Чимкәнт шәһиридин «Karlskrona LC AB» ҖЧЙ вә «Әң яхши инновациялик лайиһә» номинациясидә Астана шәһиридин «AG TECH» ҖЧЙ ғалип аталди.
Қошумчә қилсақ, «Атамекен» Миллий тиҗарәтчиләр палатиси өз саһасида утуққа йетиватқан карханиларни қоллап-қувәтләш мәхситидә «Іскер» мәхсус мукапитини тәсис қилған. Мәзкүр мукапат һәрхил категорияләрни өз ичигә алиду. Мукапат өз саһасида чоң утуқларни қолға кәлтүргән, санаәткә инновациялик өзгиришләрни киргүзгән, иш орунлириниң бәрпа болушиға вә елимиз ихтисадиниң тәрәққиятиға үлүш қошуватқан тиҗарәтчиләргә тапшурулиду. Мәзкүр мукапатму «Алтын сапа» мукапитини тапшуруш пәйтидә тәғдим қилиниду. Бийил «Іскер» мукапити «Фирма «БеНТ» җавапкәрлиги чәкләнгән йолдашлиғиға тапшурулди.
 Биз, пурсәттин пайдилинип «Әң яхши коллективлиқ шәртнамә» номинациясидә иккинчи орунни егилигән «АЗМК» ҖЧЙниң коллективини вә шәхсән мәһкимә мудири Шөһрәт Шардиновни, «Фирма «БеНТ» җавапкәрлиги чәкләнгән йолдашлиғиниң президенти Динмуһәмәт Кузиевни бу утуғи билән тәбрикләймиз.